1 Timoteo

6 KO lautolu oti ha i lalo he akau hahamo, ko e tau fekafekau, kia manatu e lautolu kua lata ke he tau iki ha lautolu ni e lilifu, neke talahaua kelea e higoa he Atua mo e hana kupu.

2 Ka ko lautolu kua nofo ke he tau iki kua tua, aua neke fakalialia a lautolu ki ai; ha ko e tau matakainaga a lautolu, ka kia au atu he fekafekau ki ai, ha kua tua mo e ofania a lautolu ke moua e fekafekauaga mitaki. Kia fakaako atu mo e tomatoma atu e koe e tau mena na.

3 Kaeke kua fakaako kehe e taha, mo e nakai omaoma ke he tau kupu tonu ko e tau kupu haia he Iki ha tautolu ko Iesu Keriso, mo e kupu kua lata mo e mahani Atua,

4 Kua fakatokoluga a ia, kua nakai iloa ha mena, ka kua mate a ia he fia kumikumi mo e taufetoko ke he tau kupu, kua tutupu mai ai e mahekeheke, mo e taufetoko mo e tau vagahau kelea, mo e tau manatu mahalohalo kelea,

5 Ko e tau taufetoko teao he tau tagata loto kelea, ko lautolu kua uta kehe ia lautolu e kupu moli, ko lautolu kua manatu ko e mahani Atua ko e mena ke moua ai e koloa haia; kia kalo kehe a koe mo e tau tagata pihia.

6 Ka ko e mahani Atua mo e fakamate ko e koloa lahi ni haia.

7 Ha kua nakai ta mai e tautolu ha mena taha ke he lalolagi, ti iloa maliali foki e tautolu nakai maeke ni ke uta kehe ai ha mena.

8 Kaeke kua moua e tautolu e tau mena kai, mo e tau mena ke fakatapulu ai, to lata ia kia tautolu.

9 Ka ko lautolu kua manako ke maukoloa, kua moua a lautolu he kamatamata, mo e hele, mo e tau manako lahi ne loga kua goagoa ai mo e kelea ai, ko e tau mena ia kua fakatomo ai e tau tagata ke he mahaikava mo e malaia.

10 Ha ko e loto lahi ke he tau tupe, ko a vaka haia he tau mena kelea oti kana; ko e falu foki kua manako lahi ki ai, ti hehe ai a lautolu mai he tua, kua hoka e lautolu a lautolu ti ati ni ke he tau mena matematekelea loga.

11 Ka ko koe, ko e tagata he Atua na e, kia hola kehe he tau mena ia; ka kia tutuli e tututonu, mo e mahani Atua, mo e tua, mo e fakaalofa, mo e fakauka, mo e mahani molu.

12 Kia tau ke he tau mitaki kua lata mo e tua, kia toto e moui tukulagi, ne ui foki a koe ki ai, ne talahau atu ai e koe e talahauaga mitaki ki mua he tau talahau tokologa.

13 Kua tala atu au kia koe ki mua he Atua, ko ia kua fakamoui e tau mena oti, ki mua foki a Keriso Iesu, ko ia ne talahau ki mua a Ponotio Pilato e talahauaga mitaki,

14 Kia taofi e koe ke he poaki, mo e nakai fai ila, mo e nakai talahaua kelea, ato hoko atu ke he fakakite mai he Iki ha tautolu ko Iesu Keriso.

15 To fakakite mai ai e ia ke he hana ni a tau aho, ko ia kua monuina mo e Iki tokotaha, ko e Patuiki he tau patuiki, mo e Iki he tau iki;

16 Ko ia hokoia ne toka ai e moui tukulagi, kua haele ke he maama nakai fakatata ki ai e taha; kua nakai kitia a ia he taha tagata, ti nakai maeke foki ke kitia ai; kia ha ha ia ia e lilifu mo e malolo tukulagi. Amene.

17 Kia tala age ke he tau maukoloa he mouiaga nai, aua neke fakatokoluga a lautolu, aua foki neke tua ke he koloa nakai tumau, ka ko e Atua moui kua foaki fakalahi mai e tau mena oti ke fiafia ai;

18 Kia mahani mitaki atu a lautolu, kia maukoloa a lautolu ke he tau gahua mitaki, kia fakamokoi, mo e ta atu noa e lautolu ha lautolu a tau mena,

19 Kia tauteute e lautolu e koloa ma lautolu ni ko e fakaveaga mitaki mo e tau aho ne tatali, kia toto atu e lautolu ke he moui tukulagi.

20 Timoteo na e, kia taofi e koe ke he mena ne tuku atu kia koe, kia kalo kehe mo e tau kupu kua kelea mo e nakai aoga, mo e tau taufetoko ke he tau mena kua fakahigoa pikopiko ai ko e iloilo;

21 Kua taofi ki ai e falu, ti hehe ai a lautolu ke he tua. Kia ha ha ia koe e fakaalofa noa. Amene.