Roma

14 KIA talia e mutolu a ia kua lolelole ke he tua, aua neke talia ke fakafili ai e tau mahalohaloaga.

2 Kua taofi e taha, kua lata ia ia ke kai e tau mena oti kana, ka ko ia kua lolelole kua kai lau kou a ia.

3 Ko ia kua kai aua neke fakalialia a ia kia ia kua nakai kai, aua neke fakafili e ia kua nakai kai kia ia kua kai; ha kua talia he Atua a ia.

4 Ko hai kia a koe kua fakafili atu ke he fekafekau he taha tagata? Kua tumau a ia po ke veli ke he hana ni a iki; ka e tumau ni a ia, ha kua maeke ke he Atua ke fakatumau a ia.

5 Kua manatu e taha, kua mua e taha aho ke he taha aho; ka ko e taha, kua manatu e ia kua tatai e tau aho oti kana. Kia takitokotaha mo e mauokafua hana ni a manatu.

6 Ko ia kua omaoma ke he aho, kua omaoma a ia ki ai ha ko e Iki; ko ia kua nakai omaoma ke he aho, kua nakai omaoma a ia ki ai ha ko e Iki; ko ia kua kai, kua kai a ia ha ko e Iki, ha kua fakaaue ke he Atua; ko ia foki kua nakai kai, kua nakai kai a ia ha ko e Iki, kua fakaaue foki a ia ke he Atua.

7 Ha kua nakai moui taha ia tautolu ha ko ia ni, ti nakai mate foki e taha ha ko ia ni;

8 Ha ko e mena ka momoui a tautolu, kua momoui ni ha ko e Iki, ka mamate a tautolu kua mamate ni ha ko e Iki; haia ni, po ke momoui, po ke mamate a tautolu, ko e tau tagata he Iki a tautolu.

9 Ha ko e mena ia ne matulei ai a Keriso, mo e liu foki tu mai ai, mo e moui ai, kia eke ai a ia mo Iki kia lautolu kua mamate, katoa mo lautolu kua momoui.

10 Ko koe na, ko e ha kia he fakafili ai e koe hāu a matakainaga? ko koe na, po ke ha kia he fakalialia ai e koe hāu a matakainaga? ha ko e mena tutu a tautolu oti kana ki mua he nofoa fakafili a Keriso.

11 Ha kua tohi mai, Kua pehe mai e Iki, Kua moui au, to fakatokotui mai kia au e tau tulihui oti kana, to tokutoku foki he tau alelo oti kana ke he Atua.

12 Hanai, to takitokotaha a tautolu mo e talatala atu hana mahani ke he Atua.

13 Hanai, aua neke liliu foki fefakafiliaki a tautolu; ka e mitaki ke manatu ke he mena nai, aua neke tuku age he taha ha mena ke tauveli ai, po ke mena ke tupetupe ai e matakainaga.

14 Kua iloa e au ti mau hoku manatu ke he Iki, ko Iesu, kua nakai fai mena kelea noa ni; ha ko ia kua manatu kua kelea e mena, ti kelea ai ni kia ia.

15 Kaeke ke mamahi e loto he matakainaga hau ha ko e hau a mena kai, kua nakai tuai mahani fakaalofa a koe; aua neke fakamalaia ke he hau a mena kai a ia ne matulei ai a Keriso.

16 Hanai, aua neke talahau kelea ha mutolu a tau mena mitaki.

17 Ha ko e kautu he Atua, nakai ko e mena kai ia, po ke mena ke inu; ka ko e tututonu, mo e mafola, mo e fiafia ke he Agaga Tapu.

18 Ha ko ia kua fekafekau atu kia Keriso ke he tau mena nai, kua fiafia kia ia e Atua, to talahaua mitaki a ia he tau tagata.

19 Haia ni, kia kumi fakamakutu e tautolu e tau mena ke tupu ai e mafola, mo e tau mena ke fefakamafanaaki ai.

20 Aua neke fakahui e gahua he Atua ha ko e mena kai; kua mitaki ni e tau mena oti, ka e kelea ke he tagata kua kai mo e fakatupetupe.

21 Kua mitaki ke nakai kai e kakano he tau manu, poke inu uaina, po ke eke taha mena ke tauveli ai, po ke tupetupe ai, po ke fakalolelole ai hāu a matakainaga.

22 Kua ha ha ia koe kia e tua? kia taofi ai e koe ni ki mua he Atua; uhoaki e tagata kua nakai fakahala e ia a ia ni ke he tau mena kua manatu ai e ia kua lata.

23 Ka ko ia kua mahalohalo, kaeke ke kai a ia ti fakahala a ia, ha ko e mena nakai ko e tua ne kai ai, ha ko e tau mena oti kana kua nakai tupu mai he tua, ko e hala haia.