Efeso

6 KO mutolu na, ko e tau fanau, kia omaoma ke he tau matua ha mutolu ke he Iki, ha ko e mena tonu ni haia.

2 Kia fakalilifu a koe ke he hau a matua tane, mo e hau a matua fifine, (ha ko e fakatufono fakamua haia ha ha i ai e talahauaga;)

3 Kia mitaki ai a koe, kia fakatuleva e tau aho hau ke nofo ai a koe ki luga he kelekele.

4 Ko mutolu foki, ko e tau matua tane, aua neke fakahogohogomanava ke he fanau ha mutolu, ka kia leveki ai ke he tau kupu akonaki mo e tau kupu fakamafana he Iki.

5 Ko mutolu na, ko e tau tupa, kia omaoma ke he tau iki ha mutolu ke he tino, mo e matakutaku mo e vivivivi, ke he loto fakamoli ha mutolu, tuga e omaoma kia Keriso;

6 Aua neke fekafekau fakapākau a mutolu, tuga ne fia fakafiafia ai e tau tagata, ka kia tuga e tau tupa a Keriso kua eke e finagalo he Atua ke he loto,

7 Mo e loto fakamakai ke fekafekau atu ai ke he Iki, nakai ke he tau tagata;

8 Kua iloa foki kaeke ke eke e taha ha mena mitaki, ti takitaha mo e moua mai he Iki e mena ke lata mo e hana mahani, po ke nofo fakatupa, po ke nofo pule a ia.

9 Ko mutolu foki ko e tau iki, kia eke e mutolu e tau mena ia ni kia lautolu, aua neke fakamatakutaku atu, kua iloa tuai e mutolu ha he lagi e Iki ha mutolu mo lautolu, kua nakai fakamailoga e ia e taha.

10 Haku a tau matakainaga na e, ko e kupu hanai kua toe, kia fakamalolo a mutolu ke he Iki ke he malolo he hana mana.

11 Kia tapulu a mutolu ke he tau tapulu tau katoa he Atua, kia maeke ia mutolu ke totoko atu ke he tau lagatau he tiapolo.

12 Ha ko e mena nakai tau a tautolu ke he tau tagata, ka ko e tau iki lalahi, mo e tau pule, mo e tau iki he pouli ha he lalolagi nai, katoa mo e tau agaga kelea ke he tau mena ha he lagi.

13 Ko e mena ia kia toto ai e mutolu e tau tapulu tau katoa he Atua, kia maeke ia mutolu ke totoko atu ka hohoko ke he aho kelea, ka oti e tau mena he eke e mutolu, ti tumau ai ni a mutolu.

14 Haia ni, kia tutu a mutolu mo e tau tokupu ha mutolu kua pipi ke he kupu moli, kia tapulu foki ke he ufi kahokaho ko e tututonu haia;

15 Kia ati foki ha mutolu a tau aloalohui ke he tauteaga he vagahau mitaki ke mafola ai;

16 Ka e mua hanai ke he tau mena oti, kia toto e akau punuti, ko e tua haia, kia maeke ai ke tamate e tau fana kaka oti hana kua kelea;

17 Kia eke foki e potiki tau ko e fakamouiaga haia, mo e pelu he Agaga ko e kupu he Atua haia;

18 Kia olelalo atu a mutolu ke he Agaga nakai noa ke he tau ole mo e tau liogi oti, kia leoleo ki ai a mutolu mo e fakamakamaka ai ke he tau liogi ma e tau tagata tapu oti kana,

19 Mo au foki, kia foaki mai e vagahau kia au ka fakamatala atu, kia malolo ai au ke fakailoa atu e mena galo he vagahau mitaki,

20 Ha ko e mena ia kua lili ai au ko e ogo, kia fakamalolo ai au ke fakamatala atu, tuga e mena kua lata ia au.

21 Ka kia iloa foki e mutolu e tau mena oti ha ia au, mo e tau mena kua eke e au, to fakailoa atu e Tuiko e tau mena oti kia mutolu, ko ia ni ko e matakainaga fakahele mo e fekafekau fakamoli foki ke he Iki.

22 Ko ia foki kua fekau atu e au kia mutolu ha ko e mena nai, kia iloa ai e mutolu po kua fefe a mautolu, kia fakamafana foki e ia ha mutolu a tau loto.

23 Kia ha ha he tau matakainaga e monuina mo e fakaalofa, katoa mo e tua mai he Atua ko e Matua, mo e Iki ko Iesu Keriso.

24 Kia ha i ai e fakaalofa noa ia lautolu oti kana kua fakaalofa tumau ke he Iki ha tautolu ko Iesu Keriso. Amene.