Hosea

2 KIA pehe atu a mutolu ke he tau matakainaga ha mutolu, Ama na e; kia pehe atu foki ke he tau mahakitaga ha mutolu, Ruama na e.

2 Kia taufetoko a mutolu mo e matua fifine ha mutolu, kia taufetoko a a mutolu mo ia; he nakai ko e hoana haku a ia, nakai ko e tane hana foki au; kia toka kehe e ia ia ia hana tau feuaki, mo e hana tau faivao foki mai he vaha he hana tau huhu;

3 Neke aaki e au ia ia hana tau tapulu, mo e tuku atu e au a ia ke tuga ne aho ne fanau ai a ia, mo e eke foki a ia ke tuga ne tutakale, mo e eke foki a ia po ke motu nakai fai vai, mo e tamate e au a ia he fia inu;

4 To nakai fakaalofa atu au ke he fanau hana, ha ko e fanau he faivao a lautolu.

5 Ha kua faivao e matua fifine ha lautolu, ko ia ne fanau a lautolu kua eke e tau mena ke ma ai; ha kua pehe mai a ia, To mui atu au kia lautolu oti kua manako mai kia au, kua ta mai e lautolu haku a tau mena kai, mo e haku a maga vai, mo e haku a tau fulu mamoe, mo e haku a tau lino, mo e haku a maga lolo, mo e haku a tau mena ke inu ai.

6 Ko e mena ia, kitiala, to puipui e au hau e puhala ke he tau akau mahukihuki, to eke foki e au e pa ke takai aki a ia, kia nakai kitia e ia hana tau puhala.

7 To mui atu a ia kia lautolu kua manako kia ia ka e nakai moua e ia a lautolu; to kumi e ia a lautolu, ka e nakai kitia; ti pehe age a ia, to fano au mo e liu atu au ke he haku a tane fakamua; ha ko e mena mua haku a monuina he vaha ia ke he monuina haku ke he vaha nai.

8 Ha kua nakai iloa e ia, ko au ni ne ta age kia ia e tau fua saito, mo e uaina, mo e puke lolo, ne fakalahi foki e au hana tau ario, mo e hana tau auro ne taute ai e lautolu ma Paala.

9 Ko e mena ia to liu atu au, mo e uta kehe e au haku a tau fua ke he vaha ke lata ai, mo e haku a uaina ke he hana ni a vaha; to uta kehe foki e au haku a tau fulu mamoe, mo e haku a tau lino, ne tuku atu ke ufiufi ai hana a nakai fai felevehi.

10 Hanai, to fakakite e au hana mahani matahavala ki mua ha lautolu ne manako kia ia, to nakai ha i ai foki taha ke laveaki a ia mai he lima haku.

11 To fakahiku ai foki e au hana fiafia oti ni, ko e hana tau galue, mo e hana tau mahina pula fou, mo e hana tau sapati, katoa mo e hana tau galue kotofa oti.

12 To fakaoti e au hana tau vine, mo e hana tau mati, ne pehe ai a ia, Ko e haku a taui ne ta mai kia au e lautolu kua manako kia au; to eke e au a ia mo vao motua, to kai ai he tau manu he vao.

13 Kua pehe mai a Iehova, To taui atu e au kia ia, ha ko e hana tau aho ne tapu kia Paala, ne huhunu ai e ia e tau mena manogi kia lautolu, ne taute ai foki a ia ke he hana mama tau ihu, mo e hana tau mena ke taute aki, ti mui atu a ia kia lautolu ne manako kia ia, ka e nimo au kia ia.

14 Ka e kitiala, ko au nai to ole e au kia ia, mo e takitaki a ia ke he tutakale, mo e fakamafana e au a ia.

15 To ta age foki e au kia ia hana tau ulu vine ke he mena ia, mo e pahua a Akori ke eke mo gutuhala ke amaamanaki ai; to tali mai foki a ia ke he mena ia, tuga he eke e ia ke he vaha ne tamāfine ai a ia, tuga foki he aho ne hau ai a ia he motu ko Aikupito.

16 Kua pehe mai a Iehova, To hoko ai ke he aho ia ke ui ai e koe au Ko Isi; to nakai ui foki e koe au Ko Paale.

17 Ha ko e mena to uta kehe e au he gutu hana e tau higoa a Paala, nakai tuai tokutoku ai a lautolu ke he tau higoa ha lautolu.

18 Ko e aho ia to eke ai e mautolu e maveheaga ha ko lautolu mo e tau manu he vao, mo e tau manu lele he pulagi, mo e tau mena totolo he kelekele; to fafati foki e au e kaufana mo e pelu, mo e tau, neke toka ai ke he motu, ko au foki ke tatakoto ai a lautolu mo e monuina.

19 To eke foki e taua mo au e maveheaga tukulagi; to eke foki e taua mo au e maveheaga mo e tututonu, mo e fakafiliaga, mo e totonu, mo e fakaalofa.

20 To eke ai e taua mo au e maveheaga mo e fakamoli; to iloa foki e koe a Iehova.

21 Kua pehe mai a Iehova, Ko e aho ia, to tali atu ai au, to tali atu au ke he lagi, ko ia foki to tali atu a ai ke he lalolagi.

22 To tali atu foki e lalolagi ke he tau fua saito, mo e uaina, mo e puke lolo; ko lautolu foki to tali atu a lautolu ki Isereelu.

23 To to e au a ia ke he kelekele ke eke maku; to fakaalofa atu foki au kia ia kua nakai tuai ofania; to pehe atu foki au kia lautolu kua nakai eke mo motu haku; Ko e haku a motu a koe, ti pehe mai a lautolu, Ko e ha mautolu a Atua a koe.