2 Nofoaga he Tau Patuiki

4 NE eke foki e ia e fatapoa apakula, ko e uafulu e kupita hana loa, ti uafulu e kupita hana laulahi, ti hogofulu foki e kupita hana tokoluga.

2 Ne eke foki e ia e takeleaga apakula ne hogofulu e kupita hana fafati , ke kamata mai he kala he taha fahi ke hoko atu ke he kala he taha fahi; ko e mena veliveli ni; ne lima e kupita hana tokoluga; ti tolugofulu e kupita e fafati ke takai aki a ia.

3 Ha ha i lalo hana foki e tau fakatai ke he tau povi ne takai ai, ne taki hogofulu ke he kupita taha, ne agaagai ai, ne takai ai e takaleaga. Ne atu ua e tau povi ne eke he eke ai e vai.

4 Ti fakaheke ai ki luga he tau povi ne hogofulu ma ua, ne fakahagao e tolu ke he fahi tokelau, ti fakahagao e tolu ke he fahi lalo, ti fakahagao e tolu ke he fahi toga, ti fakahagao e tolu ke he fahi uta, ha ha i luga foki ia lautolu e vai, ko e tau tua foki ha lautolu oti ha i loto ia.

5 Ko e hana matolu ne tatai ia mo e laulahi he aloalolima; ti eke hana kala tuga ne kala he kapiniu, ne eke ai e tau fiti talotalo; ko e hana liu foki ko e tolu e afe paita to puke.

6 Ne eke foki e ia e tau kumete apakula ne hogofulu; ti tuku e ia e lima ke he fahi matau, mo e lima ke he fahi hema, ke holoholo mena ai; ne fuifui ai e lautolu e tau mena ne eke aki e tau poa huhunu; ka ko e takeleaga ke koukou ai e tau ekepoa.

7 Ne eke foki e ia hogofulu e fakatuaga lamepa auro, ke lata mo e kotofaaga ki ai, mo e tuku ai ke he faituga ko e lima ke he fahi matau, ti lima ke he fahi hema.

8 Ti eke e ia hogofulu e laulau, mo e fakatoka ai ke he faituga, ko e lima ke he fahi matau, mo e lima ke he fahi hema. Ne eke foki e ia e tau kumete auro ikiiki ne taha e teau.

9 Ne eke foki e ia e lotopa he tau ekepoa, mo e lotopa lahi, mo e tau gutuhala he lotopa, ne fakakili aki foki e ia e tau gutuhala ke he apakula.

10 Ne tuku foki e ia e takeleaga ke he fahi matau ki uta, ne fakafehagai mo e fahi toga.

11 Ne eke foki e Hairamo e tau ulo mo e tau aku, mo e tau kumete ikiiki. Kua oti he eke a Hairamo e gahua ne eke e ia ma e patuiki ko Solomona mo e fale he Atua;

12 Ko e tau pou ua, mo e tau mena veliveli, mo e tau kapetala ha ha he tau hiku pou ua, mo e tau mena ua ne eke poke kupega ke ufi aki e tau mena veliveli ua he tau kapetala ua, ha ha he tau hiku pou;

13 Mo e fa e teau rimoni ke he tau mena ua ne eke po ke kupega; ne ua e atu rimoni ne eke ke he mena ne eke po ke kupega taha, ne ufi aki e tau mena veliveli ua, ha ha he tau kapetala ke he tau hiku pou.

14 Ne eke foki e ia e tau tuaga kumete, ne eke foki e ia e tau kumete ki luga he tau tuaga;

15 Ko e takeleaga ne taha, mo e tau povi hogofulu ma ua i lalo hana

16 Ko e tau ulo, mo e tau aku, mo e tau huki, katoa mo e ha lautolu a tau mena oti, ne eke ai he matua hana ko Hairamo he apakula kikila ma e patuiki ko Solomona ma e fale a Iehova.

17 Ne eke ai he patuiki e tau mena oti ia ke he kelekele tatai a Ioritana, ke he kelekele hemeri ke he vaha a Sukota mo Saretana.

18 Ne eke e Solomona e tau mena oti ia kua loga lahi ni; ko e mena nakai fafati ni e mamafa he tau apakula.

19 Ne eke e Solomona e tau mena oti ia he fale he Atua, ko e fatapoa auro, mo e tau laulau ha ha i luga ha lautolu e areto kua fakatokatoka i mua;

20 Ko e tau fakatuaga lamepa katoa mo e tau lamepa ha lautolu ne eke aki he auro mitaki, ke fakapuho ai ke lata mo e kotofaaga ki mua he mena ke vagahau mai ai;

21 Ko e tau fiti, mo e tau lamepa, mo e tau apita ne eke ai e ia ke he auro, ko e auro mitaki ue atu.

22 Ko e tau helehele vavae, mo e tau kumete ikiiki, mo e tau lehu, mo e tau kumete ma e tau efuefuafi ne eke ai e ia ke he auro mitaki. Ko e gutuhala he fale, ko e hana tau gutuhala i loto ke hu atu ai ke he mena tapu ue atu, katoa mo e tau gutuhala he fale, ko e faituga haia, ne eke aki he auro ia.