Tau Salamo

125 KO lautolu kua tua kia Iehova, tuga ne mouga ko Siona a lautolu, nakai gahuahua, ka e tumau tukulagi ni.

2 Ko e tau mouga kua agaagai a Ierusalema; ko Iehova foki kua agaagai hana tau tagata, kua kamata ainei, to hoko ke he tukulagi.

3 Ha ko e tokotoko he tau tagata mahani kelea nakai tumau ia ki luga he fonua he tau tagata tututonu; neke fakaolo atu e tau lima he tau tagata tututonu ke he taha mahani kelea.

4 Iehova na e, kia mahani mitaki a koe kia lautolu kua mahani mitaki, mo lautolu kua hakohako e tau loto ha lautolu.

5 Ka ko lautolu kua mafoki age ke he tau mahani keukeu, to takitaki e Iehova a lautolu fakalataha mo lautolu kua mahani hepehepe; kia ha ia Isaraela e monuina.