Esera

6 NE poaki age ai he patuiki ko Tariu, ti kumi ai e lautolu ke he fale tohi ne tatanaki ai e tau koloa i Papelonia.

2 Ti moua ai i Akemeta ke he kolo ha ha he fahi kautu a Metai e tohi vakai, ne tohi pehe foki ki loto hana e tau kupu ke fakamanatu ai,

3 Ko e tau fakamua he patuiki ko Kuresa ne poaki atu ai e Kuresa ko e patuiki ke he fale he Atua i Ierusalema, Kia ta e fale, ko e mena ne eke ai e lautolu e tau poa, mo e ati hake ai hana tau fakaveaga; ko e onogofulu e kupita hana tokoluga, ti onogofulu e kupita hana laulahi;

4 Ti atu tolu e tau maka lalahi, mo e taha atu he tau akau fou; kia uta foki e totogi mai he fale he patuiki;

5 Ko e tau mena auro foki mo e tau mena ario he fale he Atua ne uta e Nepukanesa mai he faituga ha i Ierusalema, mo e ta mai ai ki Papelonia, kia liuaki atu, mo e tuku atu ai ke he faituga ha i Ierusalema, ke takitaha e mena mo e tuku ai ke he mena ke toka ai ke he fale he Atua.

6 Hanai, Tatenai na e, ko e iki kua pule ke he fahi atu he vailele; Setara-posenai na e, mo lautolu ne pule fakalataha mo mutolu, ko e tau tagata Afareseka ha ha i ai ke he fahi atu he vailele, kia fakamamao a mutolu mo e mena na;

7 Kia tokai e gahua he fale na he Atua; kia ta ai he iki ne pule ke he tau tagata Iuta, mo e tau patu i Iuta e fale na he Atua ke he hana tuagafale.

8 Kua poaki atu foki e au e tau mena ke eke e mutolu ke he tau patu i Iuta kua eke ai e fale na he Atua, kia ta age fakaave ke he tau tagata ia e tau koloa he patuiki, ko e tau poa foki ia ke he fahi atu he vailele, ke palepale aki e gahua ke aua neke lekua ai a lautolu ke he gahua.

9 Ko e tau mena foki ne aoga kia lautolu, ko e tau punua povi, mo e tau mamoe tane, mo e tau punua mamoe, ke eke mo tau poa huhunu ke he Atua he lagi, ko e tau fua saito, ko e uaina, mo e puke lolo, ke lata mo e poaki he tau ekepoa i Ierusalema, kia ta age ia kia lautolu ke he taha aho mo e taha aho, aua neke noa;

10 Kia eke poa ai e lautolu ke he tau mena manogi ke he Atua he lagi, mo e liogi a lautolu kia moui e patuiki mo e hana tau tama tane.

11 Kua poaki atu foki e au, kaeke ke liliu kehe he taha tagata e kupu na, kia toho mai e akau he fale hana, kia ta hake foki a ia mo e fakamau ai a ia ki luga hana; kia eke foki hana fale mo toloaga veve ha ko e mena ia.

12 Ko e Atua foki ko ia ne fakamau ai hana higoa ke he mena ia, kia liti ki lalo e ia e tau patuiki oti katoa mo e tau motu, kua fakaolo atu e lautolu ha lautolu a tau lima ke liliu kehe ai e mena ia, ke moumou ai e fale na he Atua ha ha i Ierusalema. Ko au ko Tariu kua poaki atu; kia fakamalolo a ke eke ai.

13 Ti eke ai fakaave he iki ne pule ke he fahi mai nai he vailele, ko Setara-posenai mo lautolu ne pule fakalataha mo laua tuga ne fekau mai ai he patuiki ko Tariu.

14 Ti ati ai he tau patu Iuta e fale, ne eke ai e lautolu mo e monuina, ha ko e perofetaaga he perofeta ko Hakai, mo Sakaria ko e tama a Ito. Ne ati e lautolu e fale mo e fakaoti ai, ke lata mo e poaki a Kuresa, mo Tariu mo Aretaseta ko e patuiki a Peresia.

15 Ne mau ai e fale na ke he aho tolu he mahina ko Atara, ko e tau ono haia he eke ai a Tariu mo patuiki.

16 Ti eke ai e fakaulu fale he fale nai he Atua mo e fiafia, ne eke ai he fanau a Isaraela, ko e tau ekepoa, mo e tau tagata Levi, mo e tau tagata oti he paeaaga,

17 Ne eke ai foki e lautolu e tau poa ke he fakaulu fale he fale nai he Atua, ko e tau povi tane taha e teau, ko e tau mamoe ua e teau, mo e tau punua mamoe fa e teau; mo e tau koti tane ke eke mo poa ha ko e hala ha ko Isaraela oti ne hogofulu ma ua ia ke lata ka totou mo e tau magafaoa a Isaraela.

18 Ne kotofa foki e lautolu e tau ekepoa ke he tau vahega ha lautolu, mo e tau tagata Levi ke he tau vahega ha lautolu, ke eke ai e gahua he Atua, ha ha i Ierusalema, tuga he tohi ai ke he tohi a Mose.

19 Ne eke ai he tau tagata he paeaaga e paseka ke he aho hogofulu ma fa he mahina fakamua.

20 Ha kua fakamea ai fakalataha e tau ekepoa mo e tau tagata Levi, kua mea a lautolu oti, ne keli foki e lautolu e paseka ma e tau tagata oti he paeaaga, mo e tau matakainaga ha lautolu ko e tau ekepoa, katoa mo lautolu ni.

21 Ne kai ai foki e fanau a Isaraela ne liliu mai he paeaaga, mo lautolu oti ne vevehe mai kia lautolu mai he kelea he tau tagata kehe ha ha i ai ke he tau motu, ne kumi atu ai ke he Atua a Isaraela.

22 Mo e eke ai e lautolu e galue he tau areto nakai fakaea mo e fiafia ke he tau aho ne fitu; ha kua fakafiafia e Iehova a lautolu, ne fakamafoki mai foki e ia e loto he patuiki a Asuria kia lautolu ke fakamalolo ai e tau lima ha lautolu ke he gahua he fale he Atua, ko e Atua a Isaraela.