Esera
10 KUA liogi a Esera, mo e talahau ai ha lautolu a tau hala, kua tagi a ia mo e fakaveli fakafohifo ai ki mua he fale he Atua, ti fakapotopoto mai kia ia ia Isaraela e fakapotopotoaga lahi ni, ko e tau tane mo e tau fifine mo e tau tama ikiiki; ha kua tagi e motu mo e tagi lahi.
2 Ti tali mai ai a Sekania ko e tama a Ieielu mai he fanau a Elama, kua pehe mai kia Esera, Kua hala a mautolu ke he ha mautolu a Atua, ha kua faihoana a mautolu ke he tau fifine kehe mai he tau tagata he tau motu; ha ko e hanai, kua fai mena a Isaraela ke amaamanaki ai he tau mena ia.
3 Hanai, kia eke e tautolu e maveheaga mo e Atua ha tautolu, kia fakafano kehe e tautolu e tau hoana oti, mo lautolu ne fanau mai ia lautolu ke lata mo e pule hau ko e haku a iki, katoa mo lautolu ne matakutaku ai ke he tau poaki he Atua ha tautolu; kia eke ai foki ke lata mo e fakatufono.
4 Kia matike ā koe, ha ko e mena hāu hana, kua fakalataha foki a tautolu mo koe; kia fakamalolo ā mo e eke ai e koe.
5 Ti matike ai a Esera, mo e pehe age a ia ke omonuo e tau iki he tau ekepoa mo e tau tagata Levi, mo Isaraela oti ke eke ai e lautolu ke lata mo e kupu na. Ti omonuo ai a lautolu.
6 Ti matike a Esera mai mua he fale he Atua, mo e fina atu ai a ia ke he poko a Iohanana ko e tama a Eliasipa, kua hoko foki a ia ki ai ti nakai kai ai e ia e areto, nakai inu foki a ia ha maga vai, ha kua tagi ai a ia ha ko e tau hala ha lautolu he paeaaga.
7 Ti fakamatala ai e lautolu e kupu i Iuta mo Ierusalema ke he tau tagata oti, kia fakapotopoto mai ai a lautolu ki Ierusalema;
8 Ko lautolu oti foki kua nakai o mai ai ke he tau aho tolu ke lata mo e pule he tau iki mo e tau patu, to fofo ai hana tau koloa oti mo e vevehe kehe ai a ia he fakapotopotoaga ha lautolu he paeaaga.
9 Ti fakapotopoto mai ai e tau tagata oti a Iuta mo Peniamina i Ierusalema ke he tau aho tolu. Ko e hiva mahina haia, ko e aho uafulu he mahina; ne nonofo e motu oti ke he male ki mua he fale he Atua, kua vivivivi ha ko e mena na, katoa mo e uha lahi.
10 Ti tu ai a Esera ko e ekepoa kua pehe age a ia kia lautolu, Ko mutolu kua hala a mutolu, mo e fai hoana a mutolu ke he tau fifine he tau motu kehe ke lafi ai ke he hala a Isaraela.
11 Hanai, kia talahau atu ai e mutolu ha mutolu a tau hala kia Iehova ko e Atua he tau matua ha mutolu, mo e eke ai e mutolu hana finagalo, mo e vevehe kehe ai e mutolu e tau tagata he motu, mo e tau fifine he tau motu kehe.
12 Ti tali age ai e fakapotopotoaga oti, kua pehe age a lautolu mo e leo lahi, Tuga ne vagahau mai ai e koe kia mautolu to eke ai pihia e mautolu.
13 Ka kua tokologa e tagata, to lahi foki e uha ke he vaha nai, kua nakai maeke foki kia mautolu ke tutu i fafo; to nakai maeke foki e mena nai ke he aho taha, po ke aho ua, ha ko e tokologa ha mautolu kua holifono ke he mena nai;
14 Kia kotofa ai e tau iki ha mautolu ha ko e fakapotopotoaga oti, ko lautolu oti foki ha ha he tau maga ha mautolu kua fai hoana ke he tau fifine he tau motu kehe, kia o mai ai a lautolu ke he tau vaha kua kotofa, mo e fakalataha mo lautolu e tau patu he taha maga mo e taha maga, katoa mo e tau fakafili ha ha i ai, ato liu kehe ai ia mautolu e ita lahi he Atua ha mautolu ha ko e mena nai.
15 Ne kotofa ai ke he mena na a Ionatana ko e tama a Asaelu, mo Iekasia ko e tama a Tikeva ko laua ni hoko laua; ko Mesulama foki mo Sapetai ko e tau tagata Levi ne lagomatai ai kia laua.
16 Ne eke pihia foki he tau tagata he paeaaga. Ti vevehe kehe ai a Esera ko e ekepoa, mo e falu he tau tui ne mua ke lata mo e tau magafaoa he tau matua ha lautolu, ko lautolu oti foki ne talahau ai ha lautolu a tau higoa, ne nonofo ai foki a lautolu ke he aho fakamua he hogofulu mahina ke kumi ai e lautolu e mena na.
17 Ti fakahiku ai e lautolu he fakafili e tau tagata oti ne fai hoana ke he tau fifine he tau motu kehe ke he aho fakamua he mahina fakamua.
18 Ne kitia ai foki e tau tama he tau ekepoa ne fai hoana ke he tau fifine he tau motu kehe; ko e falu a tama a Iesua ko e tama a Iosataka mo e hana tau matakainaga, ko Maaseia, mo Elisara, mo Iaripi, mo Ketalia.
19 Ti tuku atu e lautolu ha lautolu a tau lima ke fakafano kehe ha lautolu a tau hoana; kua nonofo foki a lautolu mo e hala ti ta mai ai e lautolu e mamoe tane he fuifui mamoe ha ko e hala ha lautolu.
20 Ko e falu a tama foki a Imere; ko Hanani, mo Sapatia.
21 Ko e falu a tama a Harima; ko Maaseia, mo Elia, mo Semaia, mo Ikieli, mo Usia.
22 Ko e falu a tama a Pasura; ko Elioenai, ko Maaseia, ko Isamaeli, ko Natanielu, ko Iosapata, mo Eliasa.
23 Ko e falu he tau tagata Levi; ko Iosapata, mo Simei, mo Kelaia, ko Kelita haia, ko Petakia, ko Iuta, mo Elisara.
24 Mai ia lautolu ne uhu lologo; ko Eliasipa. Ko e falu foki ia lautolu ne leveki e tau gutuhala; ko Saluma, mo Telema, mo Auri.
25 Ko e falu foki ia Isaraela; ko e falu a tama a Parosi; ko Rameā, mo Iesia, mo Malekia, mo Meamina, mo Eleasaro, mo Malekia, mo Penaia.
26 Ko e falu a tama a Elama; ko Matania, ko Sakaria, mo Ieielu, mo Opeti, mo Ieremota, mo Elia.
27 Ko e falu a tama a Satu; ko Elionai, ko Eliasipa, ko Matania, mo Ieremota, mo Sapata, mo Asesa.
28 Ko e falu a tama a Pepai; ko Iohanana, ko Hanania, ko Sapai, mo Atalai.
29 Ko e falu a tama a Pani; ko Mesulama, ko Maluka, mo Ataia, ko Iasuvi, mo Sialu, mo Ramota.
30 Ko e falu a tama a Pakamoapi; ko Atena, mo Kila, ko Penaia, ko Maaseia, ko Matania, ko Pesaleli, mo Pinui, mo Manase.
31 Ko e tau tama foki a Harima, ko Elisara, ko Isea, ko Malekia, ko Semaia, mo Simeona.
32 Ko Peniamina, ko Maluka, ko Simaria.
33 Ko e falu a tama a Hasumu; ko Matanai, ko Matata, ko Sapata, ko Elipeleta, ko Ieremia, ko Manase, mo Simei.
34 Ko e falu a tama a Pani; ko Maatai, ko Amaramo, mo Ueli,
35 Ko Penaia, ko Petia, ko Kelui,
36 Ko Vania, ko Meremota, ko Eliasipa,
37 Ko Matania, ko Matenia, mo Iaasau,
38 Mo Pani, mo Pinui, ko Simei,
39 Mo Selemia, mo Natano, mo Ataia,
40 Ko Makenatipai, ko Sasai, ko Sarai,
41 Ko Asareelu, mo Selemia, ko Simaria,
42 Ko Saluma, ko Amaria, mo Iosefa.
43 Ko e falu a tama a Nepo; ko Ieielu, ko Matatia, ko Sapata, ko Sapina, ko Iatau, mo Ioelu, mo Penaia.
44 Ko lautolu oti ia ne fai hoana ai ke he tau fifine he tau motu kehe; ha ha i ai foki ke he falu ia lautolu e tau hoana ne fanau ai e lautolu e tau tama.