Iopu

27 TI taute foki e Iopu hana lauga, kua pehe age,

2 Kua moui e Atua, ko ia kua uta kehe haku a fakafiliaga, ko Ia hana e malolo oti kana, kua fakamamahi mai kia au.

3 Ko e tau aho oti ha ha ia au haku a moui, ha ha i ai foki ke he haku a tau poko ihu e fafagu he Atua.

4 Nakai ni vagahau haku tau laugutu ke he mena nakai tonu, to nakai vagahau foki haku alelo ke he mena fakavai.

5 Kia mamao ia au ke talahau ai e au kua tututonu a mutolu; ato hoko ke he aho ke mate ai au nakai toka e au haku a mahani hakohako.

6 Kua taofi e au haku a tututonu ke mau, nakai ni tiaki e au; to nakai eke fakakelea mai kia au he loto haku ke he tau aho oti haku.

7 Kia eke a ia kua fai fi mai kia au ke tuga ne tagata mahani kelea; ko ia foki kua tu mai kia au kia tuga ne tagata mahani hepehepe a ia.

8 Ko e mena pete he moua ai he tagata kolokolovao e tau mena ko e heigoa kia ne toe ke amaamanaki a ia ki ai ka uta kehe he Atua hana agaga?

9 To fanogonogo kia e Atua ke he hana tagi, ka hoko kia ia e matematekelea.

10 Kua fiafia kia a ia kia Ia hana e malolo oti kana? Kua ui atu kia a ia ke he Atua ke he tau aho oti?

11 To fakaako atu e au kia mutolu ke he lima he Atua; nakai fufu e au e tau mena ha ha ia Ia hana e malolo oti kana.

12 Kitiala, kua iloa e mutolu ko mutolu oti ni; ti kua mahani fakateaga pihia he ha a mutolu?

13 Ko e tufaaga hanai he tagata mahani kelea mai he Atua, ko e tufaaga foki he tau tagata favale ke moua e lautolu ia Ia hana e malolo oti kana.

14 Kaeke ke fakatokologa hana tau tama tane to eke a lautolu ma e pelu; to nakai makona foki hana fanau ke he tau mena kai.

15 Ko lautolu foki ne toe kia ia, to tanu a lautolu he mamate; to nakai tagi aue foki hana tau takape.

16 Pete he fakatumutumu ai e ia e ario tuga ne efuefu; mo e taute ai e tau tapulu ke tuga ne kelekele.

17 Kua taute e ia ka e tapulu ai a ia ne mahani tututonu, to tufatufa foki e ia e tau ario kia ia ne hakohako hana mahani.

18 Kua eke e ia hana fale tuga ne lefio, tuga ne fale api foki kua taute he leoleo.

19 Kua takoto a ia mo e loga ai hana tau koloa ka e nakai lafi atu a ia ke he hana tau matua; kua ala hana tau mata ti nakai ha ha i ai a ia.

20 Kua hohoko atu kia ia e tau mena ke matakutaku ai ke tuga ne tau vai, kua uta a ia he afa ke he po.

21 Kua havilia a ia he matagi uta ti fano ai a ia; kua havilia kehe a ia he hana mena ne nofo ai.

22 To fakahoko atu he Atua e tau mena kia ia, ka e nakai toka; ti fia hola kehe ni a ia he lima hana.

23 To pati lima e tau tagata kia ia mo e fakakatakatakē a lautolu kia ia ke hola ai a ia he mena ne nofo ai a ia.