Esoto

24 KUA pehe mai foki a ia kia Mose, Kia hake mai a mutolu kia Iehova, ko koe ni, mo, Arona, mo Natapu, mo Avihu katoa mo e tau patu tokofitugofulu a Isaraela, ti hufeilo fakamamao atu a mutolu.

2 Ko Mose hokoia ni ke fakatata mai kia Iehova, ka ko lautolu aua neke fakatata mai a lautolu; ti ua hake e motu fakalataha mo ia.

3 Ti fano ai a Mose mo e fakailoa ke he motu e tau kupu oti a Iehova mo e tau fakafiliaga oti. Ti tali mai ai e motu oti mo e leo taha kua pehe mai, Ko e tau mena oti kua talahau mai ai e Iehova, to eke ni e mautolu.

4 Ti tohi ai e Mose e tau kupu oti a Iehova, ti uhu matike mogoho pogipogi, mo e ati e fatapoa ki lalo he mouga, ti fakatu e tau pou maka ne hogofulu ma ua mo e tau magafaoa hogofulu ma ua a Isaraela.

5 Ti fakafano atu e ia e tau fuata he fanau Isaraela, kua eke poa e lautolu ke he tau poa huhunu, mo e eke poa fakaaue, ko e tau povi haia, kia Iehova.

6 Ti uta ai e Mose e taha maga he toto ne veveheua, mo e liligi ke he tau kapiniu; ka e taha maga he toto ne pīpī e ia ki luga he fatapoa.

7 Ne uta foki e ia e tohi he maveheaga mo e totou ki mua he motu; ti pehe mai a lautolu, Ko e tau mena oti kua talahau mai e Iehova, to eke e mautolu, mo e fanogonogo a mautolu ki ai.

8 Ti uta e Mose e toto mo e pīpī atu ke he motu, kua pehe, Kitiala, ko e toto hanai he maveheaga kua eke e Iehova mo mutolu ke he tau mena oti nai.

9 Ti hake ai a Mose mo Arona, ko Natapu mo Avihu, mo e tau patu a Isaraela ne tokofitugofulu.

10 Ti kitia ai e lautolu e Atua a Isaraela; ha i lalo he na ve hana e mena kua eke tuga ne tau maka safaira, tuga ne lagi ni hana kikila.

11 Kua nakai fakahoko atu foki e ia hana lima ke he tau iki he fanau a Isaraela; kua kitia e lautolu e Atua, kua kai mena foki a lautolu mo e inu.

12 Ti pehe mai a Iehova kia Mose, Kia hake mai a kia au ke he mouga, mo e nofo ai; to ta atu ai e au kia koe e tau lapa maka, mo e fakatufono mo e poakiaga kua tohi e au, ke fakaako ia kia lautolu.

13 Ti matike ai a Mose mo Iosua hana fekafekau; ti hake ai a Mose ke he mouga he Atua.

14 Ti pehe a ia ke he tau patu, Kia tatali mai a mutolu kia maua ki hinei ato liliu mai a maua kia mutolu; kitiala, ha ia mutolu a Arona mo Huro; kaeke ke ha i ai ia taha ha mena ke fakafili kia fano a ai kia laua.

15 Ti hake ai a Mose ke he mouga, ti ufia ai e mouga he aolagi;

16 Kua tumau foki e lilifu a Iehova ki luga he mouga ko Sinai, ono ni e aho ne ufia ai he aolagi; ko e aho fitu ne ui mai ai a ia kia Mose mai loto he aolagi.

17 Kua kitia ni e lilifu he Atua tuga ne afi puhopuho ke he tapunu mouga ki mua he fanau a Isaraela.

18 Ti fano a Mose ki loto he aolagi, ti kua hake ni ke he mouga; ha i ai a Mose ke he mouga fagofulu e aho ti fagofulu e po.