1 Korinito

2 KO au foki, ko e tau matakainaga na e, ne fina atu au kia mutolu nakai fina atu ai au mo e tau kupu kua mua ue atu, po ke iloilo he haku a fakamatala atu kia mutolu e talahauaga ke he Atua,

2 Ha ko e mena mau tuai haku a manatu, ke nakai iloa e au ha mena ia mutolu ka ko lesu Keriso ni, ko ia ne fakasatauro.

3 Ti ha ha i ai au ia mutolu mo e lolelole, mo e matakutaku, mo e vivivivi lahi.

4 Nakai taute foki haku a kupu, mo e haku a fakamatalaaga ke he tau kupu mitaki he iloilo he tau tagata, ka ko e fakakiteaga he Agaga mo e malolo;

5 Neke ha ha i ai ha mutolu a tua ke he iloilo he tau tagata, ka e nakai ko e malolo he Atua.

6 Ka kua vagahau atu a mautolu mo e iloilo kia lautolu kua katoatoa ai e loto matala, ka e nakai ko e iloilo he lalolagi nai, po ke iloilo he tau iki he lalolagi nai, ha ne mole atu.

7 Ka kua vagahau atu a mautolu ke he iloilo he Atua ke he mena galo ne ufia ai, ne kotofa fakamua ai he Atua ke he vaha nakai la kamata ai e tau hau, kia monuina ai a tautolu.

8 Ko e mena ia nakai iloa he taha iki taha he lalolagi nai, ha ko e mena ane mai iloa e lautolu po kua nakai fakasatauro e lautolu e Iki hana e monuina.

9 Ka e tuga e kupu kua tohi, Kua nakai kitia he tau mata, ai logona foki he tau teliga, ti nakai hoko foki ke he loto he tagata e tau mena kua taute he Atua ma lautolu kua fakaalofa kia ia.

10 Ka kua fakakite mai he Atua e tau mena ia kia tautolu ke he hana Agaga; ha ko e mena kumi hifo he Agaga e tau mena oti, ko e tau mena hokulo ia he Atua.

11 Ha ko hai taha tagata kua iloa e tau mena he tagata, ka ko e agaga hokoia he tagata ha ha i loto ia ia ni? kua pihia foki mo e tau mena he Atua kua nakai iloa e taha, ka ko e Agaga hokoia he Atua.

12 Ka kua moua e tautolu nakai ko e agaga he lalolagi nai, ka ko e Agaga mai he Atua, kia iloa ai e tautolu e tau mena kua foaki noa mai he Atua kia tautolu.

13 Ko e tau mena ia foki kua vagavagahau ai a tautolu ke he tau kupu kua fakaako mai he Agaga Tapu, ka e nakai ko e tau kupu kua fakaako mai he iloilo he tau tagata; kua fakamatala atu e tau mena he agaga ke he tau kupu he agaga.

14 Ka ko e tagata kua omaoma ke he tino, kua nakai talia e ia e tau mena he Agaga he Atua; ha ko e mena goagoa ia kia ia, ti nakai maeke ke iloa foki, ha ko e tau mena kua fakafili he agaga haia.

15 Ka ko e tagata kua omaoma ke he agaga, kua fakafili e ia e tau mena oti, ka kua nakai fakafili e taha a ia.

16 Ha ko hai kua iloa e finagalo he Iki ke fakaako atu a ia? Ka kua moua e tautolu e finagalo a Keriso.