Tau Salamo

81 KIA lologo atu a mutolu mo e leo lahi ke he Atua, ha tautolu a malolo; kia kalaga atu ke he Atua a Iakopo.

2 Kia uhu e lologo, kia ta e topā, ko e kitara leo mitaki, katoa mo e napeli.

3 Kia ulo e pu ke he aho ne pula fou ai e mahina, ke he aho ne kotofa ke eke ai e galue.

4 Ha ko e fakatufono hanai kia Isaraela, ko e pule he Atua a Iakopo.

5 Ne eke ia mo fakatufono kia Iosefa, ke he hana haele atu ke he motu ko Aikupito; ne fanogonogo ai au ke he vagahau kua nakai iloa e au.

6 Ne uta kehe e au e kavega mai he ua hana; kua toka kehe e kato mo e hana lima.

7 Ne ui mai a koe kia au ke he matematekelea, ti laveaki ai e au a koe; ne tali atu e au kia koe ke he mena galo ha i ai e pakulagi; ne kamatamata e au a koe ke he vai, ko Meripa, Sila.

8 Haku motu na e, kia fanogonogo mai, to talahau atu e au kia koe; Isaraela na e, kua mitaki ke fanogonogo mai a koe kia au;

9 Aua neke ha ia koe ha atua kehe; aua foki neke hufeilo a koe ke he atua he motu kehe.

10 Ko au ko Iehova, ko e hāu a Atua ne ta hake a koe mai he motu ko Aikupito; kia fakamaga fakalahi hāu a gutu, ti fakapuke ni e au.

11 Ka e nakai fanogonogo mai haku motu ke he leo haku; nakai loto foki a Isaraela kia au.

12 Ti tuku atu ai e au a lautolu ke he loto mao ha lautolu; ne o a lautolu ke he hala ne fifili ai e lautolu.

13 Mitaki ane fanogonogo mai haku motu kia au, ane o a Isaraela ke he tau puhala haku;

14 Po kua fakatokolalo vave e au e tau tagata kua fai fi kia lautolu, mo e fakahoko atu haku lima ke he tau tagata kua fai fi kia lautolu.

15 Po kua fakaheke fakatupua atu kia lautolu e tau tagata kua fakavihia a Iehova; to tukulagi ni ha lautolu a vaha.

16 Po kua fagai e ia a lautolu ke he saito kua mua e mitaki; to fakamakona ni e au a koe ke he meli mai he maka tumau.