Tau Salamo

82 KUA tu e Atua ke he fakapotopotoaga he Atua; kua fakafili e ia ki mua he tau atua.

2 To fakafili hepehepe e mutolu ato a fe? mo e talia a lautolu ne mahani kelea ato a fe? Sila.

3 Kia fakafili tonu e mutolu a lautolu ne lolelole, mo e nakai fai matua; kia talahau tututonu e mutolu a lautolu ne matematekelea mo e nonofogati.

4 Kia fakamomoui e mutolu a lautolu ne lolelole mo lautolu ne nonofogati; kia laveaki e mutolu a lautolu mai he lima he tau tagata mahani kelea.

5 Nakai iloa e lautolu, ti nakai manamanatu foki e lautolu; ti o a lautolu ke he hala pouli; kua luelue e tau fakaveaga oti he lalolagi.

6 Na pehe atu au ni, Ko e tau atua a mutolu; Ko mutolu oti foki ko e fanau hana kua Mua ue atu.

7 Ka e moli, to mamate a mutolu tuga ne tau tagata; to veveli foki a mutolu tuga ne taha iki.

8 Ko e Atua na e, kia tu mai a, kia fakafili e koe e lalolagi; ha ko koe ni ke eke māu e tau motu oti.