Tau Salamo

88 IEHOVA na e, ko e Atua he haku a fakamouiaga, kua kalaga atu au ki mua hāu ke he aho mo e po;

2 Kia hoko atu ki mua hāu haku a liogi; kia haga mai hāu a na teliga ke he haku a ui;

3 Ha kua puke haku a loto ke he tau mena ke mamahi ai; kua fakatata atu haku a moui ke he tukuaga.

4 Kua totou fakalataha au mo lautolu kua hifo ke he luo; tuga ne tagata nakai fai malolo au;

5 Kua toka noa au fakalataha mo e tau tagata mamate; tuga na lautolu kua keli kua takoto ke he tukuaga, ko lautolu kua nakai tuai manatu e koe; ko lautolu foki kua toka kehe mo e hāu a lima.

6 Kua tuku hifo e koe au ke he luo ki lalo ni, ko e tau mena pouli, ko e tau mena hokulo ni.

7 Kua mamafa hāu a ita ki luga ia au; ko e hāu a tau peau oti kua fakamamahi ai e koe au. Sila.

8 Kua uta fakamamao e koe ia au a lautolu ne mahani mo au; kua eke au mo mena fakalialia kia lautolu; kua puipui na au, ti nakai maeke ia au ke hu ki fafo.

9 Kua poko haku tau mata ha ko e matematekelea; Iehova na e, kua ui atu au kia koe ke he aho oti, kua fakaolo atu haku tau lima kia koe.

10 To eke mana kia e koe ma lautolu kua mamate? ke tutu mai kia a lautolu kua mamate ke fakaheke kia koe? Sila.

11 To talahaua kia hāu a fakaalofa ke he tukuaga? po ke talahaua hāu a fakamoli ke he mena ke mahakava ai?

12 To kitia kia hāu a mana ke he pouli? po ke kitia hāu a tututonu ke he motu ke nimo ai e tau mena?

13 Ka ko au, Iehova na e, kua kalaga atu au kia koe; to hake mua haku a liogi kia koe ke he magaaho pogipogi.

14 Iehova na e, ko e ha kia ne tiaki ai e koe au? ko e ha ne haga kehe ai hau a fofoga ia au?

15 Kua matematekelea au, kua eke ni ke mate au tali mai he vaha fuata; kua pehia au he hāu a tau mena matakutakuina; kua fakahahaku na au.

16 Kua hoko mai ki luga ia au hāu a ita lahi; kua mate au he tau mena matakutakuina hau.

17 Tuga ne vai ha lautolu a agaagai mai kia au ke he aho oti; kua puipui fakalataha e lautolu au.

18 Ko ia ne ofania mai katoa mo e kapitiga kua uta fakamamao e koe ia au, ha he pouli foki a lautolu ne mahani mo au.