Tau Salamo

75 KO e Atua na e, kua fakaheke atu a mautolu kia koe; to fakaheke atu ni a mautolu; ha kua tata mai hāu a higoa, kua talahaua hāu a tau mana.

2 Ha ko e mena ka hoko au ke he vaha ne kotofa ai, ti fakafili ai e au mo e tonu.

3 Kua liu puke vai tuai e lalolagi, katoa mo lautolu oti kua nonofo ai; ko au ni kua fakatumau hana tau pou. Sila.

4 Na pehe atu au kia lautolu ne goagoa, Aua neke mahani goagoa a mutolu; na pehe foki au kia lautolu ne mahani kelea, Aua neke fakatokoluga ha mutolu a hoe.

5 Aua neke fakatokoluga e mutolu ha mutolu a hoe; ti ua vagahau mo e ua mao.

6 Ha ko e mena nakai mai he fahi uta, po ke fahi lalo, ti nakai mai he vao ha i ai e tau mouga,

7 Ka ko e Atua ni ko e fakafili a ia; ko ia ni ne ta hifo taha ki lalo, ko ia foki ke ta hake taha ki luga.

8 Ha ko e mena ha ha he lima a Iehova e kapiniu, kua fiho ke he uaina kua puke ni ke he uaina fiofio; kua liligi atu foki e ia mai he kapiniu ia; ka ko e hana tau kele, to tatau ia ke fakainu aki e tau tagata mahani kelea oti he lalolagi.

9 Ka ko au, to totoku atu e au tukulagi; to uhu lologo e au ke he Atua a Iakopo.

10 Ko e tau hoe oti foki he tau tagata mahani kelea, to hehele kehe e au; ka e fakatu ki luga ni e hoe he tagata tututonu.