Ieremia

42 KUA fakatata mai e tau takitaki kau oti, mo Iohanana ko e tama a Karea, mo Iaasenaia ko e tama a Hosaia, mo e tau tagata oti, ko e tau lalo tagata katoa mo e tau iki,

2 Ti pehe mai a lautolu ke he perofeta ko Ieremia, Kia talia e koe ha mautolu a olelalo nai, ti liogi a e koe kia Iehova hau a Atua ma mautolu, ko mautolu oti nai ko e tau tagata ne toe; ha kua toe ai a mautolu tokogahoa mai he tau tagata tokologa, tuga ne fioia mai hau a na fofoga kia mautolu;

3 Kia fakakite mai e Iehova hau a Atua kia mautolu e puhala ke o ai a mautolu, mo e mena ke eke e mautolu.

4 Ti pehe atu e perofeta ko Ieremia kia lautolu, Kua fanogonogo ni au kia mutolu, kitiala, to liogi au kia Iehova ha mutolu a Atua ke lata mo e tau kupu ha mutolu; ko e tau kupu oti foki ke tali mai ai a Iehova kia mutolu to tala atu e au kia mutolu; nakai fufu e au ha kupu ia mutolu.

5 Ti pehe mai a lautolu kia Ieremia, kia eke a Iehova mo talahau moli mo e fakamoli kia tautolu kaeke ke nakai eke e mautolu ke lata mo e tau mena oti ne fakafano mai ai e Iehova hau a Atua a koe kia mautolu.

6 Po ke mitaki po ke kelea to fanogonogo ni a mautolu ke he leo a Iehova ha tautolu a Atua, kua fakafano atu e mautolu a koe kia ia; kia monuina a mautolu ka fanogonogo ai a mautolu ke he leo a Iehova ha tautolu a Atua.

7 Kua mole po hogofulu, ti hoko mai ai e kupu a Iehova kia Ieremia.

8 Ti ui ai a ia kia Iohanana ko e tama a Karea, mo e tau takitaki kau oti ha ha ia ia, mo e tau tagata oti, ko e tau lalo tagata katoa mo e tau iki;

9 Ti pehe atu a ia kia lautolu, Kua pehe mai e vagahau a Iehova, ko e Atua a Isaraela, ne fakafano atu e mutolu au kia ia, ke fakahoko atu ai ha mutolu a ole ki mua hana;

10 Kaeke ke nonofo ai a mutolu ke he motu nai, ti ati hake ai e au a mutolu, ka e nakai ulu ki lalo e au a mutolu; to to foki e au a mutolu, ka e nakai taaki e au a mutolu; ha kua tokihala au he kelea he eke e au kia mutolu.

11 Aua neke matakutaku a mutolu he patuiki a Papelonia, ne matakutaku a mutolu ki ai; ua matakutaku a mutolu kia ia, ha kua pehe mai a Iehova; ko e mena fakalataha au mo mutolu, ke fakamomoui a mutolu, mo e laveaki e au a mutolu mai he tau lima hana.

12 To fakaalofa atu au kia mutolu, kia ofania a mutolu e ia, ti liuaki e ia a mutolu ke he ha mutolu a kelekele.

13 Kaeke ke pehe mai a mutolu, Nakai nonofo a mautolu ke he motu nai, to nakai fanogonogo a mutolu ke he leo a Iehova ha mutolu a Atua,

14 Ke pehe a mutolu, Nakai ni; ka to o a mautolu ke he motu ko Aikupito, ti nakai kitia e mautolu e tau, mo e nakai logona ai e mautolu e leo he pu, to nakai hoge foki a mautolu ke he tau mena kai; ti nonofo ai a mautolu ke he mena ia;

15 Ko e mena ia kia fanogonogo mai ā mutolu ke he kupu a Iehova, ko mutolu ne toe i Iuta, kua pehe mai e vagahau a Iehova Sapaota, ko e Atua a Isaraela, Kaeke ke hagao taha ia mutolu ke o atu ki Aikupito, mo e o atu a mutolu ke api ai;

16 Ti moua ai a mutolu he pelu ne matakutaku ai a mutolu ke he mena ia, ke he motu ko Aikupito ni; ko e hoge foki ne fakaatukehe ai a mutolu, to mui atu ia kia mutolu ke he mena ia i Aikupito ni; ti mamate ai a mutolu ke he mena ia.

17 To pihia e tau tagata oti kua hagao a lautolu ke o atu ki Aikupito, ke api ai ke he mena ia; to mamate a lautolu ke he pelu, mo e hoge, mo e tatalu; to nakai toe taha ia lautolu, po ke hao taha he tau malaia ke fakahoko e au ki luga ha lautolu.

18 Ha kua pehe mai e vagahau a Iehova Sapaota, ko e Atua a Isaraela, Tuga he liligi hifo e au haku a ita mo e haku a ita lahi ki luga ha lautolu ne nonofo i Ierusalema, to liligi hifo pihia foki haku a ita ki luga ia mutolu, ka o atu a mutolu ki Aikupito; to eke foki a mutolu mo mena ke kaialu ki ai, mo mena foki ke ofo ai, mo mena foki kua tuku atu ke malaia, mo mena foki ke ekefakakelea ki ai; ti nakai kitia foki e mutolu e mena nai.

19 Kua vagahau mai a Iehova kia mutolu na ne toe i Iuta, Aua neke o a mutolu ki Aikupito; kia iloa ā e mutolu, kua tala atu ni e au kia mutolu ke he aho nai.

20 Ha kua fakahehe e mutolu a mutolu, he fakafano atu e mutolu au kia Iehova ha mutolu a Atua, kua pehe mai, Kia liogi a kia Iehova ha tautolu a Atua ma mautolu; tuga ne tau mena oti foki kua vagahau mai ai e Iehova ha tautolu a Atua, kia talahau mai pihia e koe kia mautolu, ti eke ai e mautolu.

21 Kua talahau atu foki e au kia mutolu ke he aho nai; ka e nakai fanogonogo a mutolu ke he leo a Iehova ha mutolu a Atua ke he taha mena taha ne fakafano mai e ia au kia mutolu.

22 Hanai, kia iloa e mutolu, to mamate a mutolu, ke he pelu, mo e hoge, mo e tatalu, ke he mena kua fia o atu ki ai a mutolu, ke api ai.