Ioane

8 KA e haele a Iesu ke he mouga ko Olive.

2 Ko e mahegihegi kua liu age ai a Iesu ke he faituga; kua o mai foki e motu oti kia ia; ti nofo hifo ai a ia mo e fakaako atu kia lautolu.

3 Kua takitaki he tau tohikupu, mo e tau farasaio e taha fifine ne moua kua faivao; kua toka e lautolu a ia ke he vaha loto;

4 Kua pehe age a lautolu kia ia, Ko e akoako na e, ko e fifine hanai kua moua a ia he faivao, kua iloa tonuhia.

5 Kua poaki mai ai e Mose kia tautolu ke he fakatufono, kia taulitimaka a lautolu ne pihia; ka ko koe ko heigoa hau a talahau ki ai?

6 Kua pihia age a lautolu ke ahi kia ia, kia moua e lautolu taha mena ke hokotoki ai a ia; ka kua tukutuku hifo a Iesu, mo e tohi he hana matalima ke he kelekele.

7 Ka kua hūhu mau atu ni a lautolu kia ia; ti nofo ai a ia ki luga, mo e pehe age kia lautolu, Ko e tagata ia mutolu nakai fai hala, kia liti fakamua taha maka kia ia.

8 To liu tukutuku hifo ai a ia mo e tohi ke he kelekele.

9 Kua logona ai e lautolu, kua iloa ha lautolu a tau hala ke he tau loto manamanatu ha lautolu; ati o ai a lautolu takitokotaha ki fafo kua kamata mai ia lautolu ne momotua, kua hoko atu ke he tagata fakamuiaki. Kua toe ni a Iesu hokoia, mo e fifine ha ne tu ke he vaha loto.

10 Kua nofo foki a Iesu ki luga, kua kikite atu, nakai fai tagata, ko e fifine ni hokoia, ati tala age ai a ia kia ia, Teme na e, ko fe kia a lautolu ne hokotaki a koe? Kua nakai kia fakahala mai e taha a koe?

11 Ti pehe age a ia, Ko e Iki na e, nakai fakai taha. Ti pehe age a Iesu kia ia, Nakai fakahala foki e au a koe; ati fano a a koe, aua neke liu a koe ke hala.)

12 Ti liu foki tala age a Iesu kia lautolu, kua pehe age, Ko au nai ko e maama he lalolagi; ko ia ke mui mai kia au, nakai fano a ia ke he pouli, ka e moua e ia e maama he moui.

13 Ati pehe mai ai e tau farasaio kia ia, Kua talahau ne koe a koe, nakai fakamoli hau a talahau.

14 Kua tala age a Iesu kia lautolu, kua pehe age, Kaeke ke talahau e au a au ti fakamoli ni haku a talahau; ha kua iloa e au e mena ne hau ai au, mo e mena ke fano au ki ai; ka kua nakai iloa e mutolu e mena ne hau ai au, mo e mena ke fano au ki ai.

15 Kua fakafili e mutolu fakalata ke he tino; ka e nakai fakafili e au taha.

16 Kaeke ke fiakafili e au, ti moli haku a fakafiliaga; ha kua nakai tokotaha ni au, ka ko maua katoa mo e Matua ne fekau mai au.

17 Kua tohi ke he fakatufono ha mutolu, Ko e moli e kupu ne talahaua he tokoua a tagata.

18 Ko au nei kua talahau e au a au, ha ne talahau foki au he Matua ne fakafano mai au.

19 Ti kua pehe age ai a lautolu kia ia, Ko fe e Matua hau? Kua tala age a Iesu, Nakai iloa e mutolu au, po ke haku a Matua; ane iloa e mutolu au, po kua iloa foki e mutolu haku a Matua.

20 Kua tala age a Iesu e tau mena ia ke he mena ne toka ai e tau tupe, he fakaako a ia ke he faituga; ti nakai tapaki ai e taha a ia ha ko e mena nakala hoko ke he hana vaha.

21 Ati liu foki tala age a Iesu kia lautolu, Kua fano kehe au, ti kumi e mutolu au, ka e mamate a mutolu ke he tau hala ha mutolu; nakai maeke ia mutolu ke o ke he mena ke fano au ki ai.

22 Ati tala age ai e tau tagata Iutaia, To kelipopo kia e ia a ia? he pehe mai a ia, Nakai maeke ia mutolu ke o ke he mena ke fano au kia ai.

23 Ti pehe age a ia kia lautolu, Ko mutolu ko lalo nai a mutolu, ko au mai luga au; ko mutolu ko e lalolagi nai a mutolu, nakai ko e lalolagi au nai.

24 Ko e mena ia ne tala atu ai au kia mutolu, To mamate a mutolu ke he tau hala ha mutolu; ha ko e mena ka nakai talia e mutolu, ko au hanai ko ia, ati mamate ai a mutolu ke he tau hala ha mutolu.

25 Ti pehe age ai a lautolu kia ia, Ko hai kia a koe? Ati tala age ai a Iesu kia lautolu, Ko au ne tala atu ai e au kia mutolu tali mai he kamataaga.

26 Loga e tau mena ha ha ia au ke talahau atu mo e fakafili kia mutolu; ka e fakamoli ni a ia ne fakafano mai au; ko e tau mena foki ne fanogonogo ai au ia ia, kua talahau e au e tau mena ia ke he lalolagi.

27 Nakai iloa e lautolu mena vagahau a ia kia lautolu ke he Matua.

28 Ati tala age ai a Iesu kia lautolu, Ka ta hake e mutolu e Tama he tagata, ti iloa ai e mutolu ko au hanai ko ia; nakai eke noa foki e au ha mena, ha ko e mena tuga ne fakaako mai he haku a Matua kia au, ko e tau mena ia ne tala atu ai e au.

29 Ko ia foki ne fakafano mai au, ha ha ia au a ia; nakai toka tokotaha au e Matua ha ko e mena eke mau e au e tau mena kua mitaki kia ia.

30 Kua vagahau a ia ke he tau mena ia, ati tokologa ai a lautolu ne talia a ia.

31 Ati tala age ai a Iesu ke he tau tagata Iutaia ne talia a ia, Kaeke ke tumau fakaoti a mutolu ke he haku a kupu, ko e tau tutaki moli haku a mutolu.

32 To iloa foki e mutolu e mena moli, ko e mena moli foki ke toka noa ai a mutolu.

33 Kua tala age a lautolu kia ia, Ko mautolu nai ko e fanau a Aperahamo, ti nakai fakatupa a mautolu kia taha tali he kamataaga, kua tala mai fefe a koe, To toka noa a mutolu?

34 Kua tala age a Iesu kia lautolu, Ko e moli, ko e moli, ke tala atu e au kia mutolu, ko e tagata kua hala ke he mena kua eke ko e tupa he hala a ia.

35 Ko e tupa foki, nakai nofo mau a ia ke he kaina, ko e tama to nofo fakaoti ai a ia.

36 Ko e hanai, ka toka noa he Tama a mutolu, kua toka noa fakamoli a mutolu.

37 Kua iloa e au ko e fanau a Aperahamo a mutolu; ka e kolo a mutolu ke kelipopo au, ha kua nakai tupu haku a kupu i loto ia mutolu.

38 Ko au nai, kua vagahau au ke he tau mena ne kitia e au ke he Matua haku; ko mutolu foki kua eke e mutolu e tau mena ne kitia e mutolu ke he matua ha mutolu.

39 Ti tala age ai a lautolu kia ia, kua pehe age, Ko Aperahamo ha mautolu a matua. Kua pehe age a Iesu kia lautolu, Kane mai ko e fanau a Aperahamo a mutolu po kua eke e mutolu e mahani a Aperahamo.

40 Ka kua kolo ainei a mutolu ke kelipopo au ko e tagata ne talahau atu kia mutolu e mena moli ne fanogonogo ai au mai he Atua, nakai eke pihia e Aperahamo.

41 Kua eke ni e mutolu e mahani he matua ha mutolu. Ati pehe age ai a lautolu kia ia, nakai ko e tau tama tohi a mautolu, ne taha ha mutolu a Matua, ko e Atua haia.

42 Ti pehe age ai a Iesu kia lautolu, Ane mai ko e Matua ha mutolu e Atua, po kua fakaalofa mai a mutolu kia au, ha ko e mena ne hau au mai he Atua, mo e hau ki hinai, ha ko e mena foki nakai hau noa au, ka ko ia ne fekau mai au.

43 Ko e ha kia nakai maama ai haku a vagahau kia mutolu? ha ko e mena nakai maeke ia mutolu ke fanogonogo ke he haku a kupu.

44 Ko mutolu, mai he matua ha mutolu ko e tiapolo ti kua fia eke e mutolu e tau mena kua manako ki ai e matua ha mutolu. Ko e keli tagata a ia tali mai he kamataaga, ti nakai tumau ni a ia ke he mena moli, ha kua nakai tokai i loto ia ia e mena moli; ka vagahau a ia ke he vagahau pikopiko, ko e hana ni a ia ke vagahau aki, ha ko e pikopiko a ia, mo e matua he pikopiko.

45 Ka ko au nai nakai talia e mutolu au, ha kua talahau atu e au e kupu moli.

46 Ko hai kia taha ia mutolu ke fakailoa mai haku a hala? Kaeke kua vagahau au ke he mena moli, ti ko e heigoa e mena nakai talia ai e mutolu au?

47 Ko ia mai he Atua, to fanogonogo a ia ke he tau kupu he Atua; ko e mena ia nakai fanogonogo ai a mutolu, ha ko e mena nakai mai he Atua a mutolu.

48 Ati tala age ai e tau tagata Iutaia, kua pehe age kia ia, Nakai kia tonu ha mautolu a kupu, ko e tagata Samaria a koe, to ha ha ia koe e temoni?

49 Kua tala age a Iesu, Nakai ha ha ia au e temoni; ka e fakalilifu au ke he haku a Matua; kua nakai fakalilifu foki a mutolu kia au.

50 Ka e nakai kumi e au haku a fakahekeaga; ko e taha ha ne kumi, ha ne fakafili foki.

51 Ko e moli, ko e moli, ke tala atu e au kia mutolu; kaeke ke omaoma taha ke he haku a kupu, nakai tuai iloa tukulagi e ia e mate.

52 Ati tala age ai e tau tagata Iutaia kia ia, Kua iloa tuai e mautolu ainei ha ha ia koe e temoni; kua mate a Aperahamo mo e tau perofeta, ka e pehe mai a koe, Ka omaoma taha ke he haku a kupu, ti nakai tuai iloa tukulagi e ia e mate.

53 Kua mua kia a koe ke he matua ha mautolu, ko Aperahamo kua mate, kua mamate foki mo e tau perofeta; po ko hai kia a koe ne talahau noa ai ni e koe a koe?

54 Kua tala age a Iesu, Kaeke ke fakaheke noa au kia au, ti nakai aoga haku a fakahekeaga; ko e Matua haku ko ia ni kua fakaheke kia au, kua pehe mai a mutolu, ko e Atua ia ha mutolu.

55 Ti nakai iloa e mutolu a ia, ka kua iloa ni e au a ia; kaeke foki ke pehe atu au, nakai iloa ni e au a ia, ti eke ai au mo pikopiko tuga a mutolu; ka kua iloa ni e au a ia, kua omaoma foki au ke he hana kupu.

56 Ko Aperahamo ha mutolu a matua ne fiafia lahi a ia kia kitia ai haku a vaha, kua kitia foki e ia, mo e kolikoli ki ai.

57 Ti pehe age ai e tau Iutaia kia ia, Nakaila limagofulu hāu a tau tau, po kua kitia kia e koe a Aperahamo?

58 Kua pehe age a Iesu kia lautolu, Ko e moli, ko e moli, ke tala atu e au kia mutolu, ha i ai au nei, ka e nakala tupu mai a Aperahamo.

59 Ti toto ai e lautolu e tau maka, ke tauliti aki a ia; ka e fakamumuli ai a Iesu kua hu ki fafo he faituga, kua fina age ke he vaha loto ha lautolu, mo e haele kehe ai.