2 Tesalonia

Ko e Tohi Ua a Paulo ke he Tau Tagata Tesalonia

1 KO e tohi hanai ha mautolu ko Paulo, mo Siluano, mo Timoteo, ke he ekalesia he tau tagata Tesalonia, ha he Atua ko e Matua ha tautolu, mo e Iki ko Iesu Keriso.

2 Kia ha ha ia mutolu e fakaalofa noa, mo e monuina mai he Atua ko e Matua ha tautolu, mo e Iki ko Iesu Keriso.

3 Kua lata kia mautolu, ke fakaaue nakai noa ke he Atua ha ko mutolu, ko e tau matakainaga na e, kua lata he pihia ha kua tupu lahi ni ha mutolu a tua, kua fakalahi foki ha mutolu a feofanaki, ko mutolu oti kana takitokotaha.

4 Ko e haia, ko mautolu nai, kua hula a mautolu kia mutolu ke he tau ekalesia he Atua, ha ko e fakauka mo e tua ha mutolu kua fakauka ai a mutolu ke he tau mena favale oti ne hoko kia mutolu, mo e tau mena matematekelea;

5 Ko e fakamailoga ia he fakafiliaga tonu he Atua, kia talahaua ai a mutolu kua lata mo e kautu he Atua, ko e mena ia kua mamahi ai a mutolu;

6 Kaeke ko e mena tonu ke he Atua ke taui atu e matematekelea kia lautolu kua matematekela ai a mutolu;

7 Kia mutolu foki kua matematekelea, e okiokihaga fakalataha mo mautolu, ka fakakite mai e Iki ko Iesu mai he lagi, fakalataha mo e tau agelu he hana malolo,

8 Ke he afi puhopuho, ke taui atu kia lautolu kua nakai iloa e Atua, mo lautolu kua nakai omaoma ke he vagahau mitaki he Iki ha tautolu ko Iesu Keriso;

9 Ko lautolu ni ke fakahala ke he mahaikava tukulagi kia o kehe mo e Iki, mo e lilifu he hana malolo;

10 Ka haele mai a ia kia fakaheke ai a ia ke he hana tau tagata tapu, to ofo kia ia ke he aho ia a lautolu oti kua tua, ha kua talia e mutolu ha mautolu a talahau atu.

11 Ko e mena foki ia, kua ole atu ai a mautolu nakai noa ma mutolu, kia talahaua ai a mutolu he Atua ha tautolu kua lata ni mo e uiaga ha mutolu, kia fakakatoatoa foki e ia mo e malolo e loto oti ke he mahani mitaki, mo e gahua he tua mo e malolo;

12 Kia fakaheke ai ke he higoa he Iki ha tautolu ko Iesu Keriso ia mutolu, ko mutolu foki ia ia, ke lata mo e fakaalofa noa he Atua ha tautolu, mo e Iki ko Iesu Keriso.