Isaia

34 KIA fakatata mai ā mutolu ko e tau motu kehe, ati fanogonogo mai a; ko mutolu foki ko e tau motu, kia haga mai ā mutolu; fanogonogo mai ā ko e lalolagi na e mo e tau mena ne puke ai, ko e atu motu mo e tau mena oti ne tutupu mai ai.

2 Ha kua ha ha i luga he tau motu kehe oti e ita a Iehova, ko e hana ita lahi foki ha ha he tau kau oti ha lautolu; kua tuku atu e ia a lautolu ke malaia, kua tuku atu e ia a lautolu ke kelipopo ai.

3 To tiaki ai e tau tagata ha lautolu kua keli, to hake ai foki e elo he tau tino mamate ha lautolu, to tafia ai e tau mouga ke he toto ha lautolu.

4 To mole atu foki e tau kau oti he lagi, to vakai ai e lagi tuga ne tohi; to mokulu ai ha lautolu a tau kau oti ni, tuga ne mokulu ai e tau lau he vine, tuga ne mokulu ai e tau lau he mati.

5 Ha kua konahia haku a pelu ke he lagi; kitiala, to hifo a ia ki luga a Etoma, ki luga ni he motu kua tuku atu e au ke malaia, ke fakahala aki a lautolu.

6 Ha ha ia Iehova e pelu, kua makona ai ke he toto; kua fakatakai ai ke he gako; ko e tau toto he tau punua mamoe mo e tau koti, ko e gako ha ha he tau fua he tau mamoe tane; ha ko e mena ha ha ia Iehova e poa i Posara, mo e keliaga lahi ke he motu ko Etoma.

7 To hifo foki e tau rema fakalataha mo lautolu, mo e tau punua povi tane fakalataha mo e tau povi tane; to konahia ha lautolu a kelekele ke he toto; to fakagako ai foki ha lautolu a efuefu ke he gako.

8 Ha ko e mena ha ha ia Iehova e aho ke lalago ai; ko e tau ke taui atu ai kia lautolu ne fetoko mo Siona.

9 To liliu ai mo safeta hana tau vailele; to liliu foki mo taio hana efuefu, to eke foki hana kelekele mo safeta kua vela.

10 Nakai mate e afi ke he po mo e aho; to hake ai tukulagi hana ahua; to eke ia mo mena kua tiaki ke hahau mo hahau, to nakai fina age ai taha tukulagi tukumuitea.

11 Ka e eke ai ma e tau kati mo e tau kefota; to nonofo ai foki e tau inesofe mo e tau oreva; to toho ai foki ki luga hana e fua ke eke a ia mo mena toka noa, mo e tau maka he fua tautau ke fakaoti ai a ia.

12 To nakai ha i ai foki hana tau iki kua kotofa e lautolu ke pule; ko e hana tau iki lalahi nakai tuai ha i ai taha ia lautolu.

13 To tutupu hake e tau akau mahukihuki ke he hana tau fale iki, to tutupu ai foki e tau lakau magiho mo e tau akau talatala ke he hana tau kolo; to eke foki mo mena ke nonofo ai e tau luko, mo e mena ke nonofo ai e tau iaena.

14 To feleveia ai e tau manu favale he vao mo e tau aie; to feheaaki foki e tau koti he vao, to nofo fakatekiteki ai e lilita, ti moua ai e ia e mena ke okioki ai.

15 To eke ai he kefosa hana ofaga mo e fakato ai hana tau fufua, mo e fakapāpā ai, ti fakapotopoto ai e ia e tau punua ki lalo hana ata, to fakapotopoto ai foki e tau taē takiua.

16 Kia kumi a ke he tohi a Iehova, mo e totou ai, to nakai fakahiku noa taha ia lautolu; to nakai ha i ai taha kua galo hana hoa; ha ko e hana fofoga kua poaki mai ai, ko e hana agaga foki ke fakapotopoto ai a lautolu.

17 Ko ia foki ne eke e vili ma lautolu, ko e hana lima ne tufatufa ai ma lautolu ke he fua toho; ke eke ai ma lautolu tukulagi, to nonofo ai a lautolu ke hahau mo hahau.