Heperu

2 KO e mena ia, kua lata ai ke au atu ai he manamanatu a tautolu ke he tau mena kua fanogonogo a tautolu ki ai, neke tafia kehe ai a tautolu a taha aho.

2 Ha ko e mena kaeke kua mau e kupu ne vagahau mai ai he tau agelu, takitaha foki e hala mo e liuliu kua hoko ki ai e taui kua lata mo ia,

3 To hao fefe a tautolu kaeke ke fakateaga a tautolu ke he fakamouiaga kua lahi ni? ne talahau mai ai fakamua he Iki, ti fakamoli ai kia tautolu e lautolu ne fanogonogo kia ia.

4 Kua fakamoli foki he Atua fakalataha mo lautolu ke he tau fakamailoga, mo e tau mena ke ofo ai, mo e tau mena kehekehe, mo e tau mena fakaalofa mai he Agaga Tapu ke Iata mo e hana finagalo.

5 Ha ko e mena nakai tuku atu ai e ia ke he tau agelu e pule ke he vaha nakaila hoko mai, kua vagahau atu ai a mautolu;

6 Ka kua fakakite mai he taha ke he taha kupu, kua pehe mai, Ko heigoa kia e tagata kia manatu mai ai a koe kia ia; po ke tama he tagata kia ahi mai ai e koe a ia?

7 Kua eke e koe a ia toe tote ti lata mo e tau agelu, kua fakafoufou foki e koe a ia ke he fakahekeaga mo e lilifu, kua kotofa foki e koe a ia ke pule ke he tau gahua he hau a tau lima.

8 Kua tuku hifo foki e koe e tau mena oti ki lalo he na hui hana. Hanai, ko e vaha ne tuku hifo ai e ia e tau mena oti ki lalo hana, nakai toka e ia ha mena taha kua nakai tuku hifo ai kia ia; ka ko e ainei kua nakaila kitia e tautolu e tau mena oti kua tuku hifo kia ia.

9 Ka kua iloa e tautolu a ia ne eke ke toe tote ti lata mo e agelu, ko Iesu ia, kua fakafoufou a ia ke he fakahekeaga mo e lilifu, ha ko e mamahi he mate, kia hoko kia ia e mate ha ko e tau tagata oti kana ke he fakaalofa noa he Atua.

10 Ha ko ia kua eke e tau mena oti māna, kua eke foki e tau mena oti e ia, kua lata kia ia he takitaki e tau tama tokologa ke he monuina, ke fakakatoatoa ai e Iki he fakamouiaga ha lautolu ha ko e tau matematekelea.

11 Ha ko ia kua fakatapu katoa mo lautolu oti kua tapu, taha maka ni ha lautolu a tupuna, ko e mena haia kua nakai mā ai a ia ke totoku a lautolu ko e tau matakainaga,

12 Kua pehe mai, To talahau atu e au hau a higoa ke he tau matakainaga haku, to lologo fakaheke au kia koe ki mua he ekalesia.

13 Kua pehe mai foki, To tua au kia ia; mo e taha kupu foki, Kitiala, ko au hanai mo e tau fanau kua foaki mai he Atua kia au.

14 Hanai, ha kua ha ha he tau fanau e tino he tagata moui, pihia foki he ha ia ia, kia fakaoti ai e ia ke he hana matulei a ia ne toka ai e kautu ke mate ai, ko e tiapolo haia;

15 Kia toka noa ai foki a lautolu oti kua fakatupatupa he matakutaku ke he mate ke he mouiaga katoa ha lautolu.

16 Ha ko e moli, nakai lagomatai a ia ke he tau agelu, ka kua lagomatai a ia ke he tau fanau a Aperahamo.

17 Ko e mena ia kua lata ai ke eke a ia tuga hana tau matakainaga ke he tau mena oti ni, kia eke ai a ia mo ekepoa ne mua kua fakaalofa, mo e fakamoli ke he tau mena he Atua, kia eke a ia mo lukutoto ha ko e tau hala he tau tagata.

18 Ha kua kamatamata a ia ke he tau mena ne mamahi ai, ti maeke ai ia ia ke lagomatai mai kia lautolu kua kamatamata.