Iosua

8 KUA pehe mai a Iehova kia Iosua, Ua matakutaku a koe, ti ua fakaatukehe, kia uta e koe e tau tagata tau oti fakalataha mo koe, ti matike a, mo e o hake a mutolu ki Ai; kitiala, kua tuku atu e au ke he hau a lima e patuiki a Ai, mo e hana tau tagata, mo e hana maga, mo e hana kelekele.

2 Ti eke e koe kia Ai, mo e hana patuiki, tuga ne eke e koe kia Ieriko mo e hana patuiki, ka ko e tau mena kua fofo he tau mo e tau manu ha ha i ai, to eke mo mena kua fofo he tau ma mutolu. Ti kotofa e koe e kau ke tatao ai ki tua he maga.

3 Ti matike a Iosua, mo e tau tagata tau oti, ke o hake ki Ai; ne fifili foki e Iosua e tau toa malolo ne tolugofulu e afe e tagata, mo e fakafano atu e ia a lautolu ke he po.

4 Ti poaki atu e ia kia lautolu, kua pehe atu, Kitiala, kia tatao e kau ha mutolu tata age ke he maga ki tua he maga; aua neke fakamamao a mutolu mo e maga, ka e nonofo tauteute ai a mutolu oti ni.

5 Ka ko au mo e motu oti kua fakalataha mo au, to fakatata atu a mautolu ke he maga; ka o mai foki a lautolu ke fonofono a mautolu ke tuga ne tau fakamau, ti fehola ai a mautolu ki mua ha lautolu;

6 (Ha ko e mena o mai a lautolu kia mautolu,) ato futi mai e mautolu a lautolu he maga; ha ko e mena to pehe a lautolu, Kua fehola a lautolu ki mua ha tautolu tuga ne aho fakamua; ko e mena ia ke fehola ai a mautolu ki mua ha lautolu.

7 Ti mamatike a mutolu mai he mena kua tatao ai, mo e eke ma mutolu e maga; ha ko e mena to tuku mai ai e Iehova ha mutolu a Atua ke he lima ha mutolu.

8 Ka moua e mutolu e maga, ti huhunu e mutolu e maga ke he afi; kia eke e mutolu ke lata mo e kupu a Iehova; kitiala, kua poaki atu e au kia mutolu.

9 Kua fakafano atu e Iosua a lautolu, ti o ai a lautolu ke tatao a lautolu; kua nonofo a lautolu ke he vaha a Peteli mo Ai, ke he fahi lalo a Ai, ka e mohe ai a Iosua fakalataha mo e motu ke he po ia.

10 Kua uhu matike a Iosua ke he magaaho pogipogi, kua totou e ia e motu, ti o hake a lautolu ki Ai, ko ia mo e tau patu Isaraela ne mumua atu ke he motu.

11 Ti o hake e kau oti ko e tau tagata tau ha ha ia ia, kua tata atu a lautolu ke he maga, kua hoko ni a lautolu ki mua he maga, ti he api ai a lautolu ke he fahi tokelau he maga; ka ko e pahua ke he vaha loto ha lautolu mo Ai.

12 Ti uta ai e ia e tau tagata ne lima e afe, mo e kotofa a lautolu ke tatao ke he vaha loto a Peteli mo Ai, ke he fahi lalo he maga.

13 Kua kotofa ai foki e lautolu e motu, ko e kau oti ha ha he fahi tokelau he maga, mo lautolu ne tatao ke he fahi lalo he maga, ti fano ai a Iosua ke he po ia ke he loto pahua.

14 Kua kitia he patuiki a Ai, ti uhu mai fakaave a lautolu; ti o age e tau tagata he maga ke fonofono a Isaraela ke tau, ko ia katoa mo e hana motu oti ke he magaaho kua kotofa ai, ke he kelekele tatai, ka e nakai iloa e ia e kau ne tatao ai ki tua he maga ke tau mo ia.

15 Ti mahala fakatupua a Iosua, mo Isaraela oti ki mua ha lautolu; mo e fehola ai a lautolu he hala ke he vao.

16 Ti fakapotopoto ai e tau tagata oti i Ai ke tutuli atu kia lautolu; kua tutuli atu a lautolu kia Iosua, ti futia mai ai a lautolu he maga;

17 Nakai toe ai ha tagata i Ai mo Peteli, kua nakai mui atu kia Isaraela; kua toka noa foki e lautolu e maga, mo e tutuli atu kia Isaraela.

18 Ti pehe mai a Iehova kia Iosua, Kia fakaolo atu e koe e tao ha ha he lima hau ki Ai; ha kua tuku atu e au a ia ke he hau a lima. Ti fakaolo atu ai e Iosua e tao ha ha he lima hana ke he maga.

19 Ti laga alumaki ai e kau ne tatao, mai he mena ne ha i ai a lautolu, mo e tafepoi atu a lautolu ha kua fakaolo tuai e ia hana lima; ti huhu atu a lautolu ke he maga, mo e eke ai ma lautolu, ti fakaave a lautolu mo e huhunu ai e maga ke he afi.

20 Ti haga ki tua he tau tagata Ai, to kitia e lautolu, kitiala, kua hake ai e ahua he maga ke he lagi; ti nakai tuai maeke a lautolu ke fehola ke he taha fahi mo e taha fahi; ko e tau tagata foki ne fehola atu ke he vao, kua liliu mai a lautolu mo e tutuli atu kia lautolu.

21 Kua kitia e Iosua mo Isaraela oti, kua moua tuai he kau ne tatao e maga, ti hake ai e ahua he maga; ti liliu mai ai a lautolu mo e keli e tau tagata Ai.

22 Kua o mai foki a lautolu he maga ke fonofono a lautolu ha ha he vaha loto a Isaraela a lautolu, ko e falu ke he taha fahi mo e falu ke he taha fahi; ti keli e lautolu a lautolu nakai toe taha, nakai ni hao ai taha ia lautolu.

23 Kua tapaki moui e lautolu e patuiki a Ai, ti uta e lautolu a ia kia Iosua.

24 Kua oti he keli he tau tagata Isaraela e tau tagata oti ne nonofo i Ai, ke he fonua mo e vao ne tutuli ai e lautolu a lautolu; kua keli a lautolu oti ke he pelu, kua fakaoti ai a lautolu, ti liu mai a Isaraela oti ki Ai, mo e keli ai a lautolu ke he pelu.

25 Ko lautolu oti ne mamate he keli ke he aho ia, ko e tau tane katoa mo e tau fifine, ne hogofulu e afe ti ua e afe tagata, ko e tau tagata oti i Ai.

26 Ha ko e mena nakai liuaki mai e Iosua hana lima ne fakaolo atu mo e tao, ato fakaotioti ni e ia a lautolu oti ne nonofo i Ai.

27 Ka ko e tau manu, mo e tau mena he maga kua fofo ke he tau, ne uta ai e Isaraela ma lautolu, ke lata mo e kupu a Iehova ne poaki atu ai e ia kia Iosua.

28 Ti huhunu e Iosua a Ai, kua eke foki a ia mo tumutumu tukulagi, ti vao ai ni ke hoko mai ke he aho nai.

29 Ti tautau ai foki e ia e patuiki a Ai ke he akau ato hoko ke he afiafi; kua to e la, ti poaki atu e Iosua kia lautolu ke ta hifo hana tino he akau, mo e liti a ia ke he mena ne hu atu ai ke he gutuhala he maga, mo e fakapotopoto ai ki luga hana e tanakiaga maka lahi, kua hoko mai ke he aho nai.

30 Ti ati ai e Iosua e fatapoa kia Iehova, ko e Atua a Isaraela, ke he mouga ko Evalu,

31 Tuga ne poaki mai ai e Mose ko e fekafekau a Iehova ke he fanau a Isaraela, tuga ne tohia ke he tohi he fakatufono a Mose, kia ati aki e fatapoa ke he tau maka ai pihia, aua neke ta aki ke he lapatoa; ti eke ai e lautolu ki luga hana e tau poa huhunu kia Iehova, ti eke ai foki e lautolu e tau poa fakaaue.

32 Ti tohi ai e ia ke he mena ia ki luga he tau maka, e tohi he fakatufono a Mose, ne tohi ai e ia ki mua he fanau a Isaraela.

33 Ko Isaraela oti foki, mo e tau patu ha lautolu, mo e tau iki, mo e ha lautolu a tau fakafili, ne tutu a lautolu ke he taha fahi, mo e taha fahi he puha ki mua he tau ekepoa ko e tau tagata Levi ne uta ai e puha he maveheaga a Iehova; ko e tagata kehe katoa mo e tagata ne fanau ai ke he motu; ne fehagai taha vahega ha lautolu mo e mouga ko Keresema; mo e fehagai e taha vahega ha lautolu mo e mouga ko Evalu; tuga ne poaki mai ai ne aho mua e Mose ko e fekafekau a Iehova, kia fakamonuina ai e lautolu ke he motu ko Isaraela.

34 Kua mole atu ia ti totou ai e ia e tau kupu oti he fakatufono, ko e monuina mo e malaia; ke lata mo e tau mena oti kua tohia ke he tohi he fakatufono.

35 Nakai fai kupu he tau kupu oti ne poaki mai e Mose, kua nakai totou ai e Iosua ki mua he fakapotopotoaga oti a Isaraela, mo e tau fifine, mo e tau tama ikiiki, mo e tau tagata kehe ne o mo lautolu.