1 Korinito

11 KIA fifitaki mai a mutolu kia au, tuga na au kia Keriso.

2 Kua fakaheke atu au kia mutolu, ko e tau matakainaga na e, ha kua manatu mai a mutolu kia au ke he tau mena oti, mo e taofi e mutolu e tau poakiaga, tuga ne tuku atu ai e au kia mutolu.

3 Kua loto au ke iloa ai e mutolu ko e ulu he tau tane oti ko Keriso haia, ko e ulu he hoana ko e tane haia, ka ko e ulu a Keriso ko e Atua haia.

4 Ka liogi po ke perofeta mai ha tane mo e ufiufi hana ulu, kua fakakelea e ia hana ulu.

5 Ka liogi po ke perofeta mai ha fifine ka e nakai ufiufi hana ulu kua fakakelea e ia hana ulu; ha ko e mena taha ia mo e hifipuga.

6 Ha ko e mena, kaeke kua nakai ufiufi he fifine hana ulu, kia hifi e ia hana lauulu; kaeke kua ma a ia ke hifipuga po ke hifi, kia ufiufi ai e ia.

7 Ha kua nakai lata ke he tane ke ufiufi hana ulu, ha ko e fakatai he Atua a ia, ko ia foki kua fakaheke ai ke he Atua; ka ko e fifine kua fakaheke ai ke he tane.

8 Ha ko e mena nakai mai he fifine e tane, ka ko e fifine, mai he tane ia.

9 Nukua nakai eke e tane ha ko e fifine, ka ko e fifine, kua eke ia ha ko e tane.

10 Ko e mena ia kua lata ai ke he fifine ke ha he ulu hana e fakamailoga he pule, ha ko e tau agelu.

11 Ka e pate ni he pihia, ane mai nakai fai fifine, ti nakai fai tane, ane mai nakai fai tane, ti nakai fai fifine, ha ha e Iki.

12 Ha ko e mena tuga e fifine ne tupu mai mai he tane, ti pihia foki e tane ke he fifine; ka ko e tau mena oti mai he Atua haia.

13 Kia manamanatu hifo a mutolu, po ke ne lata nakai ke he fifine ke liogi ke he Atua mo e nakai ufiufi a ia?

14 Kua nakai kia fakaako mai he manamanatu he tau loto ha mutolu, kaeke kua leleva e lauulu he tane, ko e mena ia ke ma ai a ia?

15 Kaeke kua leleva e lauulu he fifine, ko e mena haia ke nava ai kia ia; ha kua foaki mai e lauulu kia ia ke eke mo ufiufi kia ia.

16 Kaeke kua fia taufetoko taha, nakai mahani pihia a mautolu, ti nakai pihia foki e tau ekalesia he Atua.

17 Ka e nakai fakaheke atu au kia mutolu ke he mena kua tala atu nai kia mutolu, ha kua fakapotopoto mai a mutolu ti nakai tupu ai e mitaki, ka ko e kelea ni.

18 Ha ko e mena fakamua hanai, kua logona e au ka fakapotopoto mai a mutolu ke he ekalesia, ti ha ha i ai ia mutolu e tau veveheaga; kua taofi foki e au kua moli e fala mena.

19 Ha ko e mena to tupu ni e tau veveheaga kia mutolu ke lata ai, kia fakakite mai ai a lautolu kua fakamoli ha ha ia mutolu.

20 Hanai, ka fakapotopoto mai a mutolu ke he mena taha, ti nakai pihia a mutolu ke kai ai e mutolu e kaiaga mena he Iki.

21 Ha ko e mena, ka kai mena ti takitokotaha mo e kai mua hana mena kai; kua hoge taha, kua inu lahi taha.

22 Ka e nakai kia fai fale a mutolu ke kai mena ai mo e inu ai? Po kua fakateaga kia a mutolu ke he ekalesia he Atua, mo e fakama a lautolu kua nakai fai fale? To tala atu ha ha e au kia mutolu? To fakaheke kia e au kia mutolu ke he mena ia? Nakai fakaheke ni au.

23 Ko au foki, ne moua e au mai he Iki e mena kua tuku atu e au kia mutolu; ko e po ia ni ne afo ai e Iki ko Iesu, ne toto ai e ia e areto,

24 Kua fakaaue, ti tofitofi ai, mo e pehe age, Kia toto ā, ti kai; ko e haku a tino hanai kua tofitofi mo lukutoto ma mutolu; kia eke e mutolu e mena nai mo fakamanatuaga kia au.

25 Ti pihia foki e kapiniu, kua oti e kai mena, kua pehe age, Ko e kapiniu nai, ko e maveheaga fou ia ke he haku a toto; kia eke e mutolu e mena nai mo fakamanatuaga kia au ke he tau aho oti kua inu ai e mutolu.

26 Ha ko e tau aho oti kua kai ai e mutolu e areto nai, mo e inu ke he kapiniu nai, kua fakailoa atu ai e mutolu e matulei he Iki, ato haele mai a ia.

27 Hanai, ko ia kua kai e areto nai, po ke inu e kapiniu he Iki ka e nakai lata, kua lata kia ia e hala ha ko e tino mo e toto he Iki.

28 Ka kia kumikumi hifo e tagata kia ia ni, ti kai ai e ia e areto, mo e inu ai ke he kapiniu.

29 Ha ko ia kua kai mo e inu ka e nakai lata, kua kai a ia mo e inu ke he hana fakahala, he nakai mailoga e ia e tino he Iki.

30 Ko e mena ia kua gagao ai mo e lolelole ai e tokologa ia mutolu, mo e momohe ai e falu ne tokologa.

31 Ha ko e mena ane mai ke fakafili e tautolu a tautolu po kua nakai fakahala a tautolu.

32 Ha kua fakafili a tautolu, ti akonaki ai a tautolu he Iki, neke fakahala ni a tautolu fakalataha mo e lalolagi.

33 Hanai, ko e haku a tau matakainaga na e, ka fakapotopoto mai a mutolu ke kai mena ai, kia tatali a mutolu ko e taha kia taha.

34 Kaeke foki kua fia kai taha, kia kai mena a ia ke he hana fale; neke eke ha mutolu a fakapotopotoaga mo mena ke fakahala ai a mutolu. Ko e tau mena kua toe, to fakatonu ai e au ka fina atu au.