1 Peteru

5 KUA ole atu e au ke he tau patu ha ia mutolu, ko au foki ko e patu mo e talahau ke he tau mamahi a Keriso, kua fai tufaaga foki a tautolu fakalataha ke he monuina nakala fakakite mai;

2 Kia leveki e mutolu e fuifui mamoe he Atua ha ia mutolu, kia leoleo ki ai mo e fakamakai, ka e nakai he ole fakamakamaka ai; aua foki neke eke mo e fia eke koloa, ka ko e loto fiafia.

3 Aua neke tuga he tau tagata kua fia iki ke he kaina he Atua, ka kia eke a mutolu mo tau fakafifitaki ke he fuifui mamoe.

4 Ka fakakite mai foki e leveki mamoe ne mua, ti moua ai e mutolu e foufouiki lilifu nakai tuai popo.

5 Kia pihia a mutolu ko e tau fuata, kia omaoma a mutolu ke he tau patu; kia omaoma a mutolu oti ko e taha kia taha, kia fakatapulu a mutolu ke he loto holoilalo; nukua, totoko he Atua ke he tau tagata fakatokoluga, ka e foaki mai e fakaalofa noa kia lautolu kua holoilalo.

6 Ko e mena ia kia fakatokolalo ai a mutolu ki lalo he lima malolo he Atua, kia fakamata­lahi ai e ia a mutolu ke he vaha ke lata ai.

7 Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu.

8 Kia nonofo fakalatalata a mutolu, kia mataala a mutolu ha ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia;

9 Kia totoko atu a mutolu kia ia, mo e mauokafua a mutolu ke he tua, he iloa e mutolu ha ne fakakatoatoa e tau mena mamahi ia ni ke he tau matakainaga ha mutolu ha he lalolagi.

10 Ko e Atua foki hana e fakaalofa noa oti kana, ko ia kua ui kia tautolu ha ia Keriso Iesu ke hohoko atu ke he hana monuina tukulagi, ka oti he mamahi a mutolu ke he tau aho gahoa, kia fakakatoatoa ni e ia a mutolu, kia fakatumau, kia fakamalolo, ti fakave a mutolu;

11 Kia ha ia ia e fakahekeaga mo e malolo tukulagi tukumuitea. Amene.

12 Ko Siluano, ko e haku a manatu ko e matakainaga fakamoli a ia, kua tohi atu ai e au e tau kupu gahoa kia mutolu, ke tomatoma atu mo e talahau atu ai, Ko e fakaalofa noa moli he Atua kua tumau ai nai a mutolu.

13 Fakaalofa atu kia mutolu e ekalesia i Papelonia ne fifili fakalataha mo mutolu, katoa mo e haku a tama ko Mareko.

14 Kia fakafeofanaki a mutolu ke he figita fakaalofa. Kia monuina a mutolu oti ha ha ia Keriso Iesu. Amene.