Ioane

6 KUA mole e tau mena ia, ti haele a Iesu he he fahi atu he vai ko Kalilaia, ko e vai haia ko Tiperia.

2 Ti mumui atu kia ia e moto tagata tokologa, ha ko e mena kitia e lautolu e tau fakamailoga ne eke e ia kia lautolu ne gagao.

3 Kua hake a Iesu ke he mouga, mo e nofo hifo ai ko ia mo e hana tau tutaki.

4 Ti kua tata e paseka, ko e galue haia a Iutaia.

5 Ati haga hake ai e tau fofoga a Iesu, kua kitia atu foki, ko e moto tagata tokologa ha ne o mai kia ia, kua tala age a ia kia Filipo, To fakatau mai fe e tautolu e tau areto, ke kai ai a lautolu nai?

6 Na pihia age a Iesu he hana ahi kia ia, ha kua fioia ni e ia e mena ko e eke ne fai e ia.

7 Kua tala age a Filipo kia ia, Nakai lahi e tau areto ka fakatau ke ua e teau e tenari, kia igatia ai a lautolu mo e hana mena tote.

8 Ati tala age ai kia ia e taha tutaki hana, ko Aneterea, ko e matakainaga a Simona Peteru,

9 Ha hinai e tama ha ia ia lima e areto karite, mo e ua e ika ikiiki, ka e aoga ha ha e tau mena ia kia lautolu tokologa?

10 Ti pehe age a Iesu, Kia tala age a mutolu kia tatakoto e tau tagata. Ne lahi foki e motie he mena ia. Ati tatakoto ai e tau tagata, ko e tau tane foki ne totou, toka ai ko e lima e afe.

11 Ati toto ai e Iesu e tau areto, kua fakaaue, ti tufatufa ke he tau tutaki, ka e tufatufa ai he tau tutaki kia lautolu ne tatakoto; kua pihia foki mo e na ika, kua age ke pule e lautolu.

12 Kua mamakoua ni a lautolu, ati tala age ai a ia ke he hana tau tutaki, Kia fakapotopoto e tau valavala mena ne toe, neke moumou ha mena.

13 Ati fakapotopoto ai, kua puke ai e hogofulu ma ua e kato ke he tau valavala mena he lima e areto karite, ne toe kia lautolu ne kai.

14 Ko e tau tagata ne kitia e fakamailoga ne eke e Iesu, kua pehe age a lautolu, Ko e moli ni, ko e perofeta ia hanai, ke haele mai ke he lalolagi.

15 Kua fioia foki e Iesu, ko e o mai ne fai a lautolu ke tapaki a ia, kia eke a ia mo patuiki, ati haele kehe ai a ia tokotaha ke he mouga.

16 Kua hoko ke he afiafi, ati o hifo ai hana tau tutaki ke he vai,

17 Kua hake foki ke he foulua, ati o ai a lautolu ke he fahi atu he vai ki Kapanaumi. Kua pouli foki, ka e nakaila fano ni a Iesu kia lautolu.

18 Kua loka foki e vai ke he matagi kua agi lahi.

19 Kua alo a lautolu, po ke uafulu ma lima po ke tolugofulu e satatio, ati kitia ai e lautolu a Iesu, ha ne fano ni ki luga he vai, kua tata atu foki a ia ke he foulua; ti matakutaku ai a lautolu.

20 Ka kua tala age a ia kia lautolu, Ko au ni; ua matakutaku a mutolu.

21 Ati talia ai e lautolu a ia ke he foulua mo e fiafia; ti hoko agataha e foulua ke he motu ne o a lautolu ki ai.

22 A pogipogi ne kitia ai he moto tagata ne tutu he taha fahi he vai, nakai nofo ai ha foulua, ka ko e foulua ia hokoia ne o ai hana tau tutaki, nakai o fakalataha foki a Iesu mo e hana tau tutaki ke he foulua, ka ko e hana tau tutaki ni hoko lautolu ne o ai.

23 (Ka kua o mai e fala foulua mai Tiperia, kua tata age ke he mena he kai mena ai a lautolu, ka kua oti he fakaaue ai he Iki.)

24 Kua kitia he moto tagata nakai nofo ai a Iesu, ti nakai nonofo ai foki hana tau tutaki, ti hake a lautolu ni ke he tau foulua, mo e o atu ki Kapanaumi, ha ne kumi atu a Iesu.

25 Kua kitia e lautolu a ia ke he fahi atu he vai ti pehe age ai a lautolu kia ia, Rapai na e, ne haele mai ne fe a koe ki hinai?

26 Kua tala age a Iesu kia lautolu, kua pehe age, Ko e moli, ko e moli, ke tala atu e au kia mutolu, nakai kumi e mutolu au, he kitia e mutolu e tau fakamailoga, ka ko e mena kai a mutolu e tau areto, mo e makona ai a mutolu.

27 Ua gahua a mutolu ke he tau mena kai ne popo, ka ko e tau mena kai ne toka mau ke he moui tukulagi, ke foaki atu ai kia mutolu he Tama he tagata; ha ko e mena kua fakakite fakatonu a ia he Atua ko e Matua.

28 Ati pehe age ai a lautolu kia ia, To eke ha e mautolu kia gahua a mautolu ke he tau gahua he Atua?

29 Kua tala age a Iesu, kua pehe age kia lautolu, Ko e hanei e gahua he Atua, kia tua a mutolu kia ia ne fakafano mai e ia.

30 Ti pehe age ai a lautolu kia ia, Ko heigoa taha fakamailoga ke eke e koe ke kitekite atu a mautolu ki ai, mo e tua ai kia koe? Ko heigoa e mena ke eke e koe?

31 Mena kai he tau matua ha mautolu e manai ke he tutakale, tuga ne kupu kua tohi, Kua foaki atu e ia kia lautolu e areto mai he lagi, ke kai ai.

32 Ti pehe atu a Iesu kia lautolu Ko e moli, ko e moli, ke tala atu e au kia mutolu, nakai ko Mose ne foaki atu kia mutolu e areto ia mai he lagi; ka ko e haku a Matua kua foaki kia mutolu e areto moli mai he lagi;

33 Ha ko e areto he Atua ko e mena ne hifo mai he lagi, mo e foaki e moui ke he lalolagi.

34 Ti pehe age ai a lautolu kia ia, Ko e iki na e, ta mai a kia mautolu e areto ia, aua neke noa.

35 Kua tala age a Iesu kia lautolu, Ko au nai ko e areto he moui, ko ia ne hau kia au, nakai hoge ni a ia; ko ia foki ke tua kia au, nakai tuai fia inu ni a ia.

36 Ka e tala atu e au kia mutolu, kua kitia tuai e mutolu au, ka e nakai tua ni a mutolu.

37 Ko lautolu oti kana ne foaki mai he Matua kia au, to o mai a lautolu kia au; ko ia foki ke hau kia au, nakai vega ni e au ki fafo.

38 Ha ko e mena nakai hifo mai au he lagi ke eke ni hoku loto, ka ko e finagalo hana ne fakafano mai au.

39 Ko e hanai foki e finagalo he Matua ne fakafano mai ai au, kia nakai malaia ni taha kua foaki mai e ia kia au, ka kia fakatu ai e au, ke he aho fakamuiaki.

40 Ko e hanai foki hana finagalo ne fakafano mai au, kia takitokotaha a lautolu ne kitekite ke he Tama, mo e tua kia ia, ke moua e ia e moui tukulagi; ke fakatu ai foki e au a ia ke he aho fakamuiaki.

41 Ati loma ai kia ia e tau tagata Iutaia, ha kua pehe a ia, Ko au ko e areto ne hifo mai he lagi.

42 Kua pehe age foki a lautolu, Nakai kia ko Iesu hanai, ko e tama a Iosefa, kua kitia e tautolu hana matua tane mo e hana matua fifine? Ko e hanai foki, po ke fefe he pehe mai a ia, Ne hifo mai au he lagi?

43 Ati tala age ai a Iesu, kua pehe age kia lautolu, Aua neke loma a mutolu.

44 Nakai maeke ia taha ke hau kia au, ka nakai futia mai he Matua ne fakafano mai au; to fakatu foki e au a ia ke he aho fakamuiaki.

45 Kua tohi he tau perofeta, To fakaako he Atua a lautolu oti kana. Hanai, ko lautolu oti ne fanogonogo ke he Matua, mo e ako ai, to o mai a lautolu kia au;

46 Ka e nakai kitia e taha e Matua; ko ia hokoia mai he Matua, ne kitia e ia e Matua.

47 Ko e moli, ko e moli, ke tala atu e au kia mutolu, ko ia ne tua mai kia au, kua moua e ia e moui tukulagi.

48 Ko au ko e areto he moui.

49 Ne kai he tau matua ha mutolu e manai ke he tutakale, ka kua mamate a lautolu.

50 Ko e areto hanai kua hifo mai he lagi, ka kai ai e taha, ti nakai mate a ia.

51 Ko au ko e areto he moui ne hifo mai he lagi; ka kai e taha e areto nai ati moui ai a ia tukulagi. Ko e areto foki ke atu e au, ko e hoku tino haia, ke atu e au mo moui he lalolagi.

52 Ati taufetoko ai e tau tagata Iutaia, kua pehe, Ke maeke fefe he tagata nai ke ta mai hana tino kia tautolu ke kai ai?

53 Ti pehe age ai a Iesu kia lautolu, Ko e moli, ko e moli, ke tala atu e au kia mutolu, kaeke kua nakai kai e mutolu e tino he Tama he tagata, ti nakai inu foki hana toto, nakai ha i loto ia mautolu e moui.

54 Ko ia ne kai hoku tino, mo e inu haku a toto, ha ha ia ia e moui tukulagi; to fakatu foki e au a ia ke he aho fakamuiaki;

55 Ha ko e hoku tino ko e mena kai moli haia, ko e hoku toto foki ko e mena inu moli haia.

56 Ko ia ke kai hoku tino, mo e inu hoku toto, to tumau a ia kia au, ko au foki kia ia.

57 Tuga ne moui e Matua ne fakafano mai au, ha ne moui foki au ke he Matua; pihia foki a ia ka kai ia au, to moui a ia ia au.

58 Ko e areto hanai ne hifo mai he lagi, nakai tuga e tau matua ha mutolu ne kai e manai, ka e mamate a lautolu; ka ko ia ke kai e areto nai to moui a ia tukulagi.

59 Ko e tau mena ia ne talahaua e Iesu, ka kua fakaako a ia ke he sunako i Kapanaumi.

60 Ti tokologa e tau tutaki hana ne logona ai, ti pehe a lautolu, Ko e kupu uka a ena; to maeke ia hai ke fanogonogo ki ai.

61 Kua fioia e Iesu ia ia ni, kua loma hana tau tutaki ke he mena ia, ati tala age ai a ia kia lautolu, Kua tupetupe kia a mutolu ke he mena ia?

62 Po ke fefe ka kikite atu a mutolu ke he Tama he tagata, ha ne hake a ia ke he mena ne nofo ai i tuai.

63 Ko e agaga, ko e fakamoui haia, nakai aoga ni e tino he taha mena; ko e tau kupu kua tala atu e au kia mutolu, ko e agaga ia, ko e moui foki ia.

64 Ka ko e falu ni ha mutolu nakai talia, ha ko e mena kua fioia e Iesu tali mai ni he kamataaga po ko hai a lautolu ke nakai talia a ia katoa mo ia ke afo a ia.

65 Ne tala age foki a ia, Ko e mena ia ne tala atu ai e au kia mutolu, nakai maeke ia taha ke hau kia au, ka nakai foaki kia ia he haku a Matua.

66 Ti kua liliu atu ai e falu he hana tau tutaki tokologa, ti nakai tuai o fano a lautolu mo ia.

67 Ti pehe age ai a Iesu ke he tokohogofulu ma ua, Po ke fia o kehe foki a mutolu?

68 Ati tala age ai a Simona Peteru kia ia, Ko e Iki na e, ke o kia a mautolu kia hai? Ha ha ia koe e tau kupu he moui tukulagi.

69 Kua talia e mautolu, mo e iloa tuai e mautolu ko koe ko e Keriso, ko e Tama he Atua moui.

70 Kua tala age a Iesu kia lautolu, Nakai kia ko e mena fifili e au a mutolu ne tokohogofulu ma ua? ka ko e taha ia mutolu ko e tiapolo a ia.

71 Kua talahau e ia kia Iuta Isakariota ko e tama a Simona; ha ko ia ni ke afo a ia, ko e taha foki a ia he tokohogofulu ma ua.