Mataio

28 KUA hili e sapati, kua matafatafa ata e aho fakamua he fahi tapu, ti o atu ai a Maria i Makatala mo e taha Maria ke ahi e tukuaga.

2 Kitiala, kua to e mafuike lahi, ha kua hifo e agelu he Iki mai he lagi, kua fano mo e fuluhi kehe e maka he gutu he tukuaga, ti nofo ai i luga.

3 Tuga ne uhila hana tino mai, mo e hana tau tapulu kua hinavake ia tuga ne kiona;

4 Kua vivivivi foki a lautolu ne leoleo he matakutaku kia ia, ti faliu a lautolu tuga e tau tagata mamate.

5 Ti tala age e agelu ke he tau fifine, kua pehe age, Aua neke matakutaku a mua; ha kua iloa e au kua kumi e mua a Iesu ne fakasatauro.

6 Nakai ha hinai a ia; ha kua matike mai tuai a ia, tuga ne tala atu ai e ia. O mai a, ke kitekite ke he mena ne takoto ai e Iki.

7 Ati o a fakaave, ke tala age e mua ke he hana tau tutaki, kua matike tuai a ia ia lautolu kua mamate; kitiala, to mua atu a ia kia mutolu ki Kalilaia; to kitia ai e mutolu a ia ke he mena ia, kitiala, kua tala atu e au kia mua.

8 Ti o fakaave a laua he tukuaga mo e matakutaku mo e fiafia lahi; kua tafepoi a laua ke talahau atu ai ke he hana tau tutaki.

9 Ha ne o a laua ke talahau atu ai ke he hana tau tutaki, kitiala, kua feleveia a Iesu mo laua, kua pehe age, Fakaalofa te. Ti o mai ai a laua ti toto hana tau ve, mo e hufeilo mai kia ia.

10 Ti tala age ai a Iesu kia laua, Ua matakutaku a mua, ati o a, ke talahau atu e mua ke he haku a tau matakainaga kia o atu a lautolu ki Kalilaia, kia kitia ai e lautolu au.

11 Kua o a laua, kitiala, kua o age ke he māga e falu he kau leoleo, kua talahau age ke he tau ekepoa ne mua e tau mena oti ne eke.

12 Ti fakapotopoto a lautolu fakalataha mo e tau patu, kua pulega a lautolu, ti age ai e tau tupe loga ke he kau,

13 Kua pehe age, Kia pehe a mutolu, Na o mai hana tau tutaki he po, kua kaiha a ia ka e momohe na mautolu.

14 Kaeke foki ke logona ai he iki, ti ole atu a mautolu kia ia, ti nakai haofia a mutolu.

15 Ti talia e lautolu e tau tupe, mo e eke e lautolu tuga e mena ne tala age kia lautolu; kua puloa foki e tala ia ke he tau tagata Iutaia, kua hoko mai ni ke he vaha nai.

16 Ti o atu e tau tutaki tokohogofulu ma taha ki Kalilaia, ke he mouga ne poaki atu ai a Iesu kia lautolu.

17 Kua kitia e lautolu a ia, ti hufeilo ai a lautolu kia ia; ka kua mahalohalo noa ai ni falu.

18 Ti fina age a Iesu, kua vagahau kia lautolu, kua pehe age, Kua tuku mai kia au e pule oti kana ke he lagi mo e lalolagi.

19 Hanei, kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu;

20 Ti fakaako atu a mutolu kia lautolu kia omaoma ke he tau mena oti ne tala atu e au kia mutolu; kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi. Amene.