Esekielu

19 KO koe foki kia tagi aue a ha ko e tau iki a Isaraela,

2 Mo e pehe atu a koe, Ko hai kia hau a matua fifine? Ko e leona fifine; ne takoto a ia fakalataha mo e tau leona, ne ha i ai a ia fakalataha mo e tau punua leona lalahi, ne leveki ai e ia hana tau punua;

3 Ne uta e ia taha he hana tau punua; ne eke a ia mo punua leona lahi, ne ako a ia ke hēhē manu, ne kai tagata a ia.

4 Ne logona ai e ogo kia ia ke he tau motu kehe; ne moua a ia ke he luo ha lautolu, ti uta e lautolu a ia mo e mama ke takitaki ai a ia ke he motu ko Aikupito.

5 Ne kitia foki e ia ne tatali a ia ka kua fakaoti hana amaamanaki, ti uta ai e ia taha he hana tau punua, ti eke ai a ia mo punua leona lahi.

6 Ti faifano a ia fakalataha mo e tau leona, ne eke a ia mo punua leona lahi ti ako e ia ke hēhē manu, ti kai tagata a ia.

7 Ne iloa e ia ha lautolu a tau fale iki kua tiaki, ne eke foki e ia mo tau mena kua moumou ha lautolu a tau maga, ko e go foki he hana tagi kua tiaki ai e motu, mo e tau mena ne puke ai.

8 Ti hagao mai kia ia e tau motu mai he tau fahi kautu he tau fahi oti, ti fofola ai e lautolu e kupega ha lautolu ki luga hana; ti moua e lautolu a ia ke he luo ha lautolu.

9 Ti tuku e lautolu a ia ke he fale puipui mo e mama ke he hana ihu, ti uta e lautolu a ia ke he patuiki a Papelonia; ne uta e lautolu a ia ke he tau kolo, ke aua neke logona ai foki hana leo ke he tau mouga a Isaraela.

10 Kua lata hau a matua fifine mo e vine tuga na koe, ne to tata age ke he vai, ne fua a ia mo e lau uhiuhi hana tau la he loga ai e tau vai.

11 Ne ha ia ia e tau la mao, ke eke mo tau tokotoko he tau pule, ne tokoluga foki ha lautolu a loa ki loto he tau la haolo, ne kitia foki a lautolu ke he tokoluga ha lautolu ki loto he tau la loga.

12 Ka e taaki a ia ke he ita lahi, ti liti ai ke he kelekele, ti magomago ai hana tau fua ke he matagi ne agi mai he fahi uta, ne pakipaki ai hana tau la mao, ne fifigo, ti huhunu ai ke he afi.

13 Ka ko ainei kua to ai a ia ke he tutakale, ko e motu pakulā nakai fai vai.

14 Ne fina atu foki e afi mai he tau akau he hana tau la, ne huhunu ai hana tau fua; ko e mena ia nakai tuai ha ia ia e akau maō ke eke mo tokotoko he pule; ko e mena ke tagi ai haia, to eke foki ni mo mena ke tagi ai.