Esekielu

6 KUA hoko mai foki kia au e kupu a Iehova, kua pehe mai,

2 Ko e tama he tagata na e, kia haga atu hau a tau mata ke he tau mouga a Isaraela, mo e perofeta atu a koe kia lautolu.

3 Kia pehe atu a koe, Ko e tau mouga a Isaraela na e, kia fanogonogo mai a ke he kupu he Iki ko Iehova; kua pehe mai e vagahau he Iki ko Iehova ke he tau mouga mo e tau matiketike, ko e tau vailele, katoa mo e tau pahua; Kitiala, ko au nai to fakahoko atu e au e pelu kia mutolu, mo e fakaoti e au e tau mena tokoluga ha mutolu.

4 Ti eke e tau fatapoa ha mutolu mo tau mena kua moumou, to lipilipi ai foki ha mutolu a tau tupua ke he la; mo e liti hifo e au ha mutolu a tau tagata kua kelipopo ki mua he tau tupua ha mutolu.

5 To tuku foki e au e tau tino mamate he fanau a Isaraela ki mua he tau tupua ha lautolu, ti fakatafola takai ai e au ha mutolu a tau hui atua ke he tau fatapoa ha mutolu.

6 To eke e tau maga mo tau mena kua moumou ke he tau mena oti kua nonofo ai a mutolu, to fakaoti foki e tau mena tokoluga, kia eke ai mo tau mena kua moumou, mo e fakaoti ai ha mutolu a tau fatapoa, mo e lipilipi mo e fakahiku ai e tau tupua ha mutolu, kia hio ki lalo ha mutolu a tau tupua ne fakatino po ke la, mo e ulu moumou ai e tau gahua ha mutolu.

7 To veveli foki a lautolu kua kelipopo ki loto ia mutolu ti iloa ai e mutolu ko au ko Iehova.

8 Ka e pete ia to toka e au falu ia mutolu ke hao mai he pelu ke he tau motu kehe, ka fakamavehevehe ai a mutolu ke he tau motu.

9 Ko mutolu foki ka hao to manatu mai e mutolu kia au ke he tau motu ke fakapaea ki ai a lautolu, ka lipilipi ai e au ha lautolu a tau loto faivao ne o kehe ia au, mo e ha lautolu a tau mata faivao ne mumui atu ke he tau tupua ha lautolu; to fakavihia foki e lautolu a lautolu ha ko e tau mena kelea kua eke e lautolu ke he ha lautolu a tau mena vihiatia oti.

10 Ti iloa ai e lautolu ko au ko Iehova, ti nakai vagahau noa atu e au, ke eke ai e au e tau mena kelea na kia lautolu.

11 Kua pehe mai e vagahau he Iki ko Iehova, Kia pati ā hau a tau lima, mo e pahu e koe hau a hui, mo e pehe atu, Oi te! ko e tau mena vihiatia oti mo e tau mena kelea he magafaoa a Isaraela! to mamate a lautolu ke he pelu, mo e hoge, mo e tatalu.

12 Ko ia kua mamao to mate a ia he tatalu, ko ia kua tata mai to mate a ia ke he pelu, ko lautolu ne toe mo e hao to mamate a lautolu he hoge; to fakaoti atu ai e au haku a ita kia lautolu.

13 Ti iloa ai e mutolu ko au ko Iehova, he ha i ai ha lautolu a tau tagata kua kelipopo ke he vaha he tau tupua ha lautolu kua agaagai ai ke he tau fatapoa ha lautolu, i luga he tau mouga tokoluga oti, ke he tau tapunu mouga oti, mo i lalo he tau akau lau uhiuhi oti, mo i lalo he tau aluna la vihi oti, ko e tau mena ne ta age ai e lautolu e tau mena manogi mitaki ke he tau tupua oti ha lautolu.

14 To fakaolo atu foki e au haku a lima ki luga ha lautolu, ti eke e au e motu mo mena toka noa, ke mua hana toka noa ke he tutakale ko Tipelata, ke he tau mena oti kua nonofo ai a lautolu; ti iloa ai e lautolu ko au ko Iehova.