2 Nofoaga he Tau Patuiki
11 KUA hoko a Rehopoamo ki Ierusalema ti fakapotopoto ai e ia e magafaoa a Iuta mo e magafaoa a Peniamina ne taha e teau afe ti valugofulu e afe tagata, ko e tau tagata kua fifili, ko e tau tagata ne mahani mo e tau, ke tau kia Isaraela, ke moua foki e lautolu e kautu ma Rehopoamo.
2 Ka kua hoko mai e kupu a Iehova ke he tagata he Atua ko Semaia, kua pehe mai,
3 Kia pehe age a koe kia Rehopoamo ko e tama a Solomona ko e patuiki a Iuta, mo e tau tagata Isaraela oti ha ha ia Iuta mo Peniamina, kia pehe age,
4 Kua pehe mai e vagahau a Iehova, Aua neke o hake a mutolu, ti ua tau a mutolu mo e tau matakainaga ha mutolu; kia takitaha a mutolu mo e liu atu ke he hana magafaoa; ha kua mai ia au e mena nai. Ti fanogonogo a lautolu ke he kupu a Iehova, ne liliu mai a lautolu nakai o atu a lautolu ke tau mo Ierepoamo.
5 Kua nofo Rehopoamo i Ierusalema, mo e ati e ia e tau maga ke eke mo tau taue i Iuta,
6 Ne ati e ia a Petelehema, mo Etama, mo Tikoa,
7 Mo Petesura, mo Suka, mo Atulama,
8 Mo Kata, mo Maresa, mo Sifi,
9 Mo Ataraima, mo Lakisa, mo Aseka,
10 Mo Soraa, mo Ailona, mo Heperona, ha ha ia Iuta mo Peniamina haia, ko e tau maga ne eke mo tau taue.
11 Ne fakamao ai e ia e tau taue, mo e tuku ai e ia e tau takitaki kau, mo e tanaki ai e tau mena kai, mo e puke lolo, mo e uaina.
12 Ne takitaha foki e maga he tau maga oti ia, ne tuku ai e ia e tau akau pāpā mo e tau tao, mo e taute ai e ia ke uka lahi; ko Iuta mo Peniamina ne kau fakalataha mo ia.
13 Ne o mai foki kia ia e tau ekepoa mo e tau tagata Levi ha ha i Isaraela oti mai he tau fahi motu oti ha lautolu.
14 Ko e mena tiaki he tau tagata Levi ha lautolu a tau vao ne takai aki e tau maga mo e ha lautolu a tau tufaaga, mo e o mai a lautolu ki Iuta mo Ierusalema; ha kua tiaki e Ierepoamo mo e hana tau tama tane a lautolu, ke aua neke eke a lautolu e feua he ekepoa kia Iehova.
15 Ka e kotofa ai e ia e tau ekepoa māna ma e tau mena tokoluga, ma e tau koti tane foki, ma e tau punua povi foki ne eke e ia.
16 Kua mole mai a lautolu ti o mai ai he tau magafaoa oti a Isaraela a lautolu ne manatu ke he tau loto ha lautolu ke kumi kia Iehova ko e Atua a Isaraela, ne o mai a lautolu ki Ierusalema ke eke poa kia Iehova ko e Atua he tau matua ha lautolu.
17 Ne fakamau ai e lautolu e kautu a Iuta, mo e fakamalolo ai e lautolu a Rehopoamo ko e tama a Solomona ke he tau tau ne tolu; ha ko e tolu e tau ne o ai a lautolu ke he puhala a Tavita mo Solomona.
18 Ti faihoana a Rehopoamo kia Mahalata ko e tama fifine a Ierimota ko e tama tane a Tavita, mo Aviaila ko e tama fifine a Eliapo ko e tama a ia a Iese;
19 Ti fanau ai e ia kia ia e tau tama tane; ko Iuso, mo Semaria, mo Saama.
20 Kua mole ia ti faihoana a ia kia Maaka ko e tama fifine a Apisaloma; ti fanau e ia kia ia a Avia, mo Atai, mo Sisa, mo Salomita.
21 Ne homo atu e fakaalofa a Rehopoamo kia Maaka ko e tama fifine a Apisaloma ke he hana tau hoana oti mo e hana tau hoana fakahoa; (ko e mena tokohogofulu ma valu e hoana hana, mo e tokoonogofulu e hoana fakahoa, ti fanau ai e ia tokouafulu ma valu e tama tane, mo e tokoonogofulu e tama fifine).
22 Ti kotofa e Rehopoamo a Avia ko e tama a Maaka ke eke mo tui ne mua ke pule ke he hana tau matakainaga; ha kua manatu e ia ke eke a ia mo patuiki.
23 Ne eke e ia mo e pulotu, mo e fakamavehevehe atu e ia hana tau tama tane oti ke he tau motu oti a Peniamina, ke he tau maga nonofo taue oti; ne ta atu e ia kia lautolu e tau mena kai loga. Ne kumi foki e ia ma lautolu e tau hoana tokologa.