Hosea

5 KO e tau ekepoa na e, kia fanogonogo mai a a mutolu ke he mena nai. Ko e magafaoa a Isaraela na e, kia fanogonogo mai a. Ko e magafaoa he patuiki na e, kia fakateliga mai a a mutolu, ha kua fakahala a mutolu, kua eke a mutolu mo hele ki Mitepa, mo kupega foki kua fofola ki luga a Tapora.

2 Ko lautolu ne liliu kehe kua o taha ni a lautolu ke he mahani kelea, ka ko au, kua akonaki atu e au kia lautolu oti.

3 Ko au kua iloa e au a Efaraimo, ko Isaraela foki nakai ni galo ia au a ia; ha ko e mena, Efaraimo na e, kua feuaki a koe ainei, kua kelea a Isaraela.

4 Ko e tau gahua ha lautolu kua nakai maeke ai kia lautolu ke liliu mai ke he Atua ha lautolu; ha kua ha ha ia lautolu e loto ke he feuaki kua nakai iloa e lautolu a Iehova.

5 Kua talahau ai he fakatokoluga a Isaraela ki mua ha lautolu, to veveli a Isaraela mo Efaraimo ke he tau mahani kelea ha lautolu, to veli foki a Iuta fakalataha mo lautolu.

6 To o atu a lautolu mo e tau mamoe ha lautolu mo e tau povi ha lautolu ke kumi ai kia Iehova, ka e nakai moua e lautolu; kua haele kehe a ia ia lautolu.

7 Kua pikopiko a lautolu kia Iehova, ha kua fanau ai e lautolu e tau tama kehe; ko e kai ha ne fai he mahina fou a lautolu katoa mo e tau tufaaga ha lautolu.

8 Kia ulo ai e mutolu e sofaro i Kipeā, mo e ulo ai e pu i Rama; kia kalaga ā mutolu i Petavene; Peniamina na e, kua mui atu a ia kia koe.

9 To eke e Efaraimo mo mena kua moumou ke he aho ke akonaki ai a ia; kua fakailoa atu e au ke he tau magafaoa a Isaraela e tau mena ke hohoko moli ni.

10 Ko e tau iki a Iuta kua tuga ne tau tagata kua tolo katofia a lautolu; to liligi atu e au haku a ita po ke magavai ki luga ha lautolu.

11 Kua pehia he favale a Efaraimo, kua lipilipi ai a ia ke he fakafiliaga; ha kua omaoma mo e loto a ia ke he poaki.

12 Ko au foki kua tuga ne moko kai tapulu kia Efaraimo; ke tuga foki e mena kua popo ke he magafaoa a Iuta.

13 Ne kitia e Efaraimo hana gagao, ne kitia foki e Iuta hana kafokia, ti fano a Efaraimo ki Asuria, ti fakafano atu e ia ke he patuiki ko Iarepa; ka e nakai ni maeke kia ia ke fakamalolo ai a mutolu, po ke fakamaulu ai ha mutolu a kafokia.

14 Ha ko e mena to eke au ke tuga e leona kia Efaraimo, ke tuga foki e punua leona ke he magafaoa a Iuta; ko au to hēhē ni e au mo e fano kehe, to uta kehe e au ti nakai ha i ai taha ke laveaki.

15 To fano au mo e liu atu au ke he mena kua nofo ai au, ato fakahala ai a lautolu, mo e kumi e lautolu au; to kumi fakamakutu e lautolu au ka matematekelea a lautolu.