Tau Salamo

91 KO ia kua nofo ke he mena galo ha i ai e Mua ue atu, to nofo a ia ke he malu hana ha i ai e malolo oti kana.

2 To pehe atu au kia Iehova, Ko e haku a kolo, mo e haku a taue; ko e haku a Atua kua falanaki au kia ia.

3 Ha ko ia ni ke laveaki a koe mai he hele he tagata takafaga, mo e tatalu ke mate ai.

4 To ufiufi e ia a koe ke he hana tau tapakau, to malu a koe ki lalo he hana tau tapakau, to eke hana fakamoli mo akau punuti mo mena ke puipui aki a koe.

5 Nakai matakutaku a koe ke he mena fakamatakutaku ke he po, mo e fana kua lele ke he aho,

6 Mo e tatalu kua evaeva ke he pouli, mo e malaia kua moumou ke he tupou la.

7 To veveli e taha afe ke he tapa hāu, ti afe mo afe ke he fahi matau hāu, ka e nakai fakatata mai kia koe.

8 To kitekite noa hāu a tau mata ki ai, to kitia e koe e taui he tau tagata mahani kelea.

9 Ha ko koe Iehova na e, ko e haku a kolo a koe; kua eke e koe a ia ne Mua ue atu mo mena ke nofo ai a koe;

10 Nakai hoko kia koe ha mena kelea, ti nakai tata ha malaia ke he hau a fale ie.

11 Ha ko e mena fekau e ia hana tau agelu kia koe, ke leoleo kia koe ke he hāu a tau puhala oti kana.

12 Ke toto haku a koe he tau lima ha lautolu neke hakina e hui hāu ke he maka.

13 To taholi e koe e leona mo e asipi; to taholi foki e koe e punua leona mo e tanimo.

14 Ha kua manako lahi mai a ia kia au, ko e mena ia ke fakamoui ai e au a ia; to fakalilifu e au a ia ha kua iloa e ia haku a higoa.

15 To ui mai a ia kia au, ti fanogonogo atu e au kia ia; ti fakalataha a maua mo au ke he matematekelea; to laveaki e au a ia mo e fakatupu hana lilifu.

16 Ko e moui loa ke fakamakona aki e au a ia; to fakakite e au hakua fakamouiaga kia ia.