Isaia

24 KITIALA, ha ne liligi e Iehova e motu ke maha, kua fakafohifo e ia a ia, ti fakamavehevehe ai e ia a lautolu kua nonofo ai.

2 To eke ni ke tatai e motu mo e ekepoa; ke tatai e fekafekau mo e hana iki; ke tatai e fekafekau fifine mo e hana iki fifine; ke tatai a ie kua fakafua atu mo ia kua fakafua mai; ke tatai a ia kua ta age e tau mena ke taui mai mo ia kua ogo mena mai; ke tatai a ia kua uta e tau tupe ke totogi fakalahi mo ia kua ta age e tau tupe ke totogi fakalahi mai.

3 To liligi ai ni e motu, to fofo ni a ia ke he tau; ha kua vagahau mai e Iehova e kupu na.

4 Kua mānu e lalolagi, kua fifigo ai; kua fakalolelole e atu motu, kua fifigo ni; kua fakalolelole e tau iki ne mua he tau motu.

5 Kua kelea e motu ia lautolu ne nonofo ai; ha kua holi e lautolu e tau fakatufono; kua liliu kehe e lautolu e kotofaaga; kua fakahui e lautolu e maveheaga tukulagi.

6 Ko e mena ia kua fakaoti ai e motu ke he kaialu, kua fakahala foki a lautolu ne nonofo ai; ko e mena ia kua huhunu ai a lautolu ne nonofo ke he motu; ti toe ai e tau tagata tokogahoa.

7 Kua mānu e huhua vine, kua fifigo e tau vine; kua tauoi a lautolu oti ne fiafia ai ke he tau loto ha lautolo.

8 Kua mole atu e fiafia he topā; kua fakahiku e miha ha lautolu ne olioli; kua mole atu e fiafia he kitara.

9 Nakai tuai inu uaina a lautolu mo e lologo; to kona e kava kia lautolu kua inu ai.

10 Kua malŏlŏ e maga kua tiaki; kua papa ai e tau fale oti, neke hu atu ki ai taha.

11 Ha ha he tau puhala e tagi ha ko e uaina; kua mole atu e olioli oti; kua fano kehe e fiafia he motu.

12 Ko e tau mena ne toe ai ke he maga ko e tau mena malŏlŏ ia, ti tuki malipilipi ai e gutuhala.

13 Ko e mena eke ni pihia ke he kelekele ki loto he tau motu, tuga ne haha ai e lautolu e akau ko e olive, ke tuga ne tau fuhi vine venevene, ka kua oti e tau fuhi vine he faki.

14 To leo lahi a lautolu, to kalaga a lautolu ha ko e lilifu a Iehova, to kalaga a lautolu mai he tahi.

15 Ko e mena ia kia fakaheke atu a mutolu kia Iehova ke he tau afi, ke he tau motu kua takai he tahi, ko e higoa ni a Iehova ko e Atua a Isaraela.

16 Kua logona e tautolu e tau lologo mai he motuaga he lalolagi; ko e fakahekeaga ke he tau tagata tututonu; ka kua pehe atu au, Kua malaia au? kua malaia au? Oi fakaalofa kia au? Ko lautolu ne fa fakavai kua fakavai e lautolu, kua fakavai mai ai ke he tau mena fakavai e lautolu ne fa fakavai.

17 Ha ha ia koe kua nofo ke he motu e matukutaku, mo e luo, mo e hele.

18 Ko ia kua hola mai he leo he mena ne fakamatakutaku aki, to to ai a ia ke he luo; ko ia foki kua hake mai he luo to hele ai a ia ke he hele; ha kua hafagi e tau pa i luga, kua luelue ai foki e tau fakaveaga he lalolagi.

19 Kua mapakipaki lahi e motu, kua malipilipi lahi ni e motu, kua luelue lahi e motu.

20 Kua tauveli e motu tuga ne tagata konahia, kua luelue a ia tuga ne mohega tautau; kua mamafa hana tau holifono ki luga hana; to veli a ia, ti nakai liu tu mai a ia.

21 Ko e aho ia foki to fakahala ai e Iehova e tau kau he mena tokoluga ke he mena tokoluga, katoa mo e tau patuiki he lalolagi ke he lalolagi.

22 To fakapotopoto ai a lautolu tuga ne fakapotopoto ai e tau tagata ne lili ke he luo; to puipui ai foki a lautolu ke he fale puipui, ka mole atu foki e tau aho loga, ti ahi ai a lautolu.

23 To fakahahaku ai e mahina, to mā foki e lā, ha kua eke a Iehova Sapaota mo patuiki ke he mouga ko Siona mo Ierusalema, ki mua foki hana tau patu mo e lilifu.