1 Tau Patuiki

12 KUA fano a Rehopoamo ki Sikema, ha kua o mai a Isaraela oti ki Sikema, ke eke a ia mo patuiki.

2 Kua logona ai e Ierepoamo ko e tama a Nepata, he nofo a ia i Aikupito; ha kua hola a ia mai mua he patuiki ko Solomona, ti nofo ai a Ierepoamo i Aikupito.

3 Ti fakafano atu e lautolu ke ui atu kia ia, Ti o mai ai a Ierepoamo mo e fakapotopotoaga oti a Isaraela, ti vagahau atu a lautolu kia Rehopoamo, kua pehe atu,

4 Ne fakamamafa he matua hau ha mautolu a lakau hahamo; hanai, kia fakamāmā e koe e gahua uka he hāu a matua, mo e hana lakau hahamo mamafa ne tuku mai e ia kia mautolu, ti fekafekau atu ai a mautolu kia koe.

5 Ti pehe atu a ia kia lautolu, Kia o a a mutolu ato anoiha, ti liliu mai ai a mutolu kia au; ti o ai e motu.

6 Ti pulega ai e patuiki ko Rehopoamo mo e tau patu ne tutu ki mua he matua hana ko Solomona he moui ai a ia, kua pehe atu, Ko e heigoa kia e mena ke vagahau mai e mutolu ke tali atu ai au ke he motu nai?

7 Ti vagahau mai ai e lautolu kia ia, kua pehe mai, Kaeke ke eke a koe mo fekafekau ke he motu nai ke he aho nai, mo e fekafekau atu a koe kia lautolu, mo e tali atu a koe kia lautolu, mo e vagahau atu a koe kia lautolu ke he tau kupu mitaki, ti eke ai a lautolu mo tau fekafekau kia koe tukulagi.

8 Ka e tiaki e ia e tau kupu he tau patu ne fakatonu mai ai e lautolu kia ia, ti pulega a ia mo e tau fuata ne tutupu hake fakalataha mo ia, ne tutu ai a lautolu ki mua hana.

9 Ti pehe atu a ia kia lautolu, Ko e heigoa kia ha mutolu a vagahau mai, ke tali atu ai a tautolu ke he motu nai kua vagahau mai kia au, kua pehe mai, Kia fakamāmā e koe e lakau hahamo ne tuku mai e matua hau kia mautolu,

10 Ti vagahau ai e tau fuata ne tutupu hake fakalataha mo ia kua pehe mai, Kia pehe atu a koe ke he motu nai kua vagahau mai kia koe, kua pehe mai, Ne fakamamafa he matua hau ha mautolu a lakau hahamo, ka kia fakamāmā mai e koe kia mautolu; kia vagahau atu pehe a koe kia lautolu, Kua mua he lahi e matalima tama haku ke he tokupu he haku matua.

11 Ne tuku atu he matua haku e lakau hahamo mamafa kia mutolu; ka ko au, to lafilafi atu e au ke he ha mutolu a lakau hahamo; ne akonaki atu haku matua kia mutolu ke he tau akau; ka ko au, to akonaki atu e au kia mutolu ke he tau akarava.

12 Ti o mai ai a Ierepoamo mo e motu oti kia Rehopoamo ke he aho tolu, tuga ne vagahau atu e patuiki, kua pehe atu, Kia liliu mai a mutolu kia au anoiha.

13 Ti tali mai ai e patuiki ke he motu mo e fakatokoluga; kua tiaki e ia e tau kupu he tau patu ne fakatonu atu e lautolu kia ia;

14 Ka e vagahau atu a ia kia lautolu ke lata mo e tau kupu he tau fuata, kua pehe atu, Ne fakamamafa he matua haku ha mutolu a lakau hahamo; ka ko au, to lafilafi atu e au ke he lakau, hahamo ha mutolu; ne akonaki atu haku matua kia mutolu ke he tau akau, ka ko au, to akonaki atu e au kia mutolu ke he tau akarava.

15 Kua nakai ni fanogonogo e patuiki ke he motu; ha kua mai ia Iehova e mena ia kia fakamoli ai e ia hana finagalo ne vagahau mai ai e Iehova ia Akia ko e tagata Sailo kia Ierepoamo ko e tama a Nepata.

16 Kua kitia e Isaraela oti nakai ni fanogonogo mai e patuiki kia lautolu, ti tali mai ai he motu ke he patuiki, kua pehe mai, Ko e heigoa kia e tufaaga ma mautolu ia Tavita? Ti nakai fai tufaaga a mautolu ke he tama a Iese. Isaraela na e, kia o a a mutolu ke he ha mutolu a tau fale ie. Hanai, Tavita na e, kia pule a koe ke he magafaoa hau. Ti o ai a Isaraela ke he tau fale ie ha lautolu.

17 Ka ko e fanau a Isaraela ne nonofo ke he tau maga a Iuta, ne eke a Rehopoamo mo patuiki ha lautolu.

18 Ti fakafano atu he patuiki ko Rehopoamo a Atoramo ko e tagata ne pule ke he tau poa, ka e pinimaka e Isaraela oti a ia ke he tau maka ti mate ai a ia. Ti alumaki e patuiki ko Rehopoamo ke hake ke he hana kariota, ke hola ai a ia ki Ierusalema.

19 Ti fakafualoto ai a Isaraela ke he magafaoa a Tavita ke hoko mai ke he aho nai.

20 Kua logona e Isaraela oti kua liu mai a Ierepoamo, ti fakafano atu e lautolu kia ia ke ui atu kia ia ke hau ke he fakapotopotoaga, ti eke e lautolu a ia mo patuiki kia Isaraela oti; ti nakai fai tagata ne mumui atu ke he magafaoa a Tavita, ka ko e magafaoa ni a Iuta hoko lautolu.

21 Kua hoko a Rehopoamo ki Ierusalema ti fakapotopoto ai e ia e magafaoa oti a Iuta, mo e magafaoa a Peniamina ne taha e teau afe ti valugofulu e afe tagata ko e tau tagata kua fifili, ko e tau tagata ne mahani mo e tau, ke tau kia Isaraela, ke moua foki e lautolu e kautu ma Rehopoamo ko e tama a Solomona.

22 Ka kua hoko mai e kupu he Atua kia Semaia ko e tagata he Atua, kua pehe mai,

23 Kia tala age e koe kia Rehopoamo ko e tama a Solomona ko e patuiki a Iuta mo e magafaoa oti a Iuta mo Peniamina, mo lautolu kua toe ke he motu, kia pehe age.

24 Kua vagahau mai pehe a Iehova, Aua neke o hake a mutolu ti aua neke tau, a mutolu mo e tau matakainaga ha mutolu ko e fanau a Isaraela; kia takitaha a mutolu mo e liu atu ke he hana magafaoa; ha kua mai ia au e mena nai. Ti fanogonogo a lautolu ke he kupu a Iehova ne liliu mai a lautolu ti o atu ai a lautolu, ke lata mo e kupu a Iehova.

25 Ti ati e Ierepoamo a Sikema ke he mouga a Efaraimo, mo e nofo ai; ti fano a ia he mena ia mo e ati ai e ia a Penueli.

26 Ti pehe hifo ai a Ierepoamo ke he hana loto, To liu atu ainei e kautu ke he magafaoa a Tavita;

27 Kaeke ke o hake e motu nai ke eke poa ai ke he fale a Iehova i Ierusalema, ti liliu atu ai e tau loto he motu nai ke he iki ha lautolu ko Rehopoamo ko e patuiki a Iuta, ti kelipopo e lautolu au, mo e liliu atu ai a lautolu kia Rehopoamo ko e patuiki a Iuta.

28 Ti pulega ai e patuiki, ti eke ai e ia ua e punua povi auro, ti pehe age a ia kia lautolu, Kua uka kia mutolu he o hake ki Ierusalema; kitiala, ko e ha mutolu a tau atua hanai ma Isaraela na e, ne ta hake ai a mutolu he motu ko Aikupito.

29 Ti tuku e ia taha i Peteli, mo e tuku ai e ia taha i Tano.

30 Ti eke e mena na mo hala; ha kua o atu e motu ki mua he taha ki Tano.

31 Ti ta e ia e tau fale ke he tau mena tokoluga; ti kotofa e ia falu mai he motu oti ke eke mo tau ekepoa, nakai ko e fanau a Levi a lautolu.

32 Ne eke foki e Ierepoamo e galue ke he mahina valu, ke he aho hogofulu ma lima he mahina tuga ne galue kua eke i Iuta; ti hake ai a ia ke he fatapoa; ti eke pihia e ia i Peteli, kua eke poa ai ke he tau punua povi ne eke e ia; kua kotofa foki e ia ki Peteli e tau ekepoa he tau mena tokoluga ne eke ai e ia.

33 Ti hake a ia ke he fatapoa ne eke ai e ia i Peteli ke he aho hogofulu ma lima he mahina valu, ko e mahina ne fafati noa e ia ni ke he hana loto; kua eke foki e ia e galue ma e fanau a Isaraela; ti hake a ia ke he fatapoa ke huhunu ai e mena manogi.