1 Tau Patuiki

10 KUA logona he patuiki fifine a Sihipa e tala kia Solomona ha ko e higoa a Iehova, ti hau ai a ia ke kamatamata kia ia ke he tau kupu galo.

2 Kua hau a ia ki Ierusalema mo e fenoga ne tokologa lahi, mo e tau kamela ne ta mai ai e tau mena manogi, mo e tau auro loga mahaki, mo e tau maka uho, kua hau a ia kia Solomona, ti vagahau ai a laua mo ia ke he tau mena oti ha ha he loto hana.

3 Ti fakamatala atu e Solomona kia ia hana tau kupu oti; nakai fai mena ne galo ke he patuiki kua nakai tala atu ai e ia kia ia.

4 Kua kitia he patuiki fifine a Sihipa e pulotu a Solomona, mo e fale ne ta e ia,

5 Mo e tau mena kai ke he hana laulau, mo e nonofo he hana tau fekafekau, mo e tutu he hana tau fekafekau, mo e tau tapulu ha lautolu, mo e hana tau tagata taute uaina, mo e hala ne hake ai a ia ke he fale a Iehova, ti nakai toe ai ha manamanatu kia ia.

6 Ti pehe atu a ia ke he patuiki, Kua moli e tala ne logona e au ke he haku motu ke he hau a tau vagahau mo e hau a pulotu.

7 Ka e nakai talia e au e tala ato hau au mo e kitia ai e au ke he tau mata haku, Kitiala, ne tote e mena ne tala mai ai kia au, ka e lahi e mena nakai tala mai ai; kua mua ue atu hau a pulotu, mo e hau a monuina ke he tala ne logona ai e au.

8 Uhoaki hau a tau tagata, uhoaki foki hau a tau fekafekau nai, kua tutu mau ki mua hau, mo e fanogonogo ai ke he hāu a pulotu.

9 Kia fakaaue atu kia Iehova hau a Atua kua fiafia a ia kia koe ke fakanofo ai e ia a koe ke he nofoaiki a Isaraela; kua fakaalofa nakai noa a Iehova kia Isaraela, ti eke ai e ia a koe mo patuiki kia eke e koe e fakafiliaga mo e mahani tututonu,

10 Ti ta mai e ia ke he patuiki e tau auro taha teau e taleni ti uafulu e taleni, mo e tau mena manogi ne loga lahi ni, mo e tau maka uho; nakai ta mai foki e tau mena manogi ke tatai mo e tau mena loga ne foaki mai ai he patuiki fifine a Sihipa ke he patuiki ko Solomona.

11 Ko e folau foki a Hairamo ne ta mai ai e tau auro i Ofaira; ne ta mai ai foki i Ofaira e tau akau ko e tau ahi loga lahi ni, mo e tau maka uho.

12 Ti eke aki he patuiki e tau pou ma e fale a Iehova mo e tau pou ma e fale he patuiki ke he tau akau ahi ti eke ai foki e tau kitara, mo e tau napeli ma e tau tagata uhu lologo; nakai ta mai foki e tau akau ahi pihia, ti nakai kitia foki, ke hoko mai ke he vaha nai.

13 Ti ta atu he patuiki ko Solomona ke he patuiki fifine a Sihipa e tau mena oti ne finagalo a ia ki ai mo e ole ai e ia, ke lafilafi atu ke he tau mena ne ta atu noa he patuiki ko Solomona kia ia. Ti liu atu ai a ia mo e fano ke he hana motu, ko ia mo e hana tau fekafekau.

14 Ko e fafati he mamafa he auro ne ta mai kia Solomona ke he tau taha; ko e ono e teau ti onogofulu ti ono e taleni auro;

15 Katoa foki mo e tau auro ne ta mai ai e lautolu ne o fano ke fakafua, katoa mo e tau tagata fakafua koloa, mo e tau patuiki Arapi oti, mo e tau iki ne pule ke he tau motu.

16 Ti eke he patuiki ko Solomona e tau akau papa auro kua tukituki fakalapalapa ua e teau; ne taki ono e teau sikeli auro ke he tau akau papa;

17 Mo e tau akau punuti auro kua tukituki fakalapalapa tolu e teau; ne takitolu e mina auro ke he tau akau punuti; ti tuku atu ai he patuiki e tau mena ia ke he fale ke he vao i Lepanona.

18 Ne eke foki he patuiki e nofoaiki lahi ke he tau nifo elefane, ti fakakili aki e ia ke he auro mitaki.

19 Ti ono e tuagahui he papahi ke hake ai ke he nofoaiki, ne veliveli foki e nofoaiki ki luga ke he hana fahi ki tua; ti takitaha e fahi he mena ke nofo ai mo e hana tau lago, ti tutu ai e tau leona ne ua ke he tapa he tau lago.

20 Ne tutu ai foki e tau leona hogofulu ma ua ke he taha fahi mo e taha fahi he tau tuagahui he papahi ne ono; nakai fai mena kua eke ai pihia ke he taha kautu.

21 Ko e tau kapiniu inu oti he patuiki ko Solomona ko e auro ia, mo e tau kapiniu oti ke he fale ke he vao i Lepanoua ko e auro mitaki ia; nakai fai kapiniu ario; kua eke ni e ario mo mena fakateaga ke he vaha ia Solomona.

22 Ka kua ha ha i ai ke he patuiki e tau foulua Tasisa ke he tahi, fakalataha mo e tau foulua a Hairamo; ti takilaga taha ke he tolu e tau ne o ai e tau foulua Tasisa, mo e ta mai ai e auro mo e ario, mo e tau nifo elefane, mo e tau kofi, mo e tau tuki.

23 Ne homo atu a Solomona ke he tau patuiki oti he lalolagi he muhu koloa mo e pulotu a ia.

24 Ne kumi atu kia Solomona he lalolagi oti kua fanogonogo a lautolu ke he hana pulotu kua tuku ai he Atua ke he hana loto.

25 Ti takitaha a lautolu mo e ta mai ai hana mena fakaalofa, ko e tau kapiniu auro, mo e tau kapiniu ario, mo e tau tapulu, mo e tau kanavaakau, mo e tau mena manogi, mo e tau solofanau, mo e tau falata, ke he taha tau mo e taha tau.

26 Ti fakapotopoto e Solomona e tau kariota mo e kau heke solofanua; ha ha ia ia e tau kariota taha e afe mo e fa e teau, mo e kau heke solofanua hogofulu e afe ti ua e afe tagata, ti tuku e ia a lautolu ke he tau maga ne ha i ai e tau kariota, katoa foki mo Ierusalema ke fakalataha ai mo e patuiki.

27 Ne fakaloga ai he patuiki e tau ario i Ierusalema ke tuga ne tau maka; ti fakaloga ai e ia e tau arasi ke tuga ne tau sukamora ke he tau fonua tokolalo.

28 Ko e tau solofanua a Solomona ne ta mai ai i Aikupito; ne moua ai he tau tagata fakafua koloa he patuiki ke he tau fuifui, ko e fuifui solofanua mo e hana mena ne fakafua aki.

29 Ne hake mo e fina atu ai e kariota i Aikupito ke he tau sikeli ario ne ono e teau, mo e solofanau ke he taha e teau mo e limagofulu e sikeli ario; ti ta mai ai pihia foki e lautolu ma e tau patuiki oti he tau tagata Heti, mo e tau patuiki Suria.