Esoto

16 TI o ai a lautolu i Ailima kua hohoko atu e fakapotopotoaga oti ni he fanau a Isaraela ke he tutakale, ko Sina, ha he vaha a Ailima mo Sinai, ke he aho hogofulu ma lima he mahina ua tali he o mai a lautolu he motu ko Aikupito.

2 Ti loma ai e fakapotopotoaga katoa he fanau a Isaraela kia Mose mo Arona ke he tutakale.

3 Kua pehe atu foki e fanau a Isaraela kia laua, Ane mamate a mautolu ke he lima a Iehova i Aikupito po kua mitaki, ne nonofo ai a mautolu ke he tapa ulo ne tunu ai e tau maga kakano, ne kai ai foki e mautolu e tau mena kai mo e makona ai; ha kua ta mai e mua a mautolu ke he tutakale nai ke mamate ai e fakapotopotoaga oti nai he hoge.

4 Ti pehe mai a Iehova kia Mose, Kitiala, to fakato hifo e au e mena kai ma mutolu mai he lagi, to o atu foki e motu ke okooko, takitaha e aho mo e mena ke lata ai; kia kamatamata ai e au a lautolu, po ke o mo e haku a fakatufono po ke nakai.

5 Ka hoko ke he aho ono, ti taute e lautolu e mena ne ta mai e lautolu, to lata ia mo e ua e mena kua okooko e lautolu ke he tau aho.

6 Ti tala age ai e Mose mo Arona ke he fanau oti a Isaraela, Ka afiafi ti iloa ai e mutolu, ko Iehova ni kua ta mai a mutolu he motu ko Aikupito.

7 A pogipogi foki, to kitia ai e mutolu e lilifu a Iehova, he kua fanogonogo a ia ke he ha mutolu a loma kia Iehova; ko hai kia a maua kia loma ai a mutolu kia maua?

8 Ti pehe atu a Mose, Ka afiafi to foaki mai ai e Iehova kia mutolu e tau manu ke kai, mo e mena kai ke he magaaho pogipogi kia makona ai a mutolu; ka kua fanogonogo a Iehova ke he ha mutolu a loma kua loma ai a mutolu kia ia; ka ko hai a maua? nakai ko maua kua loma a mutolu ki ai, ka ko Iehova ni.

9 Ti pehe age ai a Mose kia Arona, Tala age a ke he fakapotopotoaga oti he fanau a Isaraela, Kia fakatata mai a mutolu ki mua a Iehova, ha kua fanogonogo a ia ke he loma ha mutolu.

10 Ha ne vagahau atu a Arona ke he fakapotopotoaga oti he fanau Isaraela, kua haga atu a lautolu ke he tutakale, kitiala, ko e lilifu a Iehova kua fakakite mai ke he aolagi.

11 Ti vagahau mai a Iehova kia Mose, kua pehe mai,

12 Kua fanogonogo au ke he loma he fanau a Isaraela; kia tala age a kia lautolu, kua pehe, Ko e magaaho afiafi ke kai ai e mutolu e tau manu, ko e magaaho pogipogi foki ke makona ai a mutolu ke he tau mena kai, ti iloa ai e mutolu ko au ni ko Iehova ha mutolu a Atua.

13 Kua hoko ke he afiafi ti hake mai ai e tau salu, kua ufitia ai e heaga api; ka ko e magaaho pogipogi kua to ai e hahau, kua takai ai e heaga api.

14 Kua hake foki e hahau ne to, kitiala, ha ha he fuga kelekele e tau mena valavala ikiiki, kua ikiiki ni tuga ne hahau tuli ha he kelekele.

15 Kua kitia he fanau a Isaraela, ti pehe age a lautolu; ko e taha ke he taha, Heinoa e mena nei? ha kua nakai iloa e lautolu po ke heigoa. Ti pehe mai a Mose kia lautolu, Ko e mena kai hanai kua foaki mai e Iehova ma mutolu ke kai ai.

16 Ko e mena hanai kua poaki mai e Iehova, Kia okooko ai takitaha e tagata ke lata ke ana kai; ko e omera mo e tagata, fakalata ke he tau tagata ha mutolu ka totou, kia takitaha e tagata mo e uta fakalata kia lautolu ha he fale ie hana.

17 Ti eke pihia ni e fanau a Isaraela, kua okooko e lautolu kua fakalahi he falu, ka e fakatote he falu.

18 Ti fafati e lautolu ke he omera; ko ia ne oko fakalahi nakai fai mena a ia kua toe, ko ia foki ne oko fakatote, nakai hogeia mena a ia, kua takitaha a lautolu mo e okooko ke lata ke ana kai.

19 Ti pehe age a Mose kia lautolu, Aua neke toka e taha ha mena kua toe ato a pogipogi.

20 Ka e nakai fanogonogo a lautolu kia Mose, kua toka he fala tagata e mena ne toe ato a pogipogi, ti tupu ai e tau uaga, to elo; ti vale a Mose kia lautolu.

21 Kua okooko foki e lautolu ke he taha pogipogi mo e taha pogipogi, takitaha e tagata ke lata ke ana kai; kua hake e la, ti liu puke vai ni.

22 Kua hoko ke he aho ono, ti okooko ai e lautolu takiua ni e mena kai, kua takiua e omera mo e tagata takitaha; ti o age ai e tau patu oti he fakapotopotoaga mo e tala age kia Mose.

23 Ti pehe mai a ia kia lautolu, Ko e mena haia ne talahau mai ai e Iehova, Ko e aho a pogipogi ko e okiokiaga ia he sapati tapu kia Iehova; ko e tau mena kua fia tao e mutolu, kia tao a, ko e tau mena kua fia tunu e mutolu, kia tunu a; ko e tau mena oti kua toe kia mutolu, kia toka ia ma mutolu ke toka ai ato a pogipogi

24 Kua toka ai e lautolu ato a pogipogi, tuga ne poaki a Mose; ti nakai elo, ti nakai ha i ai ha uaga.

25 Ti pehe mai a Mose, Kia kai e mutolu e mena ia ke he aho nai, ha ko e sapati e aho nai kia Iehova, nakai moua e mutolu ha mena ke he kelekele ke he aho nai.

26 Ono ni e aho ke okooko ai e mutolu, ka ko e aho fitu ko e sapati ia nakai fai mena ai.

27 Kua hoko ke he aho fitu, ti o age ai e falu a tagata ke okooko mai, ka e nakai moua e lautolu ha mena.

28 Ti pehe mai a Iehova kia Mose, Kua nakai maeke ia mutolu ato a fe ke omaoma haku tau poaki mo e haku tau fakatufono?

29 Kitiala, kua foaki mai e Iehova e sapati ma mutolu, ko e mena ia kua foaki mai ai e ia ke he aho ono e mena kai ke lata mo e ua e aho; kia takitokotaha a mutolu mo e nofo ke he mena kua fa nofo ai, aua neke fano kehe taha mo e mena kua fa nofo ai ke he aho fitu.

30 Ti okioki ai a mutolu ke he aho fitu.

31 Kua fakahigoa he faoa Isaraela e mena ia, ko e manai; na tuga e fua koriano ia, kua hina, kua namu ia poke areto fakalapalapa kua laku mo e meli.

32 Ti pehe mai a Mose, Hanai e mena kua poaki mai e Iehova, Kia fakapuke ai e mutolu e omera, ke toka mo e tau hau ha mutolu a mui, kia kitia ai e lautolu e mena kai ne fagai aki e au a mutolu ke he tutakale, he ta mai e au a mutolu he motu ko Aikupito.

33 Ti pehe age a Mose kia Arona, Uta la e koe taha kato, ti tuku age ai e manai ke fakapuke aki e omera, mo e tuku atu ki mua a Iehova, ke toka mo e tau hau ha mutolu a mui.

34 Tuga ne poaki mai e Iehova kia Mose, ne tuku atu pihia e Arona ki mua he puha he fakatufono, ke toka ai.

35 Ti kua kai manai e fanau a Isaraela ke he tau tau fagofulu ato hohoko a lautolu ke he motu kua kakai, ne kai manai a lautolu ato hohoko ke he katofia he motu ko Kanana.

36 Ko e omera, ko e veveheaga haia ne hogofulu aki e efa.