Numera

21 KUA logona he patuiki ko Arata, ko e tagata Kanana, ne nofo ai ke he fahi toga, kua o mai a Isaraela, ke he puhala ko Atarima, ti tau ai a lautolu mo Isaraela, ti holataki ai e lautolu e falu a lautolu.

2 Ti eke ai e Isaraela hana omonuo kia Iehova kua pehe atu, Kaeke ke tuku mai e koe e motu nai ke he haku a lima; ti fakaotioti ni e au ha lautolu a tau maga.

3 Kua fanogonogo ai a Iehova ke he kupu a Isaraela, ti tuku atu ai e ia e tau tagata Kanana, ti fakaotioti ai e lautolu a lautolu katoa mo e ha lautolu a tau maga; ti fakahigoa ai e ia e mena ia ko Horema.

4 Ti o ai a lautolu he mouga ko Horo ke he puhala ke he tahi Kula, kia takai ai e motu ko Etoma; ti mamahi ai e tau loto he motu ha ko e fenoga.

5 Ti vagahau ai he motu ke he Atua mo Mose, pehe, Kua ta mai he ha e mua a mautolu i Aikupito ke mamate ai ke he tutakale? ha ko e mena nakai fai mena kai, to nakai ni fai vai, kua vihia foki he tau loto ha mautolu e mena kai fakateaga nai.

6 Ti fakafano mai e Iehova e tau gata gagau vevela ke he motu, kua gagau ai e motu, ti mamate ai e tau tagata tokologa ia Isaraela.

7 Ti o mai ai e motu kia Mose, kua pehe mai a lautolu, Kua hala tuai a mautolu, ha kua fai kupu atu a mautolu kia Iehova katoa foki mo koe; kia liogi ā koe kia Iehova kia uta kehe e ia e tau gata ia mautolu. Ti liogi ai a Mose ma e motu.

8 Ti pehe mai a Iehova kia Mose, Kia eke e koe e gata gagau vevela, mo e ta hake ki luga he akau, ti takitaha ia lautolu kua gagau mo e moui ka kitekite a lautolu ki ai.

9 Ti eke ai e Mose e gata apa kula, mo e ta hake ki luga he akau; ti pehe ni, kaeke kua gagau ai ha tagata ke he gata, ka kitekite a ia ke he gata apa kula ti moui ni a ia.

10 Ti o atu ai e fanau Isaraela mo e heapi ai i Opoto.

11 Ti o atu a lautolu i Opoto mo e heapi ai a lautolu i Ie-aperima ke he tutakale kua fehagai mo Moapi, ke he fahi kua hake ai e la.

12 Ti o atu a lautolu he mena ia mo e heapi ai ke he pahua a Sareta.

13 Ti o atu a lautolu he mena ia mo e heapi ai ke he fahi atu a Aranona, ha ha he tutakale ke fina atu ai ke he katofia he tau tagata Amori; ha ko Aranona ko e katofia haia a Moapi ke he vaha a Moapi mo e tau tagata Amori.

14 Ko e mena ia kua pehe mai ai he tohi he tau tau a Iehova, Ko Vaepa i Sufo mo e tau vai lele i Aranona;

15 Ko e āu foki he tau vai lele kua lele hifo ke he mena ne ha i ai a Aro, mo e tafe age ke he katofia a Moapi.

16 Ti o atu ai a lautolu he mena ia ti hohoko atu a lautolu ki Pere; ko e vai keli haia ne pehe mai ai a Iehova kia Mose, Kia fakapotopoto mai e motu, ti ta atu ai e au e vai kia lautolu.

17 Ti lologo ai a Isaraela e lologo nai, Kia puna hake a a koe ma vai keli nae, kia tali atu a mutolu ki ai.

18 Ko e vai keli ne keli ai he tau iki, ne keli ai he tau iki he motu, katoa mo e tau tui, ke he ha lautolu a tau tokotoko. Ti o ai a lautolu he tutakale kua hohoko atu a lautolu ki Matana:

19 Ti o ai a lautolu i Matana kua hohoko atu a lautolu ki Nalielu. Ti o ai a lautolu i Nalielu, kua hohoko atu ai a lautolu ki Pamota.

20 Ti o ai a lautolu i Pamota ke he pahua ha ha he kelekele a Moapi, kua hohoko atu a lautolu ke he tapunu he mouga ko Pisika, kua fehagai mo e tutakale.

21 Ti fakafano atu e Isaraela e tau fekau kia Sikono ko e patuiki he tau tagata Amori, kua pehe atu,

22 Kia toka e koe au ke fina atu ai ke he hau a motu; nakai afe age a mautolu ke he tau fonua po ke tau uluvine; nakai inu foki a mautolu ke he tau vai keli; to o ai ni a mautolu ke he puhala tu he patuiki ato mole atu e tau katofia he hau a motu.

23 Kua nakai mafai a Sikono ke toka a Isaraela ke o atu ai ke he hana motu; ka e fakapotopoto e Sikono hana motu oti, ti fina atu ai a ia ke totoko atu kia Isaraela ke he tutakale; kua hoko atu a ia ki Iaesa, ti tau ai a lautolu mo Isaraela.

24 Ti keli e Isaraela a ia ke he pelu, kua eke ai foki e lautolu hana motu ma lautolu, ke kamata ia Aranona ke hoko atu ki Iapoka, ke hoko atu ni ke he motu he fanau a Amoni; ha ko e mena uka e katofia he fanau a Amoni.

25 Ti fofo e Isaraela e tau maga oti ia, kua nonofo ai foki a Isaraela ke he tau maga oti he tau tagata Amori, ko Hesepona ni mo e hana tau maga oti ne fofo ai e ia.

26 Ha ko Hesepona ko e maga haia a Sikono ko e patuiki he tau tagata Amori; ne tau foki a ia mo e patuiki tuai a Moapi, mo e fofo ai e ia hana motu oti ke hoko ki Aranona.

27 Ko e mena ia kua pehe mai ai a lautolu kua eke e tau kupu fakatai, Kia o mai a kia Hesepona, kia ati hake ai a ia, mo e tauteute ai e maga a Sikono.

28 Ha kua fina atu ai e afi i Hesepona, ko e afi puhopuho mai e maga a Sikono; kua huhunu ai a Aro a Moapi, ko e tau iki he tau mena tokoluga i Aronona.

29 Oi te fakaalofa kia koe, Moapi na e! kua mahaikava tuai a koe, ko e motu ko Kemosa; kua tuku atu e ia hana tau tama tane ke fehola, mo e hana tau tama fifine ke eke mo tau tagata kua fofo he tau kia Sikona ko e patuiki he tau tagata Amori.

30 Kua fana atu e mautolu kia lautolu; kua mahaikava a Hesepona ke hoko ni ki Tipona; kua moumou e mautolu a lautolu kua hoko atu ki Nofa, kua katofia mo Metipa.

31 Kua nonofo a Isaraela ke he motu he tau tagata Amori.

32 Ti fakafano atu ai e Mose falu a tagata ke toko atu ki Isaru, ti fofo e lautolu hana tau maga ne fofo e ia, mo e vega kehe e lautolu e tau tagata Amori ha i ai.

33 Ti liliu a lautolu, mo e o hake ai ke he puhala ki Vasana; ti fina atu ai a Oko ko e patuiki a Vasana ke totoko atu kia lautolu, ko ia katoa mo e hana motu oti ke tau ai i Etirei.

34 Ti pehe mai a Iehova kia Mose, Aua neke matakutaku a koe kia ia; ha ko e mena tuku atu e au ke he hau a lima a ia, mo e hana tau tagata oti, mo e hana motu; kia eke foki e koe kia ia tuga ne eke e koe kia Sikona ko e patuiki he tau tagata Amori, ne nonofo i Hesepona.

35 Ti kelipopo e lautolu a ia, mo e hana tau tama tane, katoa mo e hana tau tagata oti, nakai toe ha tagata tokotaha kia ia; ti eke ai e lautolu hana motu ma lautolu.