Tau Salamo

116 KUA fakaalofa atu au, ha kua fanogonogo mai a Iehova ke he haku a leo, mo e haku a tau ole.

2 Ka kua haga mai hana na teliga kia au, ko e mena ia ke ui atu ai au kia ia ke he haku a moui.

3 Kua agaagai au he tau hele ke mate ai; ne moua au he matematekelea he tukuaga; kua moua e au e matematekelea mo e mamahi.

4 Kua ui atu e au ke he higoa a Iehova, Iehova na e, kua ole atu au kia laveaki e koe au.

5 Kua fakaalofa noa mo e tututonu a Iehova; ko e ha tautolu a Atua kua fakaalofa hohofi a ia.

6 Kua leoleo e Iehova a lautolu kua goagoa; ne lolelole au, ti fakamoui mai ai e ia au,

7 Haku agaga na e, kia liu a koe ke he hāu a okiokihaga; ha kua mahani mitaki mai a Iehova kia koe.

8 Ha kua laveaki e koe au mai he mate; ko e haku tau mata neke tagi, mo e haku tau hui neke veli.

9 To faifano au ki mua a Iehova ke he tau motu he tau tagata momoui.

10 Ne tua au, ko e mena ia ne vagahau atu ai; ko au nai kua mamahi lahi ni au.

11 Ne pehe atu au ke he haku a matakutaku, Kua pikopiko e tau tagata oti kana.

12 Ko heigoa taha mena ke taui aki e au a Iehova he hana mahani mitaki mai oti kana kia au.

13 To toto hake e au e kapiniu he fakamouiaga, mo e ui atu au ke he higoa a Iehova.

14 To ta atu e au kia Iehova ki mua he hana motu oti kana e tau mena ne omonuo ai au.

15 Ko e mena lahi ni ke he manatu a Iehova ka mate hana tau tagata tapu.

16 Iehova na e, kua ole au, ha ko e hāu a fekafekau ni au, ko e hāu a fekafekau au nai, ko e tama he hāu a fekafekau fifine. Kua vetevete ni e koe haku a tau liliaga.

17 To ekepoa e au ke he poa fakaaue kia koe, to ui atu foki e au he he higoa a Iehova.

18 To ta atu e au kia Iehova ki mua hana motu oti kana e tau mena ne omonuo ai au,

19 Ke he tau lotopā he fale a Iehova, ki loto ni ia koe ma Ierusalema na e. Haleluia.