2 Nofoaga he Tau Patuiki

12 KUA fakamau ai e kautu a Rehopoamo, mo e malolo ai a ia; ti tiaki e ia mo Isaraela oti fakalataha mo ia e fakatufono a Iehova.

2 Ko e lima e tau he eke a Rehopoamo mo patuiki ne hake ai e patuiki a Aikupito ko Sisaka ke tau ki Ierusalema, ha kua holifono a lautolu kia Iehova,

3 Ne hake a ia mo e tau kariota ne taha e afe mo e ua e teau, mo e kau heke solofanua ne onogofulu e afe tagata, ka e nakai maeke ke totou e tau tagata ne o mai mo ia i Aikupito; ko e tau tagata Lipua, mo e tau tagata Sukima, mo e tau tagata Aitiope.

4 Ne fofo e ia e tau maga nonofo taue ha ha ia Iuta, ti hoko mai a ia ki Ierusalema.

5 Ti fina atu ai e perofeta ko Semaia kia Rehopoamo mo e tau iki Iuta ne fakapotopoto ai i Ierusalema ha ko Sisaka, kua pehe atu a ia kia lautolu, Kua pehe mai e vagahau a Iehova, Kua tiaki e mutolu au, ko e mena ia kua tiaki ai e au a mutolu ke he lima a Sisaka.

6 Ti fakatokolalo ai e tau iki Isaraela, mo e patuiki, kua pehe atu a lautolu, Kua tututonu a Iehova.

7 Kua fioia e Iehova kua fakatokolalo ai a lautolu, ti hoko mai ai e kupu a Iehova kia Semaia, kua pehe mai, Kua fakatokolalo a lautolu; ti nakai fakaoti ai e au a lautolu, ka to tuku atu e au ke hao fakatote ai a lautolu; ti nakai liligi atu e au haku a ita ki luga a Ierusalema ke he lima a Sisaka.

8 Ka e pete ia to eke a lautolu mo tau fekafekau hana; ke iloa ai e lautolu ke fekafekau mai kia au, mo e fekafekau atu a lautolu ke he tau kautu he tau motu.

9 Ti hake ai e patuiki a Aikupito ko Sisaka ke tau mo Ierusalema, ti uta e ia e tau koloa ha ha he fale a Iehova, mo e tau koloa ha ha he fale he patuiki, ne uta oti ni; ne uta foki e ia e tau akau punuti auro ne eke e Solomona.

10 Ti eke he patuiki ko Rehopoamo e tau akau punuti apa kula ke totogi aki, mo e tuku atu ai e ia ke he tau lima he tau takitaki he kau leoleo, ko lautolu ne leoleo e gutuhala he fale he patuiki.

11 Ka fano foki e patuiki ke he fale a Iehova, ti o mai e kau leoleo mo e uta ai e tau akau punuti, ti liuaki mai ai e lautolu ke he poko he kau leoleo.

12 Ne fakatokolalo a ia, ti liu kehe ai e ita a Iehova ia ia, nakai ni fakaoti e ia a ia; ha ha i ai ia Iuta foki e tau mena mitaki.

13 Ne fakamalolo ai e patuiki ko Rehopoamo i Ierusalema, mo e eke a ia mo patuiki. Ko e fagofulu ma taha e tau a Rehopoamo he eke a ia mo patuiki, ti hogofulu ma fitu e tau he nofo a ia mo patuiki i Ierusalema, ko e maga ia ne fifili e Iehova mai he tau magafaoa oti a Isaraela ke toka ai hana higoa. Ko e higoa foki he hana matua fifine ko Naama haia, ko e fifine Amoni.

14 Ne mahani kelea a ia he nakai manatu ai a ia ke he hana loto ke kumi a Iehova.

15 Ko e tau mena ne eke e Rehopoamo, ko e tau mena fakamua mo e tau mena fakamui, nakai kia tohi ia ke he tau tala he perofeta ko Semaia, mo Ito ko e tagata kitekite ke he tohi he tau matohiaga? Ne tau ni a Rehopoamo mo Ierepoamo ke he tau vaha oti.

16 Kua takoto a Rehopoamo fakalataha mo e hana tau matua, ti tanu ai a ia ke he maga a Tavita. Ti eke e tama hana ko Avia mo patuiki ke hukui aki a ia.