2 Nofoaga he Tau Patuiki

13 KO e tau hogofulu ma valu he patuiki a Ierepoamo, ne eke ai a Avia mo patuiki a Iuta.

2 Ko e tolu e tau he eke ai a ia mo patuiki i Ierusalema. Ko e higoa foki he hana matua fifine ko Mikaia ko e tama fifine a Urielu i Kipea. Ne tau a Avia mo Ierepoamo.

3 Ne kamata ai e Avia e tau, ko e kau hana ko e tau toa malolo ko e fa e teau afe tagata ne fifili; ne tatanaki mai foki e Ierepoamo ke tau mo ia, ko e kau hana ko e valu e teau afe tagata ne fifili, ko e tau toa malolo.

4 Ne tu a Avia i luga he mouga ko Semaraima ha ha he tau mouga a Efaraimo, mo e pehe atu a ia, Ierepoamo na e, mo Isaraela oti, kia fanogonogo mai a a mutolu kia au;

5 Nakai kia iloa e mutolu ne foaki mai e Iehova ko e Atua a Isaraela kia Tavita e kautu ke pule tukulagi a ia kia Isaraela, ko ia mo e hana tau tama tane ke he maveheaga masima?

6 Ka ko Ierepoamo ko e tama a Nepata, ko e fekafekau a Solomona, ko e tama a Tavita, kua tu mai a ia mo fakafualoto a ia ke he hana iki.

7 Kua fakapotopoto atu foki kia ia e tau tagata fakateaga, ko e tau tagata kolokolovao, ti fakamalolo a lautolu mo e totoko atu a lautolu ke he tama a Solomona ko Rehopoamo, ha ko e fuata a Rehopoamo mo e loto lolelole a ia, ti nakai fakamalolo a ia ke totoko atu kia lautolu.

8 Hanai, kua manatu a mutolu ke fakamalolo ke totoko atu ke he kautu a Iehova ha ha he tau tama tane a Tavita; ko mutolu foki ko e motu o tagata tokologa, ha ha ia mutolu foki e tau tama povi auro ne eke e Ierepoamo ma mutolu ke eke mo tau atua.

9 Kua vega kia e mutolu e tau ekepoa a Iehova, ko e fanau a Arona mo e tau tagata Levi, mo e eke e mutolu ma mutolu e tau ekepoa ke tuga ne tau tagata he tau motu kehe? Kaeke ke ta mai he tagata e punua povi tane, mo e fitu e mamoe tane, ke kotofa ai a ia, to eke a ia mo ekepoa kia lautolu, nakai ko e tau atua.

10 Ka e ha ha ia mautolu nai, a Iehova ko e ha mautolu a Atua haia; nakai tiaki e mautolu a ia; ko e tau ekepoa foki kua fekafekau kia Iehova, ko e fanau a Arona, mo e tau tagata Levi kua eke ha lautolu a tau gahua;

11 Kua huhunu e lautolu e tau poa huhunu kia Iehova ke he taha pogipogi mo e taha pogipogi, ke he taha afiafi mo e taha afiafi; mo e tau mena manogi mitaki, mo e tau areto fakatokatoka ki mua i luga he laulau auro mitaki; mo e fakatuaga lamepa auro mitaki mo e hana tau lamepa, ke fakapuho ai ke he taha afiafi mo e taha afiafi; ha kua omaoma a mautolu ke he fekau a Iehova ha mautolu a Atua; ka kua tiaki e mutolu a ia.

12 Ti kitiala, ha ha ia mautolu e Atua kua eke mo iki ne mua; ko e hana tau ekepoa foki mo e tau pu leo fakavivivivi, ke ulo ai mo e leo fakavivivivi kia mutolu. Ko e fanau a Isaraela na e, aua neke tau a mutolu kia Iehova ko e Atua he tau matua ha mutolu; ha ko e mena nakai monuina a mutolu.

13 Ka kua pehe age a Ierepoamo ke takai ai e kau kua tatao ki tua ha lautolu; ti ha ha i ai a lautolu ki mua a Iuta, ha ha i ai foki ki tua ha lautolu e kau kua tatao.

14 Ti haga ki tua a Iuta, kitiala, ha ha i ai e kau ki mua ha lautolu katoa foki mo tua ha lautolu; ti tagi atu ai a lautolu kia Iehova, ne ulo foki he tau ekepoa e tau pu.

15 Ti kalaga e tau tagata Iuta; kua kalaga e tau tagata Iuta, ti ta ai he Atua a Ierepoamo mo Isaraela oti ki mua a Avia mo Iuta.

16 Ti fehola e fanau a Isaraela ki mua a Iuta; ne tuku mai foki he Atua a lautolu ke he tau lima ha lautolu.

17 Ne keli foki e Avia mo e motu hana a lautolu, kua lahi ni e keliaga. Ko e lima e teau afe tagata fifili a Isaraela ne keli.

18 Ti fakatokolalo ai e fanau a Isaraela he vaha ia, ka e kautu e fanau a Iuta, he falanaki a lautolu kia Iehova ko e Atua he tau matua ha lautolu.

19 Kua tutuli e Avia a Ierepoamo, ti fofo foki e ia e tau maga ha ha ia ia, ko Peteli mo e hana tau maga, mo Iesana mo e hana tau maga, mo Eferona mo e hana tau maga.

20 Ti nakai liu malolo foki a Ierepoamo ke he vaha ia Avia; kua ta e Iehova a ia, ti mate ai a ia.

21 Ka e tupu e malolo a Avia, ne faihoana foki a ia ke he tau fifine tokohogofulu ma fa, ti fanau ai e ia tokouafulu ma ua e tama tane, mo e tokohogofulu ma ono e tama fifine.

22 Ko e tau mena ne toe ne eke e Avia, mo e hana mahani, mo e hana tau kupu, kua tohi ke he tala he perofeta ko Ito.