Hosea

11 KO e vaha ne tama tote ai a Isaraela, ne fakaalofa atu ai au kia ia, ne ui ai foki e au haku tama mai Aikupito.

2 Ne ui age a lautolu kia lautolu, ka e o kehe a lautolu ia lautolu; ne eke poa a lautolu kia Paala, mo e huhunu ai e tau mena manogi ke he tau tupua kua ta.

3 Ne fakaako e au a Efaraimo ke fano, ne uta e au a lautolu ke he tau lima haku, ka e nakai iloa e lautolu ko au ne fakamalolo ai a lautolu.

4 Ne toho e au a lautolu ke he tau afo he tagata, ko e tau afo fakaalofa ni; ti ha i ai au ia lautolu tuga e taha ne lagaaki e lakau hahamo mai he tau kauloa ha lautolu, ne tuku atu foki e au e tau mena kai kia lautolu.

5 Nakai liu age a ia ke he motu ko Aikupito, ka to eke e tagata Asuria mo patuiki hana, he nakai mafai a lautolu ke liliu mai.

6 To hoko atu e pelu ke he hana tau maga, to fakamahakava ai foki hana tau iki, mo e fakaoti ai a lautolu, ha ko e tau fifiliaga ha lautolu.

7 Kua manako lahi haku motu ke o kehe ia au, pete he ui e lautolu kia lautolu ke o mai kia ia ne Mua ue atu, ka e nakai ha i ai taha ke fakaheke atu kia ia.

8 Efaraimo na e, kua maeke fefe kia au ke tuku atu a koe? Isaraela na e ke tiaki fefe e au a koe? kua maeke fefe kia au ke tuku atu a koe tuga a Atama? kua maeke fefe kia au ke eke a koe ke tuga a Sipoima? Kua maliu haku loto ki loto ia au; katoa foki mo e fakaalofa hofihofi noa haku kua tupu.

9 To nakai fakahoko atu e au haku a ita lahi; to nakai liu fakamahakava ai e au a Efaraimo; ha ko au ko e Atua, ka e nakai ko e tagata, ko Ia ne Tapu ha i loto ia koe; nakai fina atu au mo e ita.

10 To mumui atu a lautolu kia Iehova, to tagi ni a ia po ke leona; ka tagi a ia ti o mai ai e fanau mo e vivivivi mai he fahi lalo.

11 To o mai a lautolu mo e vivivivi po ke manu lele mai Aikupito, tuga ne lupe foki mai he motu ko Asuria; to fakanonofo foki e au a lautolu ke he tau fale ha lautolu, kua pihia mai a Iehova.

12 Kua agaagai mai a Efaraimo kia au mo e mahani pikopiko, ko e magafaoa a Isaraela kua agaagai mai a lautolu kia au mo e mahani fakavai; ka e mahani fakahanoa agaia a Iuta ke he Atua ko Ia ne Tapu ne fakamoli.