Esekielu

37 NE ha i luga ia au e lima a Iehova; ti uta e ia au ke he Agaga a Iehova mo e tuku ai au ke he kelekele tatai, ne puke ai ke he tau hui atua.

2 Ne takitaki age e ia au ke takai ai ni, ti kitiala, ne loga lahi ni ke he fuga kelekele, ti kitiala, ne magomago lahi ni.

3 Ti pehe mai a ia kia au, Ko e tama he tagata na e, kua maeke nakai ke liu momoui ai e tau hui atua nā? Ti tali age ai e au, Ko e Iki na e ko Iehova kua fioia e koe.

4 Ti pehe mai a ia kia au, Kia perofeta age e koe ke he tau hui atua nā, mo e pehe age a koe ki ai, Ko e tau hui mago na e, kia fanogonogo mai ā ke he kupu a Iehova.

5 Kua pehe mai e vagahau he Iki ko Iehova ke he tau hui atua nā; Kitiala, to fakahu atu e au e agaga ki loto ia mutolu, ti momoui ai a mutolu;

6 To tuku atu foki e au e tau hokohoko kia mutolu, mo e fakatupu hake e au e kakano kia mutolu, mo e ufiufi a mutolu he kili, to tuku atu foki e au e agaga ki loto ia mutolu, ti momoui ai a mutolu; ti iloa ai e mutolu ko au ni ko Iehova.

7 Ti perofeta atu ai e au tuga ne poaki mai kia au; ne perofeta atu e au ti ha i ai e tomumu, ti kitiala, ko e lulululu, ti tutaki ai e tau hui atua, ko e hui ke he hana hui.

8 Ne kitekite atu e au, kitiala, ne tutupu hake e tau hokohoko mo e kakano kia lautolu, ne ufiufi foki a lautolu ke he kili; ka e nakai ha i ai e agaga ki loto ia lautolu.

9 Ti pehe mai a ia kia au, Ko e tama he tagata na e, kia perofeta age a ke he agaga kia perofeta age a, mo e pehe age a a koe ke he agaga, Kua pehe mai e vagahau he Iki ko Iehova; Ko e Agaga na e, kia hau a mai he tau mata matagi ne fa, mo e fafagu atu ke he tau tagata na kua kelipopo, kia momoui ai a lautolu.

10 Ti perofeta age e au tuga ne poaki mai ai kia au, ti hu age ai e agaga ki loto ia lautolu, ti momoui ai a lautolu, mo e tutu ai ki luga he tau hui ha lautolu, ko e kau lahi mahaki ni.

11 Ti pehe mai a ia kia au, Ko e tama he tagata na e, ko e tau hui atua na ko e magafaoa oti ia a Isaraela, kitiala, kua pehe mai a lautolu, Kua mago ha mautolu a tau hui motua, kua fakaoti e amaamanaki ha mautolu; kua mahaikava ni a mautolu.

12 Ko e mena ia kia perofeta atu a, kia pehe atu a koe kia lautolu, Kua pehe mai e vagahau he Iki ko Iehova, Kitiala, haku a motu na e, to hafagi e au e tau tukuaga ha mutolu, to ta hake e au a mutolu mai he tau tukuaga ha mutolu, mo e ta mai e au a mutolu ke he kelekele a Isaraela.

13 Haku motu na e, to iloa ai e mutolu ko au ni ko Iehova, ka hafagi e au e tau tukuaga ha mutolu, mo e ta hake e au a mutolu mai he tau tukuaga ha mutolu.

14 To tuku atu foki e au haku Agaga ki loto ia mutolu, ti momoui ai a mutolu, to fakanonofo foki e au a mutolu ke he kelekele ha mutolu; ti iloa ai e mutolu ko au ni ko Iehova kua vagahau atu, to eke ai foki e au, kua pihia mai a Iehova.

15 Ne hoko mai foki kia au e kupu a Iehova, kua pehe mai,

16 Ko koe na foki, ko e tama he tagata, kia uta e koe taha akau mo e tohi ai e koe Ma Iuta, mo e fanau a Isaraela ko e hana tau matakainaga haia; ti uta foki e koe taha akau mo e tohi ai Ma Iosefa, ko e akau a Efaraimo, katoa mo e magafaoa oti a Isaraela ko e hana tau matakainaga haia.

17 Ti tutaki e koe taha ke he taha ke eke mo akau taha māu; ti eke ai e na akau ia mo akau taha ke he lima hāu.

18 Ka vagahau foki e tau tagata he hāu a motu kia koe, kua pehe atu, Nakai kia fakakite mai e koe kia mautolu e kakano he tau mena ia?

19 Kia tala age e koe kia lautolu, Kua pehe mai e vagahau he Iki ko Iehova, Kitiala, to uta e au e akau a Iosefa ha ha he lima a Efaraimo, mo e tau magafaoa a Isaraela hana tau matakainaga; mo e tuku e au a lautolu fakalataha mo ia, ke fakalataha ni mo e akau a Iuta, to eke foki a lautolu mo akau taha, to eke foki mo akau taha ke he lima hāu.

20 Ko e tau akau foki ne tohi ai e koe, to ha i ai ia ke he lima hāu ki mua ha lautolu.

21 Kia tala age foki e koe kia lautolu, Kua pehe mai e vagahau he Iki ko Iehova, Kitiala, to uta e au e fanau a Isaraela mai he tau motu kehe ne o a lautolu ki ai, mo e fakapotopoto mai e au a lautolu he tau fahi oti mo e ta mai e au a lautolu ke he motu ha lautolu.

22 To eke foki e au a lautolu mo motu taha ke he kelekele he tau mouga a Isaraela; ko e patuiki tokotaha foki ke eke mo patuiki ha lautolu oti kana; to nakai eke foki a lautolu mo tau motu ne ua, to nakai tuai veveheua ai a lautolu ke eke mo kautu ua.

23 To nakai fakakelea foki e lautolu a lautolu ke he tau tupua ha lautolu, po ke tau mena vihiatia ha lautolu, po ke taha he tau holifono ha lautolu; ka to fakamoui e au a lautolu mai he tau mena oti kua nonofo ai a lautolu, ne hala ai a lautolu, to fakameā foki e au a lautolu; to eke a lautolu mo motu haku, to eke foki au mo Atua ha lautolu.

24 Ko e haku a fekafekau foki ko Tavita to eke a ia mo patuiki ha lautolu; to taha foki e leveki mamoe ha lautolu oti; to o ai foki a lautolu ke he tau fakafiliaga haku, mo e omaoma a lautolu ke he haku a tau fakatufono, mo e eke ai e lautolu.

25 To nonofo foki a lautolu ke he motu ne foaki atu e au ke he haku a fekafekau ko Iakopo, ne nonofo ai e tau matua ha mutolu; to nonofo ai a lautolu, ko lautolu, mo e ha lautolu a fanau mo e fanau he ha lautolu a fanau tukulagi; to eke foki haku a fekafekau ko Tavita mo iki ha lautolu tukulagi.

26 To eke foki e au e maveheaga mo lautolu ko e maveheaga ke monuina ai; to eke foki ia mo maveheaga mo lautolu tukulagi; to fakanofo ai e au a lautolu, mo e fakatokologa e au a lautolu, to fakatu ai foki e au haku a faituga ia lautolu tukulagi.

27 To ha i ai foki ia lautolu haku a fale; to eke foki au mo Atua ha lautolu, to eke foki a lautolu mo motu haku.

28 Ti iloa ai he tau motu kehe ko au ni ko Iehova kua fakatapu a Isaraela, ka ha i ai haku a faituga i loto ia lautolu tukulagi.