1 Tau Patuiki

4 KUA eke e patuiki ko Solomona mo patuiki a Isaraela oti.

2 Ko e tau iki ha ha ia ia hanai; ko Asaria ko e tama a Satoka ko e ekepoa;

3 Ko Elihorefa, mo Ahia ko e tau tama a Sisa, ko e tohikupu; ko Iehosafata ko e tama a Ahiluta, ko e tagata fakamau kupu;

4 Ko Penaia ko e tama a Iehoiata, kua pule a ia ke he tau kau; ko Satoka mo Aviata, ko e tau ekepoa ia;

5 Ko Asaria ko e tama a Natano, kua pule a ia kia lautolu ne kotofa ke pule; mo Saputo ko e tama a Natano, ko e ekepoa a ia, ko e kapitiga he patuiki a ia;

6 Ko Akisaro kua pule a ia ke he magafaoa; mo Atoniramo ko e tama a Apeta, kua pule a ia ke he tau poa.

7 Ha ha ia Solomona e tau tagata tokohogofulu ma ua ne kotofa ke pule kia Isaraela oti, kua fagai e lautolu e patuiki mo e hana magafaoa; ko e tagata mo e hana mahina ke he taha tau mo e taha tau ke fagai mai ai.

8 Ko e tau higoa foki ha lautolu hanai; ko e tama a Huro, ke he mouga a Efaraimo.

9 Ko e tama a Tikeru, i Makasa, mo Salapima, mo Petesemesa, mo Aluna-petana.

10 Ko e tama a Heseta i Arupoto; ha ha ia ia a Soko, katoa mo e motu oti ko Heferu.

11 Ko e tama a Apinatapu ha ha ia ia e kelekele tokoluga oti a Toro; ko e hana hoana ko Tafata ko e tama fifine a Solomona.

12 Ko Paana ko e tama a Ahiluta ha ha ia ia a Tanaka, mo Mekito, mo Peteseana oti ni, ne tata age ia ki Saratana i lalo a Isereelu, ne kamata mai i Peteseana, ti hoko atu ki Apelamehola, ke hoko ke he fahi atu a Iokameama.

13 Ko e tama a Kepera i Ramota-Kiliata, ha ha ia ia e tau maga a Iairo ko e tama a Manase ha ha i Kiliata, ha ha ia ia foki e fahi ko Arakopo ha ha i Vasana, ko e tau maga lalahi ne onogofulu, ha ha i ai e tau kaupa mo e tau fakamau fakalava apa kula.

14 Ko Akinatapu ko e tama a Ito ha ha ia ia a Mahanaima.

15 Ko Ahimaasu, i Nafatali, ne fai hoana a ia kia Pasimata ko e tamafifine a Solomona.

16 Ko Paana ko e tama a Husai, i Asera mo Alota.

17 Ko Iehosafata ko e tama a Parua, i Isakara.

18 Ko Semi ko e tama a Ela, i Peniamina.

19 Ko Kepera ko e tama a Uri, ke he motu ko Kiliata, ko e motu a Sikono ko e patuiki he tau tagata Amori, mo Oko ko e patuiki i Vasana, kua kotofa a ia ke pule tokotaha ke he motu.

20 Ne tokologa a Iuta mo Isaraela tuga ne oneone he mataafaga he tokologa kua kai a lautolu, mo e inu, mo e olioli.

21 Ti pule a Solomona ke he kautu oti, ke kamata mai he vailele, ke hoko atu ke he motu he tau tagata Filisitia, ke hoko foki ke he tau katofia a Aikupito; ti ta mai ai e lautolu e tau mena fakaalofa kia Solomona mo e fekafekau a lautolu kia Solomona ke he tau aho oti he hana moui.

22 Ko e tau mena kai a Solomona hanai, ko e taki taha e aho mo e tolugofulu e kori falaoa mitaki, mo e onogofulu e kori he taha falaoa;

23 Ko e tau povi gako ne hogofulu, mo e tau povi totolo ne uafulu mo e tau mamoe ne taha e teau; katoa mo e tau aila, mo e tau sevi, mo e tau iakemura, mo e tau parepuri gako.

24 Ha kua pule a ia ke he tau motu oti ke he fahi mai nai he vailele, ke kamata mai i Tipesa, ke hoko atu ki Kasa, ko e tau patuiki oti he fahi mai nai he vailele. Ti ha ha ia ia e mafola ke he tau fahi oti ne agaagai kia ia.

25 Ti nonofo mo e mafola a Iuta mo Isaraela; ko e takitaha mo e nofo ki lalo hana vine, mo e nofo ki lalo hana mati, ke kamata mai i Tano ke hoko ki Peresepa ke he tau aho oti a Solomona.

26 Ti ha ha ia Solomona e tau mena ke nonofo ai e tau solofanua ne fagofulu e afe ma e tau kariota hana, mo e tau tagata heke solofanua ne toko hogofulu e afe ti ua e afe.

27 Ko lautolu na ne kotofa ke pule ne fagai e lautolu e patuiki ko Solomona, mo lautolu oti ne o mai ke he laulau he patuiki ko Solomona; ko e takitaha mo e hana mahina; nakai ni toe ha mena taha.

28 Ko e tau fua karite foki, mo e tau kakau saito ma e tau solofanua, mo e tau solofanua mafiti, ne uta ai e lautolu ke he tau mena ha ha i ai e tau tagata kua pule, ke takitaha e tagata mo e hana kotofaaga.

29 Kua foaki mai he Atua kia Solomona e iloilo mo e pulotu lahi mahaki ni, mo e loto ke hoko ke he tau mena loga, ke tuga ne oneone ke he mataafaga.

30 Kua mua ni e iloilo a Solomona ke he iloilo he tau tagata oti ke he fahi uta, mo e iloilo oti a Aikupito.

31 Kua mua hana iloilo ke he iloilo he tau tagata oti; kua mua ni kia Etano ko e tagata Esera, mo Hemana, mo Kalakolu, mo Tarata, ko e tama tane a Makolo, ti talahaua a ia ke he tau motu oti ne agaagai ai.

32 Ko e tau fakatai ne fakamatala ai e ia ko e tolu ni e afe; ko e hana tau lologo foki ko e taha ni e afe ti lima e lologo.

33 Ne vagahau foki a ia ke he tau higoa he tau akau ke kamata mai he arasi i Lepanona, he hoko atu ke he isopo ne tapu hake ai ke ne kaupa; ne vagahau ai foki a ia ke he tau higoa he tau manu he vao, mo e tau manu lele, mo e tau mena totolo, mo e tau ika.

34 Ti o mai ai a lautolu mai he tau motu oti ke fanogonogo ai a lautolu ke he iloilo a Solomona, mo e tau patuiki oti he lalologi kua logona ai e tala ke he hana iloilo.