Teutaronome

14 KO mutolu, ko e fanau a Iehova ha mutolu a Atua; aua neke helehele e mutolu ha mutolu a tau kakano, ti ua hifipuga foki e mutolu ha mutolu a tau mualē ha ko e tau tagata mamate.

2 Ko e motu tapu ni a koe kia Iehova hau a Atua, kua fifili ai e Iehova a koe ke eke mo motu mana, ko e koloa uho ke mua ke he tau motu oti ni ke he fuga kelekele.

3 Aua neke kai ai e koe ha mena taha kua fakalialia.

4 Ko e tau manu huifa ke kai ai e mutolu hanai; ko e povi, mo e mamoe, mo e koti,

5 Ko e aila, mo e sevi, ko e iakemura, mo e ako, mo e tisona, mo e teō, mo e somera;

6 Ko e tau manu huifa oti foki ne magaua ai ha lautolu a tau mahina hui, mo e ihiua ai ha lautolu a tau mahina hui ko ia kua liuaki kai foki hana mama he tau manu huifa, ko e tau mena ia ke kai ai e mutolu.

7 Ka ko e tau mena nai, he tau manu kua liuaki kai ha lautolu a mama, mo e tau manu kua magaua ha lautolu a tau mahina hui, kua ihiua ai, ko e kamela, mo e anapata, mo e sifanai; ha ko e mena liuaki kai e lautolu ha lautolu a mama, ka e nakai magaua ai ha lautolu a tau mahina hui; kua kelea ia kia mutolu.

8 Ko e puaka foki, ko e mena magaua hana mahina hui, ka e nakai liuaki kai e ia hana mama, kua kelea a ia kia mutolu; aua neke kai ai e mutolu ha lautolu a kakano, ti ua pipiki atu foki e mutolu ke he tau tino ha lautolu ka mamate.

9 Ko e tau mena nai ke kai ai e mutolu he tau mena oti ke he vai; kia kai e mutolu e tau mena oti kua fai tapakau mo e tau hinafi.

10 Ka ko e tau mena oti kua nakai fai tapakau mo e tau hinafi, aua neke kai ai e mutolu; kua kelea ia kia mutolu.

11 Kia kai ai e mutolu e tau manu lele oti kua mea.

12 Ka e aua neke kai ai e mutolu e tau mena nai; ko e aeto, mo e peresi, mo e oseni,

13 Ko e raa, mo e aie, mo e taie, mo e tau manu ne kakano fakalataha mo ia;

14 Mo e tau oreva oti, mo e tau manu kua kakano fakalataha mo ia;

15 Ko e iaena, mo e takemata, mo e sakafa, mo e nesa, mo e tau manu kua kakano fakalataha mo ia;

16 Ko e kusa, mo e ianesufa, mo e tanisamiti,

17 Ko e kati, mo e rakama, mo e salaka,

18 Mo e kasita, mo e motuku, mo e tau manu kua kakano fakalataha mo ia; ko e tukapiti foki, mo e peka;

19 Ko e tau mena totolo oti foki kua lele kua kelea ia kia mutolu; aua neke kai ai a lautolu.

20 Ko e tau manu lele oti kua mea kia kai ai e mutolu.

21 Aua neke kai a mutolu ha mena ne mate noa; ka kia ta age ia ke he tagata kua nofo paea ai ke he maga hau ke kai ai e ia; po ke fakafua atu ai e koe ke he tagata kehe; ha ko e motu tapu ni a koe ma Iehova hau a Atua. Aua neke tunu e punua koti ke he puke huhu he hana matua.

22 Kia uta ni e koe e mena ne hogofulu aki e tau mena oti ne moua ai he hau a tau fua, ne tutupu mai ai he fonua ke he taha tau mo e taha tau.

23 Ko e mena foki ke fifili e ia ke tuku ai hana higoa, to kai ai e koe ki mua a Iehova hau a Atua e mena ne hogofulu aki hau a tau fua saito, mo e hau a uaina, mo e hau a puke lolo, mo e tau punua uluaki he hau a tau fuifui povi, mo e hau a tau fuifui mamoe; kia ako ai a koe ke matakutaku kia Iehova hau a Atua ke he tau aho ni.

24 Kaeke ke mamao ia koe e puhala, ti nakai maeke a koe ke uta ai; kaeke foki ke vaha mamao mo koe e mena ke fifili e Iehova hau a Atua ke tuku ai hana higoa, ka fakamonuina ai e Iehova hau a Atua a koe;

25 Ti fakafua mai ai e koe e tau tupe, ti pipi fakalataha ai e tau tupe mo e uta ke he hau a lima, mo e fano a koe ke he mena kua fifili ai e Iehova hau a Atua.

26 Ti fakafua mai ai e koe ke he tau tupe e tau mena oti kua manako ai hau a loto, ko e tau povi, po ke tau mamoe, po ke uaina, po ke kava, katoa mo e tau mena oti ni ke manako ki ai hau a loto; ti kai ai e koe e tau mena ia ki mua a Iehova hau a Atua, ti fiafia ai, ko koe, katoa mo e hau a magafaoa.

27 Aua neke tiaki foki e koe e tagata Levi, ha he maga hau; ha ko e mena nakai fai fonua mana po ke tufaaga mana fakalataha mo koe.

28 Ka mole atu e tau tau ne tolu ti uta ai e koe e tau mena ne hogofulu aki hau a tau mena oti kua moua ai e koe ke he tau tau ia, mo e fakapotopoto ai ke he hau a maga;

29 Ko e tagata Levi, (ha kua nakai fai fonua mana po ke tufaaga mana fakalataha mo koe,) ko e tagata kehe foki mo ia kua nakai fai matua, mo e fifine takape, ha he maga hau, to o age a lautolu, mo e kai ai a lautolu mo e makona; kia fakamonuina e Iehova hau a Atua a koe ke he tau gahua oti ni kua eke ai he hau a tau lima.