Tau Salamo

21 IEHOVA na e, kua olioli e patuiki ke he hau a malolo, kua fiafia lahi ni ke he hau a fakamouiaga.

2 Kua foaki e koe kia ia e manako he hana loto; kua nakai lamakai foki a koe kia ia ke he mena ne ole atu hana tau laugutu. Sila.

3 Ha kua mua a koe kia ia mo e monuina kua homo atu; kua tuku e koe ke he hana fufuga e foufou auro mitaki.

4 Ne ole moui a ia ia koe, ti foaki mai ai e koe kia ia e moui leva ke tukulagi tukumuitea.

5 Kua lahi e lilifu hana ha ko e hāu a fakamouiaga; kua tuku e koe ki luga hana e kikila he iki, mo e fulufuluola.

6 Ha kua tuku e koe kia ia e monuina ke hoko ke he tukulagi; kua fakafiafia e koe a ia ke he fiafia ki ho mua.

7 Ha kua tua e patuiki kia Iehova; ha ko e fakaalofa hana ne Mua ue atu kua nakai fagahuatia ai a ia.

8 To moua he hāu a lima a lautolu oti kua fai fi kia koe; to moua hāu a lima matau a lautolu kua fakavihia a koe.

9 To eke e koe a lautolu ke tuga e gutuumu kaka ke he vaha he hāu a ita; to fakaotioti e Iehova a lautolu ke he hana ita, to moumou a lautolu ke he afi.

10 To moumou e koe ha lautolu a tau fua mai he lalolagi, to moumou foki e koe ha lautolu a fanau mai he tau fanau he tau tagata.

11 Ha kua fafati tuai e lautolu e mena kelea ke hoko kia koe; kua manamanatu e lautolu e lagatau kelea, ka e nakai maeke ia lautolu.

12 Ha ko e mena fakahaga tua mai e koe a lautolu, ka taute e koe e filo kaufana hau ke fana atu kia lautolu.

13 Iehova na e, kia mua ue atu a koe ke he hāu a malolo; to lologo mo e talahau atu e mautolu hāu a malolo.