Tau Salamo
105 KIA fakaheke atu a mutolu kia Iehova; kia ui atu ā ke he hana higoa; kia fakailoa atu e mutolu ke he tau motu hana tau mena ne eke.
2 Kia lologo atu a mutolu kia ia, kia uhu lologo a mutolu kia ia; kia talahau atu a mutolu hana tau mana oti.
3 Kia fiafia a mutolu ke he hana higoa tapu; kia kolikoli e tau loto ha lautolu kua kumi kia Iehova.
4 Kia kumi a mutolu kia Iehova mo e hana malolo; kia kumi ke he hana fofoga nakai noa.
5 Kia manatu a mutolu ke he hana tau mena fakaofo ne eke e ia, ko e hana tau mana, katoa mo e tau fakafiliaga he hana fofoga;
6 Ko mutolu e fanau a Aperahamo hana fekafekau, ko e tau tama a Iakopo ne fifili e ia.
7 Ko ia ni ko Iehova ko e ha tautolu a Atua; ha ha he lalolagi oti kana hana tau fakafiliaga.
8 To manatu tukulagi e ia hana maveheaga, ko e kupu ne poaki e ia ke he tau hau ne taha e afe.
9 Ko e maveheaga ne eke e laua mo Aperahamo, mo e hana omonuo kia Isaako;
10 Ne fakamoli foki e ia kia Iakopo ke eke mo fakatufono ko e maveheaga tukulagi kia Isaraela;
11 Ne pehe atu kia ia, To ta atu e au kia koe e kelekele ko Kanana, ko e tufaaga ia he fonua ha mutolu;
12 Ka kua tokogaogao agaia a lautolu, kua tokogaogao ni, mo e tau tagata kehe a lautolu i ai.
13 Ne o fano foki a lautolu ke he taha motu mo e taha motu, mai he taha fahi kautu ke he taha motu.
14 Nakai toka e ia taha tagata ke favale atu kia lautolu; ne akonaki atu e ia e tau patuiki ha ko lautolu.
15 Kua pehe atu ki ai, Aua neke piki atu kia lautolu ne fakauku e au; aua foki neke mahani kelea ke ke haku a tau perofeta.
16 Ne ui atu foki e ia kia hoko e hoge ke he motu; ne papaki e ia e tokotoko he tau mena kai oti.
17 Ne fekau atu e ia e tagata ke mua atu kia lautolu, ko Iosefa ia ne fakafua ke eke mo tupa.
18 Ne fakamamahi e lautolu hana tau hui he lili; ne hoko ni a ia ke he lapatoa;
19 Kua hoko ke he vaha ne fakamoli ai hana kupu, ko e kupu a Iehova ne kamatamata ai kia ia.
20 Ne fekau atu he patuiki falu ke vevete a ia; ko ia ne pule ke he tau motu ne fakatoka noa e ia a ia.
21 Kua kotofa e ia a ia ke eke mo iki he hana magafaoa, mo e pule ke he hana tau mena oti kana.
22 Kia lili e ia hana tau iki ke he hana pule ni, mo e fakaako atu hana tau tui kia iloilo.
23 Kua hoko atu foki a Isaraela ki Aikupito, ne api foki a Iakopo ke he motu ko Hamo.
24 Ne fakatokologa foki e ia hana motu, kua fakamalolo e ia a lautolu ke mua kia lautolu kua favale kia lautolu.
25 Ne fakamafoki e ia e tau loto ha lautolu ke fakavihia hana motu, mo e eke lagatau kelea ke he hana tau fekafekau.
26 Ne fekau atu e ia hana fekafekau ko Mose, ko Arona foki ne fifili e ia.
27 Ne tuku atu e laua kia lautolu e tau fakamailoga hana, ko e tau mana ke he motu ko Hamo.
28 Kua fekau atu e ia e pouli, ti fakapouligia ai, nakai totoko foki ke he hana tau kupu.
29 Ne liu e ia ha lautolu a tau vai ke he toto, mo e tamate ha lautolu a tau ika.
30 Ne fakatupu fakaloga e tau rane ke he kelekele ha lautolu, kua hoko ni ke he tau poko he tau patuiki ha lautolu.
31 Ne tala age a ia, ti o mai ai e fuifui garova, mo e tau kutu, ke he tau fahi oti he motu ha lautolu.
32 Ne āge e ia e uha tuli mo uha kia lautolu, mo e afi puho ke he ha lautolu a motu.
33 Kua ta foki e ia ha lautolu a tau vine mo e ha lautolu a tau mati; ne pakipaki foki e ia e tau akau he ha lautolu a motu.
34 Ne vagahau a ia, ti o mai ai e tau hē akerisi mo e tau hē aleki kua nakai maeke ke totou.
35 Ti kai ai ni e tau vao ikiiki oti he motu ha lautolu, kua kai ni e tau fua he ha lautolu a kelekele.
36 Ne kelipopo e ia e tau uluaki oti kana he motu ha lautolu, ko e mataulu ni he malolo oti ha lautolu.
37 Ne uta e ia a lautolu mo e ario katoa mo e auro; nakai fakai ha tagata lolelole ke he tau magafaoa ha lautolu.
38 Kua fiafia a Aikupito he o atu a lautolu; ha kua to kia lautolu e matakutaku ha ko lautolu.
39 Ne fofola e ia e aolagi ke eke mo fakamaluaga, ko e afi foki ke fakamaama aki ke he po.
40 Ne ole atu e lautolu, ti ta atu e ia e tau salu, mo e mena kai mai he lagi ne fakamakona ai e ia a lautolu.
41 Ne hafagi e ia e maka tumau ti tafe mai ai e vai; kua lele ni ke he tau tutakale momo, ko e vai lele ni.
42 Ha kua manatu e ia hana kupu tapu ke he hana fekafekau ko Aperahamo.
43 Ne ta mai e ia hana motu mo e kolikoli, ko lautolu ne fifili e ia ne ta mai e ia mo e leo fiafia.
44 Ne āge foki e ia kia lautolu e tau fonua he tau motu kehe; ti moua e lautolu e tau mena ne gahua ai e tau motu;
45 Kia taofi e lautolu hana tau fakatufono, mo e omaoma ke he hana tau fakatufono. Haleluia.