Tau Salamo

62 Ko e Atua hokoia ni ne fakamate ai au; mai ia ia ni haku a fakamouiaga.

2 Ko ia hokoia ni e maka tumau haku, mo e haku a fakamouiaga, mo e haku a kolo tokoluga; nakai fagahuatia lahi au.

3 To feoho mai a mutolu ke he tagata ato a fe? to keli tagata kia e mutolu oti? tuga ne pa veli a ia, tuga ne pa kua tulei hifo.

4 Taha ni e mena ne fifili ai e lautolu, po ke tulei hifo fefe a ia mai he hana lilifu; kua fiafia a lautolu ke he pikopiko; kua fakamonuina e lautolu ke he tau gutu ha lautolu, ka kua kaialu ke he tau loto ha lautolu. Sila.

5 Haku agaga na e, ko e Atua hokoia ke tatali fakatekiteki ki ai a koe; ha ko e mena mai ia ia haku a amaamanaki.

6 Ko ia hokoia ko e haku a maka tumau, mo e haku a fakamouiaga, haku a kolo tokoluga; nakai fagahuatia au.

7 Ha ha he Atua haku a fakamouiaga; mo e haku a lilifu; ko e haku a maka tumau mo e haku a taue ha ha he Atua ia.

8 Ko e motu na e, kia tua a mutolu kia ia ke he tau vaha oti; kia fakatokanoa e mutolu ha mutolu a tau loto ki mua hana; ko e ha tautolu a taue ko e Atua ia. Sila.

9 Ko e mena fakateaga hokoia e tau lalo tagata, ko e pikopiko foki e tau iki; ka fafati a lautolu ke he fua tautau ti hake taha, kua māmā a lautolu fakalataha, ka e mamafa e mena fakateaga.

10 Ua tua a mutolu ke he favale; aua foki neke hula noa ke he mena kua fofo; kaeke ke fakalahi e koloa, aua neke hagao ha mutolu a tau loto ki ai.

11 Ne talahau mai laga taha he Atua: ne logona lagaua e au e mena nai; ha ha he Atua e malolo.

12 Ko e Iki na e, ha ha i ai foki ia koe e fakaalofa; ha ko koe ni ke taui atu ke he tau tagata takitokotaha ke lata mo e ha lautolu a gahua.