Ieremia

52 KO e uafulu ma taha e tau tau a Setekaia he eke a ia mo patuiki; ti hogofulu ma taha e tau he patuiki ai a ia i Ierusalema; ko e higoa he hana matua fifine ko Hamutala ko e tama fifine a Ieremia ko e tagata Lipena.

2 Ne eke ai e ia e mahani kelea ki mua a Iehova, tuga ne tau mena oti ne eke e Iehoakima.

3 Ha ko e ita a Iehova ki Ierusalema mo Iuta, ne hoko ai kia tiaki e ia a lautolu mai mua hana, ti fakafualoto ai e Setekaia ke he patuiki a Papelonia.

4 Ne hiva e tau, ti hogofulu e mahina he eke ai a ia mo patuiki, ko e aho hogofulu he mahina ti hau ai e patuiki a Papelonia ko Nepukanesa, ki Ierusalema, ko ia mo e hana kau oti, ti heapi ai a lautolu, mo e eke takai ai e lautolu e tau kolo ke tau mo ia.

5 Ti pa takai ai e maga kua hoko ke he tau hogofulu ma taha he patuiki ko Setekaia.

6 Ko e mahina fa foki ko e aho hiva he mahina ne liti patu ai e hoge ke he maga, ti nakai fai mena kai ma e tau tagata he motu.

7 Ti maona ai e maga, ti fehola ai e kau oti he po ke he puhala ke he gutuhala, ke he vaha he na kaupa ua, ne tata age ke he kaina he patuiki; (ne agaagai foki e maga he tau tagata Kaletaia;) ne o foki a lautolu he puhala ke he kelekele tatai.

8 Ti tutuli he kau he tau tagata Kaletaia e patuiki, ti moua ai e lautolu a Setekaia ke he kelekele tatai a Ieriko; ti fakamavehevehe mai ia ia hana kau oti kana.

9 Ti tapaki e lautolu e patuiki mo e ta hake e lautolu a ia ke he patuiki a Papelonia i Ripelā, ke he motu ko Hamato; ti vagahau ai a laua mo ia ke he fakahala.

10 Ti kelipopo ai he patuiki a Papelonia e tau tama tane a Setekaia ki mua hana; ne kelipopo foki e ia e tau iki oti a Iuta i Ripelā.

11 Ne fakapouli foki e ia e tau mata a Setekaia; ti lili he patuiki a Papelonia a ia ke he na liliaga apa kula ua; ti uta ai a ia ki Papelonia, ti tuku atu a ia ke he fale puipui, kua hoko ni ke he aho ne mate ai a ia.

12 Ko e lima mahina ko e aho hogofulu he mahina, ko e tau hogofulu ma hiva haia he patuiki ko Nepukanesa, ko e patuiki a Papelonia, ne hau ai ki Ierusalema, e takitaki he kau leoleo ko Nepusatana, ko ia ne tu ki mua he patuiki a Papelonia.

13 Ti huhunu ai e ia e fale a Iehova, mo e fale he patuiki, katoa mo e tau fale oti i Ierusalema, ko e tau fale lalahi oti ni ne huhunu ai e ia ke he afi.

14 Ne ulu moumou foki he kau oti he tau tagata Kaletaia, ne ha i ai mo e takitaki he kau leoleo e kaupā oti ne takai aki a Ierusalema.

15 Ko e falu foki he tau tagata nonofogati he motu, mo lautolu ne toe he motu ne ha i ai agaia ke he maga, mo lautolu ne fehola, ne fehola atu ke he patuiki a Papelonia, katoa mo lautolu ne toe he motu o tagata, ne fakapaea atu he takitaki he kau leoleo ko Nepusatana a lautolu.

16 Ka e toka ai he takitaki he kau leoleo ko Nepusatana, e falu ko e tau tagata nonofogati he motu, ke eke mo tau tagata taute vine, mo e tau tagata gahua fonua.

17 Ko e tau pou apa kula foki ne ha i ai ke he fale a Iehova, mo e tau tuaga kumete, katoa mo e vai apa kula ne ha i ai ke he fale a Iehova, ne lipilipi ai he tau tagata Kaletaia, ti uta ai e lautolu e apa kula oti ia ki Papelonia.

18 Ne uta foki e lautolu e tau ulo, mo e tau aku, mo e tau helehelevavae, mo e tau kapiniu, mo e tau lehu, katoa mo e tau mena apa kula oti ni ne eke aki e lautolu e fekafekauaga.

19 Ko e tau kumete foki, mo e tau kumete ma e tau efuefu afi, mo e tau kapiniu, mo e tau ulo, mo e tau fakatuaga lamepa, mo e tau Iehu, mo e tau kumete ke liligi ki ai, ko e auro ko e tau mena ne eke aki he auro, mo e ario ko e tau mena ne eke aki he ario, ne uta he takitaki he kau leoleo.

20 Ko e tau pou ne ua, mo e vai ne taha, mo e tau povi apa kula hogofulu ma ua ha ha i lalo he tau tuaga kumete, ne eke he patuiki ko Solomona ma e fale a Iehova; nakai ni fafati e mamafa he apa kula he tau mena oti na.

21 Ko e tau pou foki, ko e loa he taha pou ko e hogofulu ma valu e kaupita; ko e fafati foki ne takai aki, ko e hogofulu ma ua e kupita ia; ko e hana matolu ne lata ia mo e laulahi he fa e matalima; ne takōkō ni.

22 Ko e kapetala apa kula foki ha i luga hana; ko e loa he taha kapetala ko e lima e kupita; ko e mena kua taute po ke kupega mo e tau rimoni ha ha he kapetala ne takai aki, ko e apa kula oti ia; ti tuga ne tau mena ia e tau mena ke he pou ne ua aki, katoa foki mo e tau rimoni.

23 Ne ha i ai foki ke he hana tau fahi hivagofulu ma ono e rimoni; ko e tau rimoni oti ha ha i luga he tau mena kua taute po ke kupega, ko e taha e teau ne takai aki.

24 Ne uta foki he takitaki he kau leoleo a Seraia ko e ekepoa ne mua, mo Sefanaia ko e ekepoa he vahega ne ua aki, katoa mo e tau leoleo gutuhala tokotolu;

25 Ti uta foki e ia mai he maga taha fekafekau ne mua ne kotofa ke pule ke he kau, mo e tau tagata tokofitu ia lautolu ne kitia e fofoga he patuiki, ne moua a lautolu ke he maga, mo e tohikupu he takitaki kau, ne fakapotopoto ai e tau tagata he motu; katoa mo e tokoonogofulu e tagata he motu ne moua ai ki loto he maga.

26 Ti uta he takitaki he kau leoleo ko Nepusatana a lautolu, mo e takitaki age e ia a lautolu ke he patuiki a Papelonia i Ripelā.

27 Ti keli he patuiki a Papelonia a lautolu, ne tamate ai e ia a lautolu i Ripelā, ke he motu ko Hamato. Ti fakapaea a Iuta mai he kelekele ha lautolu.

28 Ko e tau tagata ne fakapaea ai e Nepukanesa hanai, ko e tau fitu ne fakapaea e tau tagata Iuta, ko e tolu e afe mo e uafulu ti tolu e tagata.

29 Ko e tau hogofulu ma valu a Nepukanesa, ne uta ai e ia i Ierusalema, tokovalu e teau, mo e tolugofulu ti ua e tagata.

30 Ko e tau uafulu ma tolu a Nepukanesa, ne fakapaea ai he takitaki he kau leoleo ko Nepusatana, ko e tau tagata Iuta ne tokofitu e teau, mo e fagofulu ti lima e tagata. Ko e katoatoa ko e tokofa e afe mo e ono e teau e tagata.

31 Kua hoko ke he tau tolugofulu ma fitu he paeaaga a Iehoakina ko e patuiki a Iuta ko e mahina hogofulu ma ua, ko e aho uafulu ma lima he mahina, ti fakatokoluga ai e ulu a Iehoakina ko e patuiki a Iuta mo e ta mai ai a ia he fale puipui he pule he patuiki a Papelonia ko Evile-merota ke he tau ne eke ai a ia mo patuiki;

32 Ti vagahau atu e ia mo e fakaalofa kia ia, mo e tuku atu e ia hana nofoaiki ke mua ke he tau nofoaiki he tau patuiki ne ha i ai mo ia i Papelonia;

33 Ti totogi aki e ia hana tau tapulu ne tapulu ai a ia ke he fale puipui; ti kai mena ai a ia nakai noa ki mua hana ke he tau aho oti he hana moui.

34 Ko e hana tufaaga foki, ko e tufaaga mau, ne momoi atu kia ia he patuiki ke he taha aho mo e taha aho, ke hoko ke he aho ne mate ai a ia, ko e tau aho oti he hana moui.