Kalatia

5 KO e hanai, kia tumau a mutolu ke he tokanoaaga ne fakatoka noa mai ai e Keriso a tautolu, ka e aua neke liu foki taofi a mutolu he akau hahamo he fakatupa.

2 Kitiala, ko au ko Paulo, kua tala atu e au kia mutolu, kaeke ke peritome a mutolu, ti nakai tuai aoga a Keriso kia mutolu.

3 Kua liu foki fakatonu atu e au ke he tau tagata oti kua peritome, ha ha i ai ia lautolu ke eke e tau mena oti he fakatufono.

4 Kua vevehe kehe fakaoti a mutolu mo Keriso, ko mutolu kua talahaua tututonu he fakatufono, kua veveli a mutolu mai he fakaalofa noa.

5 Ha ko e Agaga kua fakatalitali atu ai a mautolu ke he amaamanaki ke he tututonu mai he tua.

6 Ha ko e mena nakai aoga e peritome, po ke nakai peritome kia lautolu ha ha ia Keriso Iesu, ka ko e tua kua gahua ni ke he fakaalofa.

7 Ne tafepoi fakamitaki a mutolu, po ko hai kia ne fakalavelave a mutolu kia nakai omaoma a mutolu ke he kupu moli?

8 Nakai mai ia ia ne ui ai a mutolu e ole ia.

9 Kua fakaea e lakuaga falaoa oti ke he mena tote ke fakaeaaki.

10 Kua tua ni au kia mutolu ke he Iki, nakai loto a mutolu ke he taha mena kehe; ka ko ia kua fakalavelave a mutolu to toka ki luga ia ia hana fakahala, ka e nakai mailoga po ko hai.

11 Ka ko au, ko e tau matakainaga na e, kaeke kua fakamatala agaia e au e peritome, ko e ha kia ne favale mai ai kia au? kaeke kua pihia kua fakaotioti tuai e mena he satauro kua tupetupe ai.

12 Ko e haku a manako kia vevehe kehe a lautolu kua fakalagalaga a mutolu.

13 Ha kua ui ai a mutolu, ko e tau matakainaga na e, ke he tokanoaga; ka ko e mena nai hokoia, aua neke eke e tokanoaga mo lagatau he tino; ka kia fekafekau a mutolu ko e taha kia taha ke he fakaalofa.

14 Ha ko e mena kua katoatoa e fakatufono oti ke he kupu ne taha, hanai, Kia fakaalofa atu a koe kia ia ne katofia a mua, kia tuga na koe kia koe ni,

15 Kaeke kua fegagauaki mo e fekaiaki e mutolu, a mutolu, neke fakaotioti e mutolu a mutolu.

16 Kua tala atu e au, kia mahani a mutolu ke lata mo e Agaga, ti nakai eke ai e mutolu e tau manako lahi he tino,

17 Ha ko e tino kua lahi hana manako ke totoko atu ke he Agaga, kua lahi foki e manako he Agaga ke totoko atu ke he tino; ka kua fetokoaki a laua na, ko e mena ia kua nakai eke ai e mutolu e tau mena kua loto ki ai.

18 Kaeke kua takitaki a mutolu he Agaga ti nakai nonofo a mutolu ke he fakatufono.

19 Kua maliali foki e tau gahua he tino, ko e tau mena pehenai; ko e faivao, ko e feuaki, ko e mahani kelea, ko e matahavala,

20 Ko e hufeilo ke he tupua, ko e eke lagatau he taulaatua, ko e feitaaki, ko e taufetoko, ko e ita tafuā, ko e vale, ko e lagalagahou, ko e feveheveheaki, ko e tau veveheaga,

21 Ko e mahekeheke, ko e keli tagata, ko e konahia, ko e tafeauhi, mo e tau mena pihia; kua tala atu tuai nai e au kia mutolu, tuga ne tala atu e au ne aho mua, ko lautolu kua eke e tau mena pihia, nakai eke ma lautolu e kautu he Atua.

22 Ka ko e fua he Agaga ko e fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua,

23 Ko e mahani molu, mo e manako fakalatalata; kua nakai fai fakatufono ke he tau mena pihia.

24 Ka ko e tau tagata a Keriso, ne fakasatauro e lautolu e tino, mo e hana tau foliaga, mo e hana tau manako lahi,

25 Kaeke ko e Agaga kua momoui ai a tautolu, kia mahani foki a tautolu ke lata mo e Agaga.

26 Aua neke eke a tautolu mo tau tagata hula noa, aua neke fepalekoaki a tautolu, aua neke mahekeheke a tautolu ko e taha kia taha.