Isaia

6 KO e tau ne mate ai e patuiki ko Usia, ne kitia e au e Iki kua nofo ki luga he nofoaiki tokoluga mo e nofoaiki ne mua he tokoluga, ko e kala foki he hana tapulu ne puke ai e faituga.

2 Ti tutu ai ki luga e tau sirafi, ne takitaha a lautolu mo e tau tapakau ne ono, ko e tau tapakau ne ua ne ufiufi ai e ia hana fofoga, ko e ua ne ufiufi ai e ia hana tau ve ko e ua foki ne lele ai a ia.

3 Ti ui e taha ke he taha, kua pehe age, Kua tapu, kua tapu, kua tapu a Iehova Sapaota; kua puke ai e lalolagi oti ke he hana lilifu.

4 Ti luelue ai e tau fakaveaga he tau akau fakalava he tau gutuhala ke he leo hana ne ui ti puke ai e fale ke he ahua.

5 Ti pehe atu ai au, Oi te fakaalofa kia au! kua malaia ni au; ha ko au ko e tagata laugutu kelea, ti nofo foki au fakalataha mo e tau tagata laugutu kelea; kua kitia ni haku tau mata e Patuiki ko Iehova Sapaota.

6 Ti lele mai kia au taha sirafi, ha ha he lima hana e malala kaka, ne ta mai ai e ia ke he apita mai luga he fatapoa.

7 Ti fakapiki mai ai e ia ke he haku gutu, mo e pehe mai, Kitiala, kua piki atu e mena nai ke he hāu a tau laugutu, kua uta kehe ai hāu a mahani kelea, kua fakamagalo ai hāu a tau hala.

8 Ti logona ai e au e leo he Iki, kua pehe mai, Ko hai ke fakafano atu e au? ko hai foki ke fano ma mautolu? Ti pehe atu au, Ko au hanai, kia fakafano atu e koe au.

9 Ti pehe mai a ia, Ati fano ā, ti pehe atu a koe ke he motu na, Kia fanogonogo a mutolu ka e nakai logona e mutolu; kia kitekite foki a mutolu ka e nakai kitia e mutolu.

10 Kia fakamatolu ai e tau loto he motu nai, ti fakatuli ai ha lautolu a tau teliga, mo e fakapouli ai ha lautolu a tau mata; neke kitia ha lautolu a tau mata, mo e fanogonogo ha lautolu a tau teliga, mo e logona ha lautolu a tau loto, mo e mafokifoki mai a lautolu, ti fakamalolo ai e au a lautolu.

11 Ti pehe atu au, Ko e Iki na e, ato a fe kia? Ti pehe mai a ia, Ato toka noa e tau maga he nakai nofo ai taha, mo e nakai fai tagata ke he tau fale, ti eke mo vao e kelekele,

12 Ato uta mamao foki e Iehova e tau tagata, ti lahi e kelekele ke he motu kua tiaki.

13 Ka e pete ia, to ha i ai ni hana mena ne hogofulu aki, ka e liu huhunu ai a ia; ka e tuga ne tapeneto mo e aluna kua hio ki lalo, ne toka agaia e tagutugutu; to eke e fanau tapu mo tagutugutu hana.