Heperu

9 HANAI foki, ha he maveheaga fakamua e tau poaki ke he fekafekauaga mo e mena tapu fakalata ke he lalolagi.

2 Ha kua taute e fale ki mua, kua talahaua ko e mena tapu, ne toka ai e tokaaga lamepa, mo e laulau, mo e tau areto kua fakatoka ki mua;

3 Ka ko e fahi atu he ie puipui ne ua ko e mena haia kua talahaua ko e mena tapu ue atu,

4 Ne toka ai e kapiniu auro ke huhunu ai e mena manogi, mo e puha he maveheaga kua fakakili ke he auro, ha i ai e kapiniu auro hokulo ne toka ai e manai, mo e tokotoko a Arona ne tupu, mo e tau lapa maka he maveheaga;

5 Ha i luga foki hana e tau kerupi kikila kua fakamalu ai e nofoa fakaalofa; ko e mena haia nakai fakamatala takitaha ainei.

6 Hanai, kua tauteute pihia e tau mena ia, ti kua huhu mau e tau ekepoa ke he fale i mua; mo e eke ai ha lautolu a tau fekafekauaga;

7 Ka ko e mena ki tua, takilagataha ke he tau tau ne hu ai e ekepoa ne mua hokoia, ka e nakai noa foki mo e toto, ke eke ai e ia e poa māna, katoa foki mo e tau hala he motu.

8 Kua fakailoa mai ai he Agaga Tapu, kua nakaila fakakite mai e puhala ke he mena tapu ue atu, ka kua tu agaia ni e fale i mua;

9 Ko e mena fakatai haia kua hoko ke he vaha nai, kua eke ai e tau poa mo e tau poa tamate, kua nakai maeke he fakakatoatoa ai a ia kua fekafekau ai ke he tau mena he loto manamanatu,

10 Ko e tau mena kai hokoia, mo e tau mena inu, mo e tau holoholoaga kehekehe, mo e tau poaki ke he tau mena he tino, ato hoko ke he vaha ke liu foki fakafou ai.

11 Ka kua haele mai a Keriso, ko e ekepoa ne mua ke he tau mena mitaki nakaila hohoko mai, ke he fale uta fano kua mua he mitaki, mo e katoatoa, kua nakai eke he tau lima, ko e hana kakano kua nakai eke tuga e lalolagi nai;

12 Lagataha ne hu atu a ia ke he mena tapu, nakai mo e tau toto he tau koti, po ke tau povi, ka ko e hana toto ni, kua moua e ia e fakamouiaga tukulagi ma tautolu.

13 Ha ko e mena kaeke ko e tau toto he tau povi tane mo e tau koti, mo e efuefu he punua povi fifine kua pīpī aki a lautolu kua kelea, kia fakatapu ai ke mea ai e tino;

14 Ka e nakai kia mua e toto a Keriso, ko ia ne tuku atu e ia a ia kua nakai fai kelea ke he Agaga tukulagi ke eke mo poa ke he Atua, ke fakamea ha mutolu a tau loto manamanatu mai he tau gahua ke mamate ai, kia fekafekau ai a mutolu ke he Atua moui?

15 Ko e mena foki ia kua eke ai a ia mo hulalo he maveheaga fou, ha ko e hana matulei ke lukutoto aki e tau hala ne eke ke he maveheaga fakamua, kia moua ai e lautolu kua uiina e tufaaga tukulagi kua talahaua mai.

16 Ha ko e mena kaeke kua eke e maveheaga, nakai aoga e maveheaga ia ato mate a ia ne eke.

17 Ha ko e mena kua mau e maveheaga ka mamate a lautolu ne eke ka kua nakai aoga ka moui a ia hana e maveheaga.

18 Ha ko e mena nakai fakapa e maveheaga fakamua ka noa mo e toto.

19 Ha ko e mena kua oti e talahau atu e Mose e tau poaki oti ke he motu gotoa ke lata mo e fakatufono, ti toto ai e ia e toto he tau tama povi mo e tau koti, katoa mo e vai, mo e fulufulu kula he mamoe, mo e hisopo, kua pīpī ai e tohi katoa mo e tau tagata oti kana,

20 Mo e pehe atu, Ko e toto hanai he maveheaga kua poaki atu he Atua kia mutolu.

21 Ko e fale uta fano foki katoa mo e tau mena oti ke fekafekau aki ne pīpī ai pihia e ia ke he toto.

22 Toe tote foki e tau mena oti kana kua fakamea ai ke he toto kua lata mo e fakatufono; kaeke foki kua nakai fakamaligi mai e toto, ti nakai fai fakamagaloaga.

23 Ko e mena ia kua lata ai ke fakamea e tau mena fakatai he tau mena ha he lagi ke he tau mena ia, ka ko e tau mena he lagi, to fakamea ia ke he tau poa kua mua e mitaki ke he tau mena ia.

24 Ha kua nakai haele atu a Keriso ke he tau mena tapu kua eke he tau lima, ko e fakatai haia ke he tau mena moli, ka ko e lagi ni, kua fakakite ainei a ia ki mua he Atua ma tautolu;

25 Ka e nakai tuku mau atu e ia a ia ke eke mo poa, tuga e ekepoa ne mua kua hu atu a ia ke he mena tapu ke he taha tau mo e taha tau mo e toto kehe.

26 Ha ko e mena ane mai ne pihia po kua lata laga loga kia ia ke mamahi ai tali mai he fakaveaga he lalolagi; ka ko e hanai, laga taha ni kua fakakite mai a ia ke he fakakatoatoaga he tau tau ke uta kehe ai e hala, he eke e ia a ia mo poa.

27 Tuga foki e kotofa ke he tau tagata laga taha ke mamate, ka mole ia ko e fakafiliaga;

28 Ti pihia foki e Keriso, laga taha ni kua eke a ia mo poa ke fua ai e tau hala he tau tagata tokologa, to fakakite foki a ia kia lautolu kua tatali kia ia ke he hana lagaua mai, nakai ke fua ai e tau hala, ka kia momoui ai a lautolu.