Esoto

38 KUA eke foki e ia e fatapoa ke eke ai e tau poa huhunu, ke he akau ko e sitima, lima ni e kupita hana loa, ti lima e kupita hana laulahi, kua fakafahifa tatai, ti tolu e kupita hana tokoluga.

2 Ne eke foki e ia hana tau hoe ki luga hana tau kaniva fata ne fa, kua eke ke he mena ia hana tau hoe; ti fakakili aki e ia ke he apa kula.

3 Ne eke foki e ia e tau mena oti mo e fatapoa, ko e tau kumete, mo e tau aku, mo e tau kapiniu, ko e tau huki, mo e tau mena uta afi; ko e hana tau mena oti kua eke e ia ke he apa kula.

4 Ne eke foki e ia mo e fatapoa e tokaaga afi kua pūpū poke kupega ke he apa kula, ki lalo hifo hana kala ki loto, kua hoko ke he lotoga he fatapoa.

5 Ne eke foki e ia fa e veli mo e tau kaniva ne fa he mena pūpū apa kula ke humaki ai e tau akau tauloto.

6 Kua eke foki e ia e tau akau tauloto ke he akau ko e sitima, ti fakakili aki he apa kula.

7 Ti humaki e ia e tau akau tauloto ke he tau veli ha he tau kaniva he fatapoa ke tauloto aki; ne eke aki he tau lapa, kua takoko ni.

8 Ne eke foki e ia e kumete ke he apa kula, mo e hana tuaga ke he apa kula he tau fakaata he tau fifine ne fa fakapotopoto ke he gutuhala he fale uta fano he tutuutaga.

9 Ne eke foki e ia e pa ke he fahi toga ke hagao atu ki toga, ko e ie puipui he pa, ko e ie lino kua filo tua tote, taha e teau e kupita e loa;

10 Ko e ha lautolu a tau pou foki ne uafulu, mo e tau fakalago apa kula ha lautolu ne uafulu ni, ka ko e tau fao he tau pou, mo e ha lautolu a tau fakalava pou kua eke ia ke he ario.

11 Ko e fahi tokelau foki taha e teau e kupita, ti uafulu ha lautolu a tau pou, ti uafulu ha lautolu a tau fakalago apa kula, ka ko e tau fao he tau pou, mo e ha lautolu a tau fakalava pou, kua eke ia ke he ario.

12 Ko e fahi foki ki lalo, ko e tau ie puipui limagofulu ni e kupita, ko e tau pou ha lautolu ne hogofulu, mo e tau fakalago ha lautolu ne hogofulu, ka ko e tau fao he tau pou mo e tau fakalava pou ha lautolu, kua eke ia ke he ario.

13 Ko e fahi uta foki kua hagao atu ki uta, limagofulu ia e kupita.

14 Ko e ie puipui he taha fahi gutuhala ko e hogofulu ma lima ia e kupita, ko e ha lautolu a tau pou ne tolu mo e ha lautolu a tau fakalago ne tolu.

15 Ke e taha fahi foki he gutuhala, ha he taha fahi mo e taha fahi he pa, ko e tau ie puipui ne hogofulu ma lima e kupita, ko e ha lautolu a tau pou ne tolu, mo e ha lautolu a tau fakalago ne tolu.

16 Ko e tau ie puipui oti he pa ke takai aki, ko e ie lino ia kua filo tua tote.

17 Ko e tau fakalago he tau pou ko e apa kula ia; ka ko e tau fao he tau pou mo e tau fakalava pou ha lautolu ko e ario ia, ko e ufi foki he tau ulu pou ko e ario ia; ha i ai foki ke he tau pou oti kana he pa e tau fakalava pou ario.

18 Ko e ie puipui foki mo e gutuhala he pa kua eke ia ke he gahua he tufuga tuitui mena ke he tau mena uli, mo e kula uhi, mo e kula momoho, mo e ie lino kua filo tua tote; uafulu ni e kupita e loa, ko e tokoluga foki ko e laulahi ia lima ni e kupita, ke lata mo e tau ie puipui he pa;

19 Na fa ha lautolu a tau pou, ti fa ha lautolu a tau fakalago apa kula, ka ko e tau fao ha lautolu ko e ario ia; ko e tau ufi foki he tau ulu pou, mo e ha lautolu a tau fakalava pou ko e ario ia.

20 Ko e tau fao oti he faituga, katoa mo e pa kua takai aki, ko e apa kula ia.

21 Ko e katoatoa hanai he tau mena he faituga, ko e faituga ha i ai e fakatufono, ne totou tuga ne kupu a Mose, ko e gahua he magafaoa a Levi ke he lima a Itamara ko e tama a Arona e ekepoa.

22 Ko Pesaleli ko e tama a Auri, ko e tama a ia a Huro he magafaoa a Iuta, ne eke e ia e tau mena oti kana ne poaki mai e Iehova kia Mose.

23 Ne fakalataha foki mo ia a Aliavu e tama a Ahisamako, he magafaoa a Tano, ko e tufuga ta maka, mo e tufuga lalaga ie, mo e tufuga tuitui mena ke he tau mena uli, mo e kula uhi, mo e kula momoho, mo e ie lino.

24 Ko e katoatoa he auro oti ne eke aki e gahua, ko e gahua oti kana he faituga, ko e auro ni he poa, uafulu ma hiva ia e taleni mo e tau sikeli fitu la e teau ti tolugofulu, kua fakalata ke he sikeli he faituga.

25 Ko e ario foki ha lautolu ne totou ke he fakapotopotoaga ko e teau ia e taleni, mo e tau sikeli taha ni e afe, fitu e teau, fitugofulu ma lima, kua fakalata ke he sikeli he faituga.

26 Kua takitaha mo e hana pika, ko e hafa sikeli haia, kua fakalata ke he sikeli he faituga; kua igatia a lautolu oti ne totou kua uafulu ha lautolu a tau tau, katoa mo lautolu kua fakamua atu, ko e tau tagata, ono e teau afe, ti tolu e afe, ti lima e teau mo e limagofulu.

27 Ko e teau e taleni ario ne tunu ke eke aki e tau fakalago he faituga mo e tau fakalago he ie puipui; taha teau e taleni ne eke aki taha teau e fakalago, taha e taleni ke he taha fakalago.

28 Ko e tau sikeli foki ne taha e afe, ti fitu e teau, ti fitugofulu ma lima ne eke aki e ia e tau fao mo e tau pou; ne ufi aki foki e tau ulu pou, mo e fakalava aki a lautolu.

29 Ko e apa kula he poa ko e fitugofulu ia e taleni, mo e tau sikeli, ua ni e afe, ti fa e teau;

30 Ne eke aki e ia e tau fakalago he gutuhala he fale uta fano he tutuutaga, mo e fatapoa apa kula, mo e mena pūpū apa kula ha i ai mo e tau mena oti kana ni he fatapoa,

31 Mo e tau fakalago he pa kua takai aki, mo e tau fakalago he gutuhala he pa, mo e tau fao oti he faituga, mo e tau fao oti he pa ne takai aki.